ਗੰਜੇ ਦੇ ਸਿਰ ‘ਤੇ ਕੰਘਾ ਫੇਰਨ ਦੀ ਨੀਤੀ ‘ਤੇ ਚੱਲ ਰਿਹੈ ਸਿਹਤ ਵਿਭਾਗ.. ਆਈਸਕ੍ਰੀਮ/ਕੁਲਫੀਆਂ ਦੇ ਭਰੇ ਸੈਂਪਲ

ਬਰਨਾਲਾ 30 ਜੂਨ ( ਨਿਰਮਲ ਸਿੰਘ ਪੰਡੋਰੀ )-ਖਾਣ-ਪੀਣ ਦੇ ਪਦਾਰਥਾਂ ਵਿੱਚ ਮਿਲਾਵਟ ਦੀਆਂ ਚਰਚਾਵਾਂ ਦੇ ਮੱਦੇਨਜ਼ਰ ਬਰਨਾਲਾ ਦੇ ਸਿਹਤ ਵਿਭਾਗ ਦੀ ਟੀਮ ਵੱਲੋਂ ਸੈਂਪਲ ਇਕੱਠੇ ਕੀਤੇ ਗਏ । ਜ਼ਿਲ੍ਹਾ ਸਿਹਤ ਅਫ਼ਸਰ ਡਾਕਟਰ ਜਸਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਫੂਡ ਸੇਫਟੀ ਟੀਮ ਨੇ ਬਰਨਾਲਾ ਦੇ ਵੱਖ-ਵੱਖ ਬਜਾਰਾਂ ‘ਚ ਸੈਂਪਲ ਭਰੇ । ਫੂਡ ਸੇਫਟੀ ਅਫਸਰ ਸੀਮਾ ਰਾਣੀ ਅਤੇ ਹਰਿੰਦਰਜੀਤ ਸਿੰਘ ਵੱਲੋਂ ਗਰਮੀ ਦੇ ਮੌਸਮ ਦੇ ਮੱਦੇਨਜ਼ਰ ਸਪੈਸ਼ਲ ਮੁਹਿੰਮ ਤਹਿਤ ਆਈਸਕ੍ਰੀਮ/ਕੁਲਫੀਆਂ ਦੇ 8 ਅਤੇ ਦੇਸੀ ਘਿਉ ਦੇ 3 ਸੈਂਪਲਾਂ ਸਮੇਤ ਕੁੱਲ 11 ਸੈਂਪਲ ਭਰੇ ਗਏ ਹਨ । ਫੂਡ ਸੇਫਟੀ ਅਫ਼ਸਰ ਨੇ ਦੱਸਿਆ ਕਿ ਇਨ੍ਹਾਂ ਸੈਂਪਲਾਂ ਨੂੰ ਲੈਬਾਰਟਰੀ ਵਿੱਚ ਭੇਜਿਆ ਜਾਵੇਗਾ ਅਤੇ ਜੇਕਰ ਜਾਂਚ ਤੋਂ ਬਾਅਦ ਸੈਂਪਲ ਫੇਲ ਹੋ ਜਾਂਦੇ ਹਨ ਤਾਂ ਸਬੰਧਤ ਧਿਰਾਂ ਖ਼ਿਲਾਫ਼ ਫੂਡ ਸੇਫਟੀ ਐਕਟ ਤਹਿਤ ਕਾਰਵਾਈ ਕੀਤੀ ਜਾਵੇਗੀ । ਸਿਹਤ ਵਿਭਾਗ ਦੀ ਟੀਮ ਵੱਲੋਂ ਆਇਸਕ੍ਰੀਮ ਅਤੇ ਕੁਲਫੀਆਂ ਦੇ ਸੈਂਪਲ ਭਰਨ ਦੀ ਸ਼ਹਿਰ ਵਿਚ ਚਰਚਾ ਹੋ ਰਹੀ ਹੈ, ਜਦ ਕਿ ਹੋਰ ਬਹੁਤ ਸਾਰੇ ਖਾਧ-ਪਦਾਰਥ ਹਨ ਜਿਨ੍ਹਾਂ ਵਿਚ ਮਿਲਾਵਟ ਹੋਣ ਸਬੰਧੀ ਲੋਕ ਸੋਸ਼ਲ ਮੀਡੀਆ ‘ਤੇ ਚਰਚਾ ਕਰਦੇ ਰਹਿੰਦੇ ਹਨ । ਭਾਵੇਂ ਕਿ ਇਹ ਸਿਹਤ ਵਿਭਾਗ ਦੇ ਅਧਿਕਾਰ ਖੇਤਰ ਵਿੱਚ ਹੈ ਕਿ ਕਿਸ ਚੀਜ਼ ਦਾ ਸੈਂਪਲ ਭਰਨਾ ਹੈ ਪ੍ਰੰਤੂ ਰੋਜ਼ਾਨਾ ਜ਼ਿਆਦਾ ਖਾਣ ਅਤੇ ਪੀਣ ਵਾਲੇ ਪਦਾਰਥਾਂ ਨੂੰ ਛੱਡ ਕੇ ਸਿਰਫ ਆਇਸ ਕਰੀਮ ਅਤੇ ਕੁਲਫੀਆਂ ਦੇ ਸੈਂਪਲ ਭਰੇ ਜਾਣ ‘ਤੇ ਸਵਾਲ ਖੜ੍ਹੇ ਹੁੰਦੇ ਹਨ ਕਿ ਆਖ਼ਰ ਘਰਾਂ ਵਿਚ ਜ਼ਿਆਦਾ ਮਿਕਦਾਰ ਵਿੱਚ ਵਰਤੇ ਜਾਂਦੇ ਖਾਧ ਪਦਾਰਥਾਂ ਨੂੰ ਛੱਡ ਕੇ ਆਇਸ ਕਰੀਮ ਅਤੇ ਕੁਲਫੀਆਂ ਦੇ ਸੈਂਪਲ ਭਰ ਕੇ ਕਿਹੜੀ ਡਿਊਟੀ ਪੂਰੀ ਕੀਤੀ ਗਈ ਹੈ । ਜ਼ਿਕਰਯੋਗ ਹੈ ਕਿ ਸੋਸ਼ਲ ਮੀਡੀਆ ‘ਤੇ ਲੋਕਾਂ ਵੱਲੋਂ ਦੁੱਧ ਦੀਆਂ ਡੈਅਰੀਆਂ ‘ਤੇ ਵਰਤੇ ਜਾਂਦੇ ਦੁੱਧ ਤੋਂ ਬਣਨ ਵਾਲੇ ਪਦਾਰਥਾਂ ‘ਚ ਮਿਲਾਵਟ ਸੰਬੰਧੀ ਪੋਸਟਾਂ ਅਕਸਰ ਵਾਇਰਲ ਕੀਤੀਆਂ ਜਾ ਰਹੀਆਂ ਹਨ । ਬਰਨਾਲਾ ਸ਼ਹਿਰ ਵਿੱਚ ਦੁੱਧ ਦੀਆਂ ਡੈਅਰੀਆਂ ਦੀ ਗਿਣਤੀ ‘ਤੇ ਵੀ ਅਕਸਰ ਸਵਾਲ ਉੱਠਦੇ ਰਹੇ ਹਨ ਪ੍ਰੰਤੂ ਇਹ ਕਦੇ ਵੀ ਸਾਹਮਣੇ ਨਹੀਂ ਆਇਆ ਕਿ ਸਿਹਤ ਵਿਭਾਗ ਦੀ ਟੀਮ ਨੇ ਵੱਡੇ ਪੱਧਰ ‘ਤੇ ਇਸ ਖੇਤਰ ਦੀ ਚੈਕਿੰਗ ਕੀਤੀ ਹੋਵੇ ਅਤੇ ਦੁੱਧ ਤੋਂ ਬਣਨ ਵਾਲੇ ਪਦਾਰਥਾਂ ਅਤੇ ਦੁੱਧ ਦੇ ਸੈਂਪਲ ਭਰੇ ਹੋਣ, ਜਦਕਿ ਸਿਹਤ ਵਿਭਾਗ ਦੀ ਟੀਮ ਬਾਖ਼ੂਬੀ ਜਾਣਦੀ ਹੈ ਕਿ ਆਈਸਕਰੀਮ ਅਤੇ ਕੁਲਫੀਆਂ ਵੀ ਦੁੱਧ ਤੋਂ ਹੀ ਤਿਆਰ ਕੀਤੀਆਂ ਜਾਂਦੀਆਂ ਹਨ । ਇਹ ਕੋਈ ਅਤਿਕਥਨੀ ਨਹੀਂ ਕਿ ਸਿਹਤ ਵਿਭਾਗ ਦੀ ਟੀਮ ਮਰ ਰਹੇ ਪੌਦਿਆਂ ਦੀਆਂ ਜੜਾਂ ‘ਚ ਦਵਾਈ ਪਾਉਣ ਦੀ ਬਜਾਏ ਪੱਤਿਆਂ ‘ਤੇ ਸਪਰੇ ਕਰਨ ਦੀ ਨੀਤੀ ਉਤੇ ਚੱਲ ਕੇ “ਬੁੱਤਾ” ਰਹੀ ਹੈ..ਜਦਕਿ ਇਹ ਵੀ ਇੱਕ ਕੌੜੀ ਸੱਚਾਈ ਹੈ ਕਿ ਗੰਜੇ ਦੇ ਸਿਰ ‘ਤੇ ਕੰਘਾ ਫੇਰਨ ਨਾਲ ਵਾਲ ਨਹੀਂ ਉੱਗਦੇ। ਸਵਾਲ ਇਹ ਵੀ ਖੜਾ ਹੈ ਕਿ ਜੇਕਰ ਆਈਸਕਰੀਮ ਅਤੇ ਕੁਲਫੀਆਂ ਦੇ ਸੈਂਪਲ ਫੇਲ ਹੋ ਜਾਂਦੇ ਹਨ ਤਾਂ ਕੀ ਸਿਹਤ ਵਿਭਾਗ ਦੀ ਟੀਮ ਇਨ੍ਹਾਂ ਨੂੰ ਬਣਾਉਣ ਲਈ ਵਰਤੇ ਜਾਂਦੇ ਤਰਲ ਪਦਾਰਥਾਂ ਦੇ ਟਿਕਾਣੇ ਤੱਕ ਪੁੱਜੇਗੀ ।