ਬਰਨਾਲਾ,11 ਅਪ੍ਰੈਲ, (ਨਿਰਮਲ ਸਿੰਘ ਪੰਡੋਰੀ)-
-ਸ਼੍ਰੋਮਣੀ ਅਕਾਲੀ ਦਲ ਦੇ ਮਹਿਲਾ ਵਿੰਗ (ਇਸਤਰੀ ਅਕਾਲੀ ਦਲ) ਦੀ ਇੱਕ ਵੱਡੇ ਕੱਦ ਦੀ ਸਿਆਸੀ ਆਗੂ ਦੀ ਸ਼ਰਮਨਾਕ ਹਰਕਤ ਦੀ ਅੱਜਕੱਲ੍ਹ ਖ਼ੂਬ ਚਰਚਾ ਹੋ ਰਹੀ ਹੈ। ਇਸਤਰੀ ਅਕਾਲੀ ਦਲ ਦੀ ਇਹ ਆਗੂ ਇੱਕ ਬਰਨਾਲਾ ਜ਼ਿਲ੍ਹੇ ਨਾਲ ਸੰਬੰਧਿਤ ਹੈ ਅਤੇ ਪਾਰਟੀ ਦੇ ਮਾਣਮੱਤੇ ਅਹੁਦੇ ‘ਤੇ ਬਿਰਾਜਮਾਨ ਹੈ। ਜਾਤ ਪਾਤ ਦੀ ਭਾਵਨਾ ਨਾਲ ਲਬਰੇਜ਼ ਇਸ ਮਹਿਲਾ ਆਗੂ ਦੀ ਹਰਕਤ ਦੀ ਚਹੁੰਤਰਫੀ ਨਿੰਦਾ ਹੋ ਰਹੀ ਹੈ। ਆਪਣਾ ਨਾਮ ਨਾ ਛਾਪਣ ਦੀ ਸ਼ਰਤ ‘ਤੇ ਅਕਾਲੀ ਦਲ ਦੇ ਇੱਕ ਵੱਡੇ ਆਗੂ ਨੇ “Gee98 news” ਅਦਾਰੇ ਨਾਲ ਗੱਲਬਾਤ ਕਰਦੇ ਹੋਏ ਦੱਸਿਆ ਕਿ ਪਿਛਲੇ ਦਿਨੀ ਇਸਤਰੀ ਅਕਾਲੀ ਦਲ ਦੀ ਸੂਬਾ ਪ੍ਰਧਾਨ ਬੀਬੀ ਹਰਗੋਬਿੰਦ ਕੌਰ ਦੀ ਬਰਨਾਲਾ ਫੇਰੀ ਦੌਰਾਨ ਜਦ ਇੱਕ ਮੀਟਿੰਗ ਤੋਂ ਬਾਅਦ ਬੀਬੀ ਹਰਿਗੋਬਿੰਦ ਕੌਰ ਇੱਕ ਕਮਰੇ ਵਿੱਚ ਖਾਣਾ ਖਾਣ ਲਈ ਕਮਰੇ ਵਿੱਚ ਬੈਠੇ ਤਾਂ ਉੱਥੇ ਪਹਿਲਾਂ ਤੋਂ ਹੀ ਹਾਜ਼ਰ ਦਲਿਤ ਵਰਗ ਦੀ ਇੱਕ ਮਹਿਲਾ ਆਗੂ ਨੇ ਸੂਬਾ ਪ੍ਰਧਾਨ ਅਤੇ ਹੋਰ ਉੱਚ ਆਗੂਆਂ ਲਈ ਥਾਲੀ ਵਿੱਚ ਖਾਣਾ ਪਾ ਕੇ ਫੜਾਉਣਾ ਸ਼ੁਰੂ ਕਰ ਦਿੱਤਾ। ਸੂਬਾ ਪ੍ਰਧਾਨ ਸਮੇਤ ਕੁਝ ਹੋਰ ਆਗੂਆਂ ਨੇ ਖਾਣਾ ਸ਼ੁਰੂ ਕਰ ਦਿੱਤਾ ਪ੍ਰੰਤੂ ਉੱਥੇ ਹਾਜ਼ਰ ਉੱਚ ਜਾਤੀ ਦੀ ਇੱਕ ਮਹਿਲਾ ਆਗੂ ਨੇ ਦਲਿਤ ਵਰਗ ਦੀ ਮਹਿਲਾ ਆਗੂ ਦੇ ਹੱਥੋਂ ਖਾਣੇ ਵਾਲੀ ਥਾਲੀ ਫੜਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਖੁਦ ਉੱਠ ਕੇ ਆਪਣੀ ਥਾਲੀ ਵਿੱਚ ਖਾਣਾ ਪਾਇਆ। ਇਹ ਘਟਨਾ ਉੱਥੇ ਹਾਜ਼ਰ ਸਾਰੀਆਂ ਮਹਿਲਾ ਆਗੂਆਂ ਦੇ ਸਾਹਮਣੇ ਵਾਪਰੀ ਅਤੇ ਸਾਰਿਆਂ ਨੇ ਇਸ ਘਟਨਾ ਦਾ ਨੋਟਿਸ ਵੀ ਲਿਆ। ਇਹ ਵੀ ਜਾਣਕਾਰੀ ਸਾਹਮਣੇ ਆ ਰਹੀ ਹੈ ਕਿ ਉੱਚ ਜਾਤੀ ਦੀ ਉਕਤ ਮਹਿਲਾ ਆਗੂ ਦੀ ਇਸ ਹਰਕਤ ਦਾ ਨੋਟਿਸ ਲੈਂਦੇ ਹੋਏ ਉਥੇ ਹਾਜ਼ਰ ਇੱਕ ਹੋਰ ਸੂਬਾ ਪੱਧਰੀ ਮਹਿਲਾ ਆਗੂ ਨੇ ਉਕਤ ਆਗੂ ਦੀ ਜੰਮ੍ਹ ਕੇ ਕਲਾਸ ਵੀ ਲਗਾਈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਜਾਤ ਪਾਤ ਦੀ ਭਾਵਨਾ ਨਾਲ ਲਬਰੇਜ਼ ਇਸ ਮਹਿਲਾ ਆਗੂ ਦੀ ਪਹਿਲਾਂ ਵੀ ਦਲਿਤ ਵਰਗ ਦੇ ਆਗੂਆਂ ਪ੍ਰਤੀ ਮਾੜੀ ਸੋਚ ਦਾ ਪ੍ਰਗਟਾਵਾ ਸਾਹਮਣੇ ਆ ਚੁੱਕਿਆ ਹੈ। ਉਕਤ ਘਟਨਾ ਸਬੰਧੀ ਜਦ ਇੱਕ ਹੋਰ ਮਹਿਲਾ ਆਗੂ ਨਾਲ ਗੱਲ ਕੀਤੀ ਤਾਂ ਉਹਨਾਂ ਉਕਤ ਘਟਨਾ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਜੇਕਰ ਲੋਕ ਸਭਾ ਚੋਣਾਂ ਦੇ ਪ੍ਰਚਾਰ ਦੌਰਾਨ ਉਕਤ ਹੰਕਾਰੀ ਬੀਬੀ ਨੂੰ ਅੱਗੇ ਰੱਖਿਆ ਜਾਂਦਾ ਹੈ ਤਾਂ ਅਕਾਲੀ ਦਲ ਦੀ ਬੇੜੀ ਵਿੱਚ ਵੋਟਾਂ ਨਹੀਂ ਸਗੋਂ ਵੱਟੇ ਹੀ ਪੈਣਗੇ ਕਿਉਂਕਿ ਉਕਤ ਹੰਕਾਰੀ ਬੀਬੀ ਪਹਿਲਾਂ ਵੀ ਕਈ ਵਾਰ ਪਾਰਟੀ ਦੇ ਦਲਿਤ ਵਰਗ ਦੀਆਂ ਮਹਿਲਾਵਾਂ ਨਾਲ ਮਾੜਾ ਵਿਵਹਾਰ ਕਰ ਚੁੱਕੀ ਹੈ।
Menu
