-ਕੇਂਦਰ ਨੇ ਸ਼ੁਰੂ ਕੀਤੀ “ਗਰੀਬ ਕੈਦੀਆਂ ਦਾ ਸਮਰਥਨ” ਯੋਜਨਾ
ਬਰਨਾਲਾ 8 ਅਪ੍ਰੈਲ ( ਨਿਰਮਲ ਸਿੰਘ ਪੰਡੋਰੀ )-
ਕੇਂਦਰ ਸਰਕਾਰ ਨੇ ਆਰਥਿਕ ਤੌਰ ‘ਤੇ ਕਮਜ਼ੋਰ ਕੈਦੀਆਂ ਲਈ ਅਹਿਮ ਐਲਾਨ ਕੀਤਾ ਹੈ । ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਅਜਿਹੇ ਕੈਦੀਆਂ ਲਈ ਇੱਕ ਯੋਜਨਾ ਤਿਆਰ ਕੀਤੀ ਹੈ ਜੋ ਆਰਥਿਕ ਕਮਜ਼ੋਰੀ ਕਾਰਨ ਸਜ਼ਾ ਦੇ ਨਾਲ ਹੋਏ ਜ਼ੁਰਮਾਨੇ ਦੀ ਰਕਮ ਨਹੀਂ ਭਰ ਸਕਦੇ ਅਤੇ ਉਨ੍ਹਾਂ ਨੂੰ ਵਾਧੂ ਸਮਾਂ ਜੇਲ੍ਹ ਵਿੱਚ ਕੱਟਣਾ ਪੈਂਦਾ ਹੈ । ਕੇਂਦਰ ਹੁਣ ਅਜਿਹੇ ਕੈਦੀਆਂ ਨੂੰ ਵਿੱਤੀ ਸਹਾਇਤਾ ਦੇਵੇਗਾ ਜੋ ਗਰੀਬੀ ਕਾਰਨ ਆਪਣੀ ਜ਼ੁਰਮਾਨੇ ਦੀ ਰਕਮ ਨਹੀਂ ਭਰ ਸਕਦੇ । ਦੇਸ਼ ਦੀਆਂ ਜੇਲਾਂ ਵਿਚ ਭੀੜ ਘੱਟ ਕਰਨ ਦੀ ਮਨਸ਼ਾ ਨਾਲ ਕੇਂਦਰ ਨੇ ਇਹ ਯੋਜਨਾ ਤਿਆਰ ਕੀਤੀ ਹੈ । ਇਸ ਯੋਜਨਾ ਤਹਿਤ ਲਾਭ ਲੈਣ ਵਾਲੇ ਕੈਦੀਆਂ ਦੀ ਪਹਿਚਾਣ ਲਈ ਈ-ਸਿਸਟਮ ਨੂੰ ਮਜ਼ਬੂਤ ਕੀਤਾ ਜਾਵੇਗਾ, ਜ਼ਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਦੀ ਭੂਮਿਕਾ ਨੂੰ ਅਹਿਮ ਬਣਾਇਆ ਜਾਵੇਗਾ ਅਤੇ ਤਕਨਾਲੋਜੀ ਅਧਾਰਿਤ ਸਿਸਟਮ ਨਾਲ ਅਜਿਹੇ ਕੈਦੀਆਂ ਦੀ ਪਹਿਚਾਣ ਕੀਤੀ ਜਾਵੇਗੀ । ਗੌਰਤਲਬ ਹੈ ਕਿ ਜ਼ੁਰਮਾਨੇ ਦੀ ਰਾਸ਼ੀ ਜਾਂ ਜਮਾਨਤ ਰਾਸ਼ੀ ਨਾ ਭਰਨ ਵਾਲੇ ਆਰਥਿਕ ਤੌਰ ‘ਤੇ ਕਮਜ਼ੋਰ ਕੈਦੀਆਂ ਦੀ ਵਿੱਤੀ ਮਦਦ ਦਾ ਐਲਾਨ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਇਸ ਸਾਲ ਦੇ ਬਜ਼ਟ ਵਿੱਚ ਵੀ ਕੀਤਾ ਸੀ । ਸਰਕਾਰ ਨੇ ਆਪਣੀ ਇਸ ਯੋਜਨਾ ਨੂੰ “ਗਰੀਬ ਕੈਦੀਆਂ ਦਾ ਸਮਰਥਨ” ਦਾ ਨਾਮ ਦਿੱਤਾ ਹੈ ।
