ਚੰਡੀਗੜ੍ਹ,18 ਮਈ, Gee98 news service
-ਵੈਸੇ ਤਾਂ ਡਾਕਟਰਾਂ ਨੂੰ ਰੱਬ ਕਿਹਾ ਜਾਂਦਾ ਹੈ ਪ੍ਰੰਤੂ ਕਈ ਵਾਰੀ ਡਾਕਟਰਾਂ ਦੇ ਵੀ ਅਜੀਬ ਕਾਰਨਾਮੇ ਸਾਹਮਣੇ ਆ ਜਾਂਦੇ ਹਨ, ਜਿਸ ਨਾਲ ਮਰੀਜ਼ਾਂ ਦੀ ਜ਼ਿੰਦਗੀ ਬਰਬਾਦ ਵੀ ਹੋ ਜਾਂਦੀ ਹੈ। ਮਲੋਟ ਦੇ ਸਰਕਾਰੀ ਹਸਪਤਾਲ ਵਿੱਚ ਇੱਕ ਡਾਕਟਰ ਦਾ ਅਜਿਹਾ ਹੀ ਕਾਰਨਾਮਾ ਸਾਹਮਣੇ ਆਇਆ ਜਿੱਥੇ ਡਾਕਟਰ ਨੇ ਇੱਕ ਔਰਤ ਮਰੀਜ਼ ਦੇ ਸੱਜੇ ਕੰਨ ਦਾ ਆਪਰੇਸ਼ਨ ਕਰਨਾ ਸੀ, ਪਰ ਵਾਰਿਸਾਂ ਅਨੁਸਾਰ ਉਸ ਦੇ ਖੱਬੇ ਕੰਨ ਦਾ ਆਪਰੇਸ਼ਨ ਕਰ ਦਿੱਤਾ ਗਿਆ। ਸਰਕਾਰੀ ਹਸਪਤਾਲ ਮਲੋਟ ਵਿਖੇ ਦਾਖ਼ਲ ਇੱਕ ਔਰਤ ਦੇ ਪਤੀ ਨੇ ਆਪਣੀ ਬਿਮਾਰ ਪਤਨੀ ਦੀ ਗਾਥਾ ਦੱਸੀ ਕਿ ਉਹ ਸਰਕਾਰੀ ਹਸਪਤਾਲ ਮਲੋਟ ਵਿਖੇ ਦਾਖ਼ਲ ਹੋਏ ਸਨ ਜਿੱਥੇ ਉਸ ਦੀ ਪਤਨੀ ਦੇ ਕੰਨ ਦਾ ਆਪਰੇਸ਼ਨ, ਜਿਸ ‘ਚ ਕੰਨ ਦੀ ਹੱਡੀ ਖ਼ਰਾਬ ਹੋਈ ਦੱਸੀ ਗਈ ਸੀ, ਦਾ ਆਪਰੇਸ਼ਨ ਹੋਣਾ ਸੀ।ਸਰਕਾਰੀ ਹਸਪਤਾਲ ਵਿਖੇ ਈਐਨਟੀ ਮਾਹਿਰ ਡਾਕਟਰ ਨੇ ਸੱਜੇ ਕੰਨ ਦੀ ਬਜਾਏ ਖੱਬੇ ਕੰਨ ਦਾ ਆਪਰੇਸ਼ਨ ਕਰ ਦਿੱਤਾ। ਮਰੀਜ਼ ਦੇ ਪਤੀ ਨੇ ਦੱਸਿਆ ਕਿ ਜਦ ਉਸਨੇ ਸਬੰਧਿਤ ਡਾਕਟਰ ਨੂੰ ਗ਼ਲਤ ਆਪਰੇਸ਼ਨ ਕਰਨ ਬਾਰੇ ਪੁੱਛਿਆ ਤਾਂ ਉਹਨਾਂ ਨੇ ਕਿਹਾ ਕਿ ਨਹੀਂ, ਇਸ ਕੰਨ ‘ਚ ਵੀ ਬਿਮਾਰੀ ਸੀ। ਮਰੀਜ਼ ਦੇ ਪਤੀ ਨੇ ਦੱਸਿਆ ਕਿ ਜਦ ਉਸਨੇ ਇਸ ਸਬੰਧੀ ਐਸਐਮਓ ਕੋਲ ਗੱਲ ਕੀਤੀ ਤਾਂ ਡਾਕਟਰ ਮੰਨਿਆ ਕਿ ਆਪਰੇਸ਼ਨ ਗ਼ਲਤ ਹੋਇਆ ਹੈ ਅਤੇ ਡਾਕਟਰ ਤੁਰੰਤ ਹਸਪਤਾਲ ਵਿੱਚੋਂ ਚਲੇ ਗਏ। ਪੀੜਤ ਮਰੀਜ਼ ਦੇ ਪਤੀ ਨੇ ਇਹ ਵੀ ਦੋਸ਼ ਲਾਇਆ ਕਿ ਉਸ ਦੀ ਪਤਨੀ ਅਜੇ ਤੱਕ ਆਪਰੇਸ਼ਨ ਥੀਏਟਰ ਵਿੱਚ ਹੀ ਸੀ ਕਿ ਆਪਰੇਸ਼ਨ ਕਰਨ ਵਾਲੇ ਡਾਕਟਰ ਨੇ ਉਸ ਤੋਂ 10 ਹਜ਼ਾਰ ਰੁਪਏ ਮੰਗੇ ਅਤੇ ਕਿਹਾ ਕਿ ਹੱਡੀ ਬਦਲਣ ਦੀ ਫੀਸ ਹੈ। ਪਰ ਜਦ ਉਸਨੇ ਇਸ ਸਬੰਧੀ ਐਸਐਮਓ ਕੋਲ ਸ਼ਿਕਾਇਤ ਕੀਤੀ ਤਾਂ ਐਸਐਮਓ ਨੇ ਉਹ ਪੈਸੇ ਉਸ ਦੇ ਪਤੀ ਦੀ ਜੇਬ੍ਹ ਵਿੱਚ ਵਾਪਸ ਪਾਏ ਅਤੇ ਤੁਰੰਤ ਹਸਪਤਾਲ ਛੱਡ ਕੇ ਡਾਕਟਰ ਚਲੇ ਗਏ। ਪੀੜਤ ਪਤੀ ਨੇ ਇਹ ਵੀ ਕਿਹਾ ਕਿ ਜੇ ਪੈਸੇ ਜਾਇਜ਼ ਲਏ ਸਨ ਤਾਂ ਵਾਪਸ ਕਿਉਂ ਕੀਤੇ? ਪਰ ਉਹਨਾਂ ਕਿਹਾ ਕਿ ਸਰਕਾਰੀ ਹਸਪਤਾਲ ਵਿਖੇ 10 ਹਜ਼ਾਰ ਰੁਪਏ ਦੀ ਕੋਈ ਅਜਿਹੀ ਚੀਜ਼ ਲਿਆਂਦੀ ਜਾਂ ਪਾਈ ਨਹੀਂ ਗਈ ਜਿਸ ਦੀ ਕੀਮਤ 10 ਹਜ਼ਾਰ ਰੁਪਏ ਪ੍ਰਤੀਤ ਹੁੰਦੀ ਹੋਵੇ। ਪੀੜਤ ਪਤੀ ਨੇ ਇਹ ਵੀ ਕਿਹਾ ਕਿ ਹੁਣ ਉਹਨਾਂ ਨੂੰ ਹਸਪਤਾਲ ਵਿੱਚੋਂ ਕੋਈ ਛੁੱਟੀ ਵੀ ਨਹੀਂ ਦੇ ਰਿਹਾ ਕਿਉਂਕਿ ਡਾਕਟਰ ਤੁਰੰਤ ਹਸਪਤਾਲ ਛੱਡ ਕੇ ਚਲੇ ਗਏ ਅਤੇ ਹਸਪਤਾਲ ਵਿੱਚ ਜੋ ਸਟਾਫ ਹੈ ਉਹ ਇੱਕ-ਦੂਜੇ ਕੋਲ ਫਾਈਲ ਹੋਣ ਬਾਰੇ ਕਹਿ ਰਹੇ ਹਨ। ਮਰੀਜ਼ ਦੇ ਪਤੀ ਨੇ ਮੰਗ ਕੀਤੀ ਹੈ ਕਿ ਉਨ੍ਹਾਂ ਨੂੰ ਇਨਸਾਫ ਦਿੱਤਾ ਜਾਵੇ ਕਿਉਂਕਿ ਉਸਦੀ ਪਤਨੀ ਦਾ ਜਿਹੜਾ ਕੰਨ ਖਰਾਬ ਸੀ ਉਹ ਉਸੇ ਤਰ੍ਹਾਂ ਹੀ ਪੀੜ੍ਹਤ ਅਤੇ ਪੀੜਾ ਝੱਲ ਰਹੀ ਹੈ, ਪ੍ਰੰਤੂ ਜਿਹੜਾ ਕੰਨ ਬਿਲਕੁਲ ਠੀਕ ਸੀ ਉਸ ਨੂੰ ਡਾਕਟਰਾਂ ਨੇ ਪਾੜ ਕੇ ਧਰ ਦਿੱਤਾ।
Menu
