-ਵਿਆਹ ਕਰਵਾਉਣ ਦੇ ਸ਼ੌਕੀਨ ਵਿਅਕਤੀ ਦੀਆਂ 2 ਪਤਨੀਆਂ ਇਕੱਠੀਆਂ ਪੁੱਜੀਆਂ ਥਾਣੇ
ਬਰਨਾਲਾ 27 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ)-ਪਹਿਲੀ ਪਤਨੀ ਨਾਲ ਤਲਾਕ ਹੋਣ ਤੋਂ ਬਾਅਦ ਦੂਜਾ ਵਿਆਹ ਕਰਵਾਉਣ ਵਾਲੇ ਅਤੇ ਫਿਰ ਦੂਜੀ ਪਤਨੀ ਨੂੰ ਧੋਖੇ ਵਿਚ ਰੱਖ ਕੇ ਤੀਜਾ ਵਿਆਹ ਕਰਵਾਉਣ ਵਾਲੇ ਵਿਅਕਤੀ ਖਿਲਾਫ ਉਸਦੀ ਦੂਜੀ ਅਤੇ ਤੀਜੀ ਪਤਨੀ ਨੇ ਆਪਣੇ ਧੋਖੇਬਾਜ਼ ਪਤੀ ਖ਼ਿਲਾਫ਼ ਕਾਰਵਾਈ ਕਰਵਾਉਣ ਲਈ ਪੁਲਿਸ ਤੱਕ ਪਹੁੰਚ ਕੀਤੀ। ਇਹ ਮਾਮਲਾ ਅੰਮ੍ਰਿਤਸਰ ਦਾ ਹੈ ਜਿੱਥੋਂ ਦੇ ਨਰੇਸ਼ ਨਾਮ ਦੇ ਇਕ ਵਿਅਕਤੀ ਨੇ ਪਹਿਲੀ ਪਤਨੀ ਨਾਲ ਤਲਾਕ ਹੋਣ ਤੋਂ ਬਾਅਦ ਲਵ ਮੈਰਿਜ ਕਰਵਾਈ ਅਤੇ ਫਿਰ ਦੂਜੀ ਪਤਨੀ ਨੂੰ ਧੋਖੇ ਵਿਚ ਰੱਖ ਕੇ ਤੀਜਾ ਵਿਆਹ ਵੀ ਕਰਵਾ ਲਿਆ। ਨਰੇਸ਼ ਨੇ ਜਿੱਥੇ ਆਪਣੇ ਦੂਜੇ ਵਿਆਹ ਬਾਰੇ ਆਪਣੀ ਤੀਜੀ ਪਤਨੀ ਨੂੰ ਧੋਖੇ ਵਿੱਚ ਰੱਖਿਆ ਉੱਥੇ ਤੀਜੀ ਪਤਨੀ ਨੂੰ ਵੀ ਦੂਜੇ ਵਿਆਹ ਬਾਰੇ ਨਹੀਂ ਦੱਸਿਆ। ਨਰੇਸ਼ ਦੀ ਦੂਜੀ ਪਤਨੀ ਨੂੰ ਉਸਦੇ ਤੀਜੇ ਵਿਆਹ ਬਾਰੇ ਅਤੇ ਤੀਜੀ ਪਤਨੀ ਨੂੰ ਦੂਜੇ ਵਿਆਹ ਬਾਰੇ ਪਤਾ ਲੱਗਣ ਤੋਂ ਬਾਅਦ ਦੋਵੇਂ ਪਤਨੀਆਂ ਨੇ ਇਨਸਾਫ਼ ਲਈ ਵੱਖ-ਵੱਖ ਦਰਖ਼ਾਸਤਾਂ ਪੁਲਿਸ ਨੂੰ ਦਿੱਤੀਆਂ ਹਨ। ਉਸਦੀ ਤੀਜੀ ਪਤਨੀ ਦਾ ਦੋਸ਼ ਹੈ ਕਿ ਉਨ੍ਹਾਂ ਨੂੰ ਸਿਰਫ਼ ਪਹਿਲੇ ਤਲਾਕ ਬਾਰੇ ਵੀ ਦੱਸਿਆ ਗਿਆ ਸੀ ਅਤੇ ਦੂਜੇ ਵਿਆਹ ਤੋਂ ਧੋਖੇ ਵਿੱਚ ਰੱਖਿਆ ਗਿਆ ਜਦਕਿ ਦੂਜੀ ਪਤਨੀ ਦਾ ਕਹਿਣਾ ਹੈ ਕਿ ਉਸ ਦੇ ਨਾਲ ਲਵ ਮੈਰਿਜ ਕਰਵਾਉਣ ਤੋਂ ਬਾਅਦ ਦੀ ਨਰੇਸ਼ ਨੇ ਉਸ ਤੋਂ ਚੋਰੀ ਤੀਜਾ ਵਿਆਹ ਕਰਵਾਇਆ। ਦੂਜੇ ਪਾਸੇ ਨਰੇਸ਼ ਦਾ ਕਹਿਣਾ ਹੈ ਕਿ ਪਹਿਲੇ ਵਿਆਹ ਦੇ ਤਲਾਕ ਤੋਂ ਬਾਅਦ ਉਸ ਨੇ ਲਵ ਮੈਰਿਜ ਕਰਵਾਈ ਸੀ । ਉਸ ਦੀ ਦੂਜੀ ਪਤਨੀ ਉਸ ਨੂੰ ਤੰਗ ਪਰੇਸ਼ਾਨ ਕਰਕੇ ਅਤੇ ਬਲੈਕਮੇਲ ਕਰਕੇ ਉਸ ਤੋਂ ਪੈਸੇ ਵਸੂਲ ਕਰਦੀ ਆ ਰਹੀ ਹੈ ਜਿਸ ਤੋਂ ਬਾਅਦ ਉਸ ਨੇ ਆਪਣੇ ਪਰਿਵਾਰ ਦੀ ਸਹਿਮਤੀ ਨਾਲ ਦੂਜਾ ਵਿਆਹ ਕਰਵਾਇਆ ਹੈ । ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅੰਮ੍ਰਿਤਸਰ ਦੇ ਮਹਿਲਾ ਥਾਣੇ ਵਿੱਚ ਸਾਰੀਆਂ ਧਿਰਾਂ ਨੂੰ ਬੁਲਾ ਕੇ ਅਗਲੇਰੀ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।
