ਬਰਨਾਲਾ 28 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-ਪੁਲੀਸ ਵਾਲਿਆਂ ਦੀ “ਪੈਂਟ ਗਿੱਲੀ” ਕਰਨ ਦਾ ਬਿਆਨ ਦੇ ਕੇ ਪ੍ਰਦੇਸ਼ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਕਸੂਤੀ ਸਥਿਤੀ ਵਿੱਚ ਫਸ ਗਏ। ਪੁਲਿਸ ਪ੍ਰਤੀ ਸਿੱਧੂ ਦੇ ਇਸ ਨਜ਼ਰੀਏ ਦੀ ਚਾਰੇ ਪਾਸਿਓ ਨਿੰਦਾ ਹੋ ਰਹੀ ਹੈ। ਪੁਲੀਸ ਦੇ ਇੱਕ ਡੀਐਸਪੀ ਨੇ ਨਵਜੋਤ ਸਿੰਘ ਸਿੱਧੂ ਨੂੰ ਮਾਣਹਾਨੀ ਦਾ ਨੋਟਿਸ ਭੇਜਿਆ ਹੈ,ਇਸ ਨੋਟਿਸ ਰਾਹੀਂ ਭਾਵੇਂ ਸਿੱਧੂ ਕੋਲੋਂ ਮਾਣਹਾਨੀ ਦੇ ਬਦਲੇ ਪੈਸਿਆਂ ਦੀ ਮੰਗ ਨਹੀਂ ਕੀਤੀ ਪਰ ਡੀਐੱਸਪੀ ਨੇ ਸਿੱਧੂ ਨੂੰ ਕਿਹਾ ਹੈ ਕਿ ਉਹ ਲਿਖਤੀ ਤੌਰ ‘ਤੇ ਮੁਆਫ਼ੀ ਮੰਗੇ। ਦੂਜੇ ਪਾਸੇ ਪੰਜਾਬ ਪੁਲੀਸ ਦੇ ਇੱਕ ਹੌਲਦਾਰ ਨੇ ਸੋਸ਼ਲ ਮੀਡੀਆ ਉੱਪਰ ਵੀਡੀਓ ਪਾ ਕੇ ਆਪਣੀਆਂ ਮੁੱਛਾਂ ਨੂੰ ਵੱਟ ਦੇ ਕੇ ਕਿਹਾ ਕਿ “ਸਿੱਧੂ ਮੈਨੂੰ ਇੱਕ ਦਬਕਾ ਮਾਰੇ, ਜੇ ਮੇਰੇ ਮੱਥੇ ‘ਤੇ ਪਸੀਨੇ ਦੀ ਇੱਕ ਬੂੰਦ ਵੀ ਆਈ ਤਾਂ ਸਿੱਧੂ ਦੀ ਜੁੱਤੀ ਵਿੱਚ ਪਾਣੀ ਪੀਵਾਂਗਾ”। ਕਿਸੇ ਸਿਆਸਤਦਾਨ ਵੱਲੋਂ ਬਦਜ਼ੁਬਾਨੀ ਦੀ ਇਹ ਕੋਈ ਪਹਿਲੀ ਘਟਨਾ ਨਹੀਂ ਹੈ। ਸਿਆਸਤਦਾਨ ਅਕਸਰ ਸੱਤਾ ਦੇ ਨਸ਼ੇ ‘ਚ ਵੱਧ-ਘੱਟ ਬੋਲ ਜਾਂਦੇ ਹਨ ਪਰ ਕਈ ਵਾਰ “ਸੇਰ ਨੂੰ ਸਵਾ ਸੇਰ” ਵੀ ਮਿਲ ਜਾਂਦਾ ਹੈ ਜਿਵੇਂ ਨਵਜੋਤ ਸਿੰਘ ਸਿੱਧੂ ਨੂੰ ਡੀਐੱਸਪੀ ਅਤੇ ਹੌਲਦਾਰ ਮਿਲੇ ਹਨ।
