****ਬੋਲ ਪੰਡੋਰੀ ਦੇ****
**ਜੇ ਕਿਸੇ ਨੂੰ ਲੋਕ ਸਭਾ ਚੋਣਾਂ ਦੇ ਪ੍ਰਚਾਰ ਨਾਲ ਸੰਬੰਧਿਤ ਸਵਾਲ ਕੀਤਾ ਜਾਵੇ ਕਿ ਇਸ ਵਾਰ ਲੋਕ ਸਭਾ ਦੀਆਂ ਚੋਣਾਂ ਦਾ “ਬਰਾਂਡ” ਸ਼ਬਦ ਕਿਹੜਾ ਹੈ ਤਾਂ ਸੁਭਾਵਿਕ ਹੀ ਜਵਾਬ ਹੋਵੇਗਾ…’ਤਿੱਤਲੀ’। ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕਾਂਗਰਸ ਦੇ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਲਈ ਤਿੱਤਲੀ ਸ਼ਬਦ ਕੀ ਵਰਤਿਆ..ਬੱਸ…ਤਿੱਤਲੀ ਲੀਡਰਾਂ ਦਾ ਮਨਪਸੰਦ ਜੀਵ ਬਣ ਗਿਆ। ਸਾਰੇ ਪਾਸੇ ਤਿੱਤਲੀਆਂ ਹੀ ਤਿੱਤਲੀਆਂ ਉੱਡਦੀਆਂ ਫਿਰਦੀਆਂ ਨੇ। ਮੇਰਾ ਯਾਰ ਤਿੱਤਲੀਆਂ ਵਰਗਾ ਗੀਤ ਗਾਉਣ ਵਾਲੀ ਗਾਇਕਾ ਅਫ਼ਸਾਨਾ ਖ਼ਾਨ ਅਤੇ ਉਸ ਦੇ ਗੀਤ ਨਾਲੋਂ ਵੱਧ ਤਿੱਤਲੀਆਂ ਦੀ ਚਰਚਾ ਲੋਕ ਸਭਾ ਚੋਣਾਂ ਦੌਰਾਨ ਲੀਡਰਾਂ ਨਾਲ ਜੋੜ ਕੇ ਹੋ ਰਹੀ ਹੈ। ਇਹਨਾਂ ਤਿੱਤਲੀਆਂ ਦੇ ਕਾਰਨਾਮਿਆਂ ਨੂੰ ਵੇਖ ਕੇ ਸੱਚਮੁੱਚ ਦੀਆਂ ਤਿੱਤਲੀਆਂ ਵੀ ਸ਼ਰਮਿੰਦਾ ਹੁੰਦੀਆਂ ਹੋਣਗੀਆਂ। ਜਦੋਂ ਕੋਈ ਸਿਆਸੀ ਤਿੱਤਲੀ ਆਪਣੇ ਸਿਆਸੀ ਬਾਗ ਦੇ ਮਾਲੀ ਨਾਲ ਨਾਰਾਜ਼ ਹੁੰਦੀ ਹੈ ਤਾਂ ਲੋਕ ਅੱਡੀਆਂ ਚੁੱਕ ਚੁੱਕ ਵੇਖਦੇ ਰਹਿੰਦੇ ਹਨ ਕਿ ਹੁਣ ਇਹ ਤਿੱਤਲੀ ਕਿੱਥੇ ਜਾ ਕੇ ਬੈਠੇਗੀ। ਕੁਝ ਤਿੱਤਲੀਆਂ ਨੂੰ ਤਾਂ ਹਕੂਮਤਾਂ ਦੀ ਹਵਾ ਧੱਕੇ ਨਾਲ ਹੀ ਉਡਾ ਕੇ ਲੈ ਗਈ। ਚੋਣ ਰਾਜਨੀਤੀ ਦੇ ਨਜ਼ਾਰੇ ਲੈਣ ਵਾਲਿਆਂ ਦੀਆਂ ਨਜ਼ਰਾਂ ਕਬੂਤਰਬਾਜ਼ਾਂ ਅਤੇ ਪਤੰਗਬਾਜ਼ਾਂ ਵਾਂਗ ਉਪਰ ਹੀ ਰਹਿੰਦੀਆਂ ਨੇ ਕਿ ਅੱਜ ਕਿਹੜੇ ਪਾਸਿਓਂ ਕਿਹੜੀ ਤਿੱਤਲੀ ਉੱਡੇਗੀ ਤੇ ਕਿੱਥੇ ਬੈਠੇਗੀ। ਕਿੰਨੀ ਚਲਾਕ ਹੈ ਸਮੇਂ ਦੀ ਸਿਆਸਤ…ਇੱਕ ਸ਼ਬਦ ਵਿੱਚ ਸਾਰੇ ਲੋਕਾਂ ਨੂੰ ਉਲਝਾ ਕੇ ਰੱਖ ਦਿੱਤਾ…ਢੱਠੇ ਖੂਹ ਵਿੱਚ ਜਾਵੇ ਪੰਜਾਬ,ਪੰਜਾਬੀ ਅਤੇ ਪੰਜਾਬੀਅਤ…ਪੰਜਾਬ ਦੇ ਬੁਨਿਆਦੀ ਮੁੱਦੇ…ਕਿਸਾਨਾਂ ਮਜ਼ਦੂਰਾਂ ਦੀਆਂ ਮੁਸ਼ਕਿਲਾਂ ਅਤੇ ਲੋੜਾਂ.. ਇਹਨਾਂ ਗੱਲਾਂ ਨਾਲ ਕਿਸੇ ਨੂੰ ਕੀ ਮਤਲਬ…ਤੁਸੀਂ ਰੰਗ ਬਿਰੰਗੀਆਂ ਤਿੱਤਲੀਆਂ ਉੱਡਦੀਆਂ ਵੇਖੋ ਤੇ ਨਜ਼ਾਰੇ ਲਵੋ.. ਜੇ ਤੁਹਾਡੇ ਬੱਚਿਆਂ ਨੂੰ ਵਜ਼ੀਫਾ ਨਹੀਂ ਮਿਲਿਆ ਤਾਂ ਕੋਈ ਗੱਲ ਨਹੀਂ..ਬੱਚੇ ਤਿੱਤਲੀਆਂ ਵੇਖ ਕੇ ਬਹੁਤ ਖੁਸ਼ ਹੁੰਦੇ ਨੇ ਉਹਨਾਂ ਨੂੰ ਇਹ ਤਿੱਤਲੀਆਂ ਦਿਖਾਓ… ਘਰਵਾਲੀ ਕਿਸੇ ਗੱਲੋਂ ਨਰਾਜ਼ ਹੈ ਤਾਂ ਤਿਤਲੀ ਰੰਗ ਦਾ ਸੂਟ ਲੈ ਦਿਓ…. ਇਹ ਤਿਤਲੀ ਹੁਣ ਹਰ ਮਰਜ਼ ਦੀ ਦਵਾ ਹੈ…ਬੱਸ ਤਿੱਤਲੀਆਂ ਉਡਾਓ.. ਨਜ਼ਾਰੇ ਲਵੋ ਤਿੱਤਲੀ ਉਡਦੀ ਵੇਖੋ.. ਤਿੱਤਲੀ ਵਿਕਦੀ ਵੇਖੋ… ਜ਼ਮੀਰ ਤਾਂ ਇਹਨਾਂ ਲੋਕਾਂ ਦੀ ਪਹਿਲਾਂ ਹੀ ਪੂਰੀ ਵਿਕ ਚੁੱਕੀ ਹੈ… ਇਸ ਵਾਰ ਚੋਣਾਂ ਵਿੱਚ ਤਿੱਤਲੀ ਵਿਕੇਗੀ ਤਿੱਤਲੀ…ਅਫਸਾਨਾ ਖਾਨ ਹੁਣ ਨਵਾਂ ਗੀਤ ਕੱਢ ਸਕਦੀ ਹੈ ਬਹੁਤ ਚੱਲੇਗਾ…”ਮੇਰਾ ਯਾਰ ਤਿੱਤਲੀਆਂ ਵਰਗਾ…ਕਦੇ ਫੁੱਲ ‘ਤੇ…ਕਦੇ ਝਾੜੂ ‘ਤੇ…ਕਦੇ ਪੰਜੇ ‘ਤੇ…ਕਦੇ ਤੱਕੜੀ ‘ਤੇ…..ਤੇ ਕਦੇ…..!
