– 215 ਗੱਟੇ ਜੀਰੀ ਅਤੇ ਵਾਹਨ ਬਰਾਮਦ
ਬਰਨਾਲਾ 27 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)–
ਸਿਟੀ ਪੁਲਿਸ ਬਰਨਾਲਾ ਨੇ ਸ਼ੈਲਰਾਂ ਵਿੱਚੋਂ ਝੋਨੇ ਦੇ ਗੱਟੇ ਚੋਰੀ ਕਰਨ ਵਾਲੇ ਇਕ ਗਿਰੋਹ ਨੂੰ ਕਾਬੂ ਕਰਨ ਵਿੱਚ ਸਫਲਤਾ ਪ੍ਰਾਪਤ ਕੀਤੀ ਹੈ। ਪ੍ਰੈੱਸ ਕਾਨਫਰੰਸ ਦੌਰਾਨ ਸਤਵੀਰ ਸਿੰਘ ਪੀਪੀਐਸ-ਡੀਐਸਪੀ ਨੇ ਦੱਸਿਆ ਕਿ ਜ਼ਿਲ੍ਹਾ ਪੁਲਿਸ ਮੁਖੀ ਸੰਦੀਪ ਕੁਮਾਰ ਆਈਪੀਐਸ ਅਤੇ ਰਮਨੀਸ਼ ਕੁਮਾਰ ਚੌਧਰੀ ਪੀਪੀਐਸ, ਐਸਪੀ (ਡੀ) ਦੇ ਦਿਸ਼ਾ ਨਿਰਦੇਸ਼ਾਂ ਤਹਿਤ ਮਾੜੇ ਅਨਸਰਾਂ ਖਿਲਾਫ਼ ਵਿੱਢੀ ਕਾਰਵਾਈ ਦੀ ਸਫ਼ਲਤਾ ਵਜੋਂ ਥਾਣਾ ਸਿਟੀ-1 ਦੀ ਪੁਲਿਸ ਪਾਰਟੀ ਨੇ ਇੰਜ. ਬਲਜੀਤ ਸਿੰਘ ਮੁੱਖ ਅਫਸਰ ਅਤੇ ਪੁਲਿਸ ਚੌਕੀ ਬੱਸ ਸਟੈਂਡ ਦੇ ਇੰਚਾਰਜ ਏਐਸਆਈ ਚਰਨਜੀਤ ਸਿੰਘ ਦੀ ਅਗਵਾਈ ਹੇਠ ਸ਼ੈਲਰਾਂ ਵਿਚੋ ਜੀਰੀ ਚੋਰੀ ਕਰਨ ਵਾਲੇ ਗਿਰੋਹ ਦੇ 5 ਮੈਂਬਰਾਂ ਨੂੰ ਕਾਬੂ ਕੀਤਾ ਹੈ। ਉਹਨਾਂ ਦੱਸਿਆ ਕਿ ਇਹਨਾਂ ਗ੍ਰਿਫਤਾਰ ਕੀਤੇ ਚੋਰਾਂ ਦੀ ਪਹਿਚਾਣ ਜਸਨੂਰ ਸਿੰਘ ਵਾਸੀ ਬਰਨਾਲਾ,ਸੰਜੂ ਜੋਗੀ ਗੋਨੇਆਣਾ ਰੋਡ ਮੁਕਤਸਰ, ਪਰਮਜੀਤ ਸਿੰਘ ਉਰਫ ਪ੍ਰੇਮਜੀਤ ਵਾਸੀ ਪਥਰਾਲਾ ਜ਼ਿਲ੍ਹਾ ਬਠਿੰਡਾ, ਲਵਪ੍ਰੀਤ ਸਿੰਘ ਵਾਸੀ ਪਿੰਡ ਮੋਰਾਂਵਾਲੀ ਜ਼ਿਲ੍ਹਾ ਮਲੇਰਕੋਟਲਾ ਅਤੇ ਬੂਟਾ ਸਿੰਘ ਵਾਸੀ ਕੋਠੇ ਰਾਮਸਰ ਬਰਨਾਲਾ ਵਜੋਂ ਹੋਈ ਹੈ ਹੋਈ ਹੈ। ਇਨ੍ਹਾਂ ਦੋਸ਼ੀਆਂ ਪਾਸੋਂ 215 ਗੱਟੇ ਜੀਰੀ ਝੋਨਾ ਅਤੇ ਇੱਕ ਛੋਟਾ ਹਾਥੀ ਨੰਬਰ ਵੀ ਬਰਾਮਦ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਪੁੱਛਗਿਛ ਦੌਰਾਨ ਦੋਸ਼ੀਆਂ ਨੇ ਮੰਨਿਆ ਹੈ ਕਿ 12-13 ਦਸੰਬਰ ਦੀ ਦਰਮਿਆਨੀ ਰਾਤ ਅਮਰ ਨਾਥ ਰਾਈਸ ਮਿੱਲ ਨੇੜੇ ਜ਼ਿਲਾ ਜੇਲ ਬਰਨਾਲਾ ਤੋਂ 172 ਗੱਟੇ ਚੋਰੀ ਕੀਤੇ ਸਨ। ਇਹਨਾਂ ਵਿਚੋਂ 150 ਗੱਟੇ ਅਤੇ ਵਾਰਦਾਤ ਸਮੇਂ ਵਰਤਿਆ ਗਿਆ ਛੋਟਾ ਹਾਥੀ ਬਰਾਮਦ ਕੀਤਾ ਜਾ ਚੁੱਕਾ ਹੈ । ਇਨ੍ਹਾਂ ਦੋਸ਼ੀਆਂ ਨੇ ਸੇਖਾ ਰੋਡ ਤੋਂ ਆਪਣੇ ਗਿਰੋਹ ਦੇ ਤਿੰਨ ਹੋਰ ਮੈਂਬਰਾਂ ਜਗਸੀਰ ਸਿੰਘ ਉਰਫ ਜੱਗੀ, ਸ਼ਿੰਦਾ ਸਿੰਘ ਅਤੇ ਲਵਪ੍ਰੀਤ ਸਿੰਘ ਉਰਫ ਭੋਲਾ (ਗ੍ਰਿਫਤ ਤੋਂ ਬਾਹਰ) ਨਾਲ ਮਿਲ ਕੇ ਸ਼ਿਵ ਓਮ ਸ਼ੈਲਰ ‘ਚੋਂ 76 ਗੱਟੇ ਚੋਰੀ ਕੀਤੇ ਸਨ ਜਿਸ ਵਿਚੋਂ 65 ਗੱਟੇ ਬਰਾਮਦ ਕੀਤੇ ਗਏ ਹਨ। ਦੋਸ਼ੀਆਂ ਨੇ ਡੱਬਵਾਲੀ ਨੇੜੇ ਵੀ ਦੋ ਸ਼ੈਲਰਾਂ ਵਿੱਚੋਂ ਝੋਨਾ ਚੋਰੀ ਕਰਨ ਦੀਆਂ ਵਾਰਦਾਤਾਂ ਮੰਨੀਆਂ ਹਨ। ਇਸ ਗਿਰੋਹ ਦੇ ਤਿੰਨ ਮੈਂਬਰਾਂ ਉੱਪਰ ਪਹਿਲਾਂ ਵੀ ਸੈਲਰਾਂ ਵਿੱਚੋਂ ਝੋਨਾ ਚੋਰੀ ਕਰਨ ਦੇ 9 ਕੇਸ ਥਾਣਾ ਮਹਿਲਕਲਾਂ, ਸ਼ੇਰਪੁਰ ਅਤੇ ਧਨੌਲਾ ਵਿਖੇ ਦਰਜ ਹਨ।
