ਚੰਡੀਗੜ੍ਹ,1 ਅਪ੍ਰੈਲ, Gee98 news service
-ਲੋਕ ਸਭਾ ਹਲਕਾ ਪਟਿਆਲਾ ਤੋਂ ਸਾਬਕਾ ਮੈਂਬਰ ਪਾਰਲੀਮੈਂਟ ਡਾਕਟਰ ਧਰਮਵੀਰ ਗਾਂਧੀ ਨੇ ਆਪਣੀ ‘ਨਵਾਂ ਸਮਾਜ ਪਾਰਟੀ’ ਨੂੰ ਕਾਂਗਰਸ ਵਿੱਚ ਮਰਜ਼ ਕਰ ਦਿੱਤਾ ਹੈ। ਡਾਕਟਰ ਗਾਂਧੀ ਨੇ ਅੱਜ ਦਿੱਲੀ ਵਿਖੇ ਕਾਂਗਰਸ ਪਾਰਟੀ ਦੇ ਹੈਡਕੁਆਰਟਰ ‘ਤੇ ਬਕਾਇਦਾ ਕਾਂਗਰਸ ਵਿੱਚ ਸ਼ਮੂਲੀਅਤ ਕੀਤੀ। ਮੰਨਿਆ ਜਾ ਰਿਹਾ ਹੈ ਕਿ ਡਾਕਟਰ ਗਾਂਧੀ ਦੇ ਕਾਂਗਰਸ ਵਿੱਚ ਸ਼ਾਮਿਲ ਹੋਣ ਤੋਂ ਬਾਅਦ ਪਟਿਆਲਾ ਹਲਕੇ ਤੋਂ ਕਾਂਗਰਸ ਦੀ ਲੋਕ ਸਭਾ ਚੋਣਾਂ ਲਈ ਚਿਹਰੇ ਦੀ ਤਲਾਸ਼ ਖਤਮ ਹੋ ਗਈ ਹੈ। ਜ਼ਿਕਰਯੋਗ ਹੈ ਕਿ ਡਾਕਟਰ ਧਰਮਵੀਰ ਗਾਂਧੀ ਇਕੋ ਇਕ ਅਜਿਹੇ ਨੇਤਾ ਹਨ ਜਿਨਾਂ ਨੇ ਸ਼ਾਹੀ ਘਰਾਣੇ ਦੀ ਵਹੁਟੀ ਪਰਨੀਤ ਕੌਰ ਨੂੰ ਹਰਾ ਦਿੱਤਾ ਸੀ। ਜੇਕਰ ਕਾਂਗਰਸ ਪਾਰਟੀ ਪਟਿਆਲਾ ਤੋਂ ਡਾਕਟਰ ਗਾਂਧੀ ‘ਤੇ ਦਾਅ ਖੇਡਦੀ ਹੈ ਤਾਂ ਕਾਂਗਰਸ ਦਾ ਇਹ ਦਾਅ ਕਾਰਗਰ ਵੀ ਸਾਬਤ ਹੋ ਸਕਦਾ ਹੈ ਕਿਉਂਕਿ ਡਾਕਟਰ ਗਾਂਧੀ ਦਾ ਆਪਣਾ ਨਿੱਜੀ ਜਨ ਆਧਾਰ ਵੀ ਹੈ। ਡਾਕਟਰ ਗਾਂਧੀ ਕੋਲ ਲੋਕਾਂ/ ਵੋਟਰਾਂ ਨੂੰ ਕੀਲ੍ਹਣ ਦੀ ਲਿਆਕਤ ਹੈ ਜਿਸ ਕਰਕੇ ਉਹ ਪਿਛਲੀਆਂ ਚੋਣਾਂ ਦੌਰਾਨ ਝਾੜੂ ਦੇ ਹੱਕ ‘ਚ ਤੁਰੇ ਕਾਂਗਰਸ ਦੇ ਆਮ ਵਰਕਰਾਂ ਨੂੰ ਵਾਪਸ ਮੋੜ ਕੇ ਲਿਆ ਸਕਦੇ ਹਨ। ਹੁਣ ਇਸ ਸਮੇਂ ਦੀ ਬੁੱਕਲ ਵਿੱਚ ਹੈ ਕਿ ਕਾਂਗਰਸ ਵੱਲੋਂ ਡਾਕਟਰ ਧਰਮਵੀਰ ਗਾਂਧੀ ਦੇ ਲਾਇਆ ਦਲ ਬਦਲੀ ਦਾ ਟੀਕਾ ਪਟਿਆਲਾ ‘ਚ ਕੈਪਟਨ ਦੇ ਝਟਕੇ ਤੋਂ ਬਾਅਦ ਬਿਮਾਰ ਪਈ ਕਾਂਗਰਸ ਨੂੰ ਖੜਾ ਕਰੇਗਾ ?
Menu
