ਚੰਡੀਗੜ੍ਹ,19 ਜੂਨ, Gee98 news service
-ਪੰਜਾਬ ਸਰਕਾਰ ਨੇ ਆਪਣੇ ਫੈਸਲਿਆਂ ਤੇ “ਯੂ ਟਰਨ” ਲੈਣ ਦੀ ਲੜੀ ਵਿੱਚ ਇੱਕ ਅੰਕ ਦਾ ਹੋਰ ਵਾਧਾ ਕਰ ਲਿਆ ਹੈ। ਸਰਕਾਰ ਨੇ ਨਹਿਰੀ ਪਟਵਾਰੀਆਂ ਦੀ ਜਥੇਬੰਦੀ ਦੇ ਸੂਬਾ ਪ੍ਰਧਾਨ ਜਸਕਰਨ ਸਿੰਘ ਗਹਿਰੀ ਬੁੱਟਰ ਦੀ ਮੁਅੱਤਲੀ ਨੂੰ ਰੱਦ ਕਰ ਦਿੱਤਾ ਹੈ। ਦੱਸ ਦੇਈਏ ਕਿ ਜਲ ਸਰੋਤ ਵਿਭਾਗ ਵੱਲੋਂ ਨਹਿਰੀ ਪਾਣੀ ਟੇਲਾਂ ਤੱਕ ਪਹੁੰਚਾਉਣ ਸਬੰਧੀ 100 ਫੀਸਦੀ ਅੰਕੜੇ ਤਿਆਰ ਕਰਨ ਦਾ ਦਬਾਅ ਨਹਿਰੀ ਪਟਵਾਰੀਆਂ ਉੱਪਰ ਪਾਇਆ ਗਿਆ ਸੀ ਜਿਸ ਨੂੰ ਨਹਿਰੀ ਪਟਵਾਰੀਆਂ ਨੇ ਨਾ ਮੰਨਦੇ ਹੋਏ ਫਰਜ਼ੀ ਅੰਕੜੇ ਤਿਆਰ ਕਰਨ ਤੋਂ ਨਾਂਹ ਕਰ ਦਿੱਤੀ ਸੀ,। ਇਸ ਮਾਮਲੇ ‘ਚ ਨਹਿਰੀ ਪਟਵਾਰੀਆਂ ਦੀ ਜਥੇਬੰਦੀ ਦੇ ਸੂਬਾ ਪ੍ਰਧਾਨ ਜਸਕਰਨ ਸਿੰਘ ਨੇ ਪਟਵਾਰੀਆਂ ਦੇ ਹੱਕ ਵਿੱਚ ਸਖਤ ਸਟੈਂਡ ਲਿਆ ਜਿਸ ਤੋਂ ਬਾਅਦ ਸਰਕਾਰ ਨੇ ਜਸਕਰਨ ਸਿੰਘ ਨੂੰ ਮੁਅਤਲ ਕਰਕੇ ਉਨ੍ਹਾਂ ਦਾ ਹੈੱਡਕੁਆਰਟਰ ਮੁੱਖ ਇੰਜੀਨੀਅਰ/ਡੈਮਜ਼ ਸ਼ਾਹਪੁਰਕੰਡੀ ਟਾਊਨਸ਼ਿਪ (ਪਠਾਨਕੋਟ) ਕਰ ਦਿੱਤਾ ਗਿਆ ਸੀ। ਨਹਿਰੀ ਪਟਵਾਰੀਆਂ ਵੱਲੋਂ ਫਰਜ਼ੀ ਅੰਕੜੇ ਤਿਆਰ ਕਰਨ ਤੋਂ ਜਵਾਬ ਦੇਣ ਤੋਂ ਬਾਅਦ ਬਾਅਦ ਤੈਸ਼ ‘ਚ ਆਏ ਪ੍ਰਮੁੱਖ ਸਕੱਤਰ ਵਲੋਂ ਦੋ ਸੌ ਤੋਂ ਵੱਧ ਨਹਿਰੀ ਪਟਵਾਰੀਆਂ ਨੂੰ ਚਾਰਜਸ਼ੀਟ ਕਰਨ ਤੋਂ ਇਲਾਵਾ ਉਨ੍ਹਾਂ ਦੇ ਹੱਕ ‘ਚ ਡੱਟਣ ਵਾਲੇ ਨਹਿਰੀ ਪਟਵਾਰ ਯੂਨੀਅਨ ਦੇ ਸੂਬਾ ਪ੍ਰਧਾਨ ਜਸਕਰਨ ਸਿੰਘ ਗਹਿਰੀ ਬੁੱਟਰ ਨੂੰ ਮੁਅੱਤਲ ਕਰਕੇ ਬਠਿੰਡਾ ਤੋਂ ਸ਼ਾਹਪੁਰਕੰਡੀ (ਪਠਾਨਕੋਟ) ਭੇਜ ਦਿੱਤਾ ਗਿਆ ਸੀ | ਜਦਕਿ ਬਾਅਦ ‘ਚ ਸੂਬਾ ਪ੍ਰਧਾਨ ਵਿਰੁੱਧ 3 ਅਤੇ ਸੂਬਾ ਜਨਰਲ ਸਕੱਤਰ ਬਲਕਾਰ ਸਿੰਘ, ਸੀਨੀਅਰ ਮੀਤ ਪ੍ਰਧਾਨ ਅਵਤਾਰ ਸਿੰਘ ਮਾਨਸਾ ਤੇ ਕੁਲਦੀਪ ਕੁਮਾਰ ਮਸਤਾਨਾ ਦੇ ਖ਼ਿਲਾਫ਼ 1-1 ਚਾਰਜਸ਼ੀਟ ਵੀ ਦਾਖਲ ਕਰ ਦਿੱਤੀ ਗਈ ਸੀ | ਇਸ ਰੋਸ ਵਜੋਂ ਨਹਿਰੀ ਪਟਵਾਰੀਆਂ ਨੇ ਪ੍ਰਮੁੱਖ ਸਕੱਤਰ ਦੇ ਖ਼ਿਲਾਫ਼ ਮੋਰਚਾ ਖੋਲ੍ਹਦਿਆਂ ਪੰਜਾਬ ਸਰਕਾਰ ਦੇ ਨਹਿਰੀ ਪਾਣੀ ਟੇਲਾਂ ਤੱਕ ਪਹੁੰਚਾਉਣ ਦੇ ਕੱਚੇ-ਚਿੱਠੇ ਲੋਕਾਂ ਸਾਹਮਣੇ ਫਰੋਲਣੇ ਸ਼ੁਰੂ ਕਰ ਦਿੱਤੇ ਸਨ ਤੇ ਬੀਤੇ ਕੱਲ੍ਹ ਮੁੱਖ ਮੰਤਰੀ ਦੇ ਜੱਦੀ ਹਲਕੇ ਧੂਰੀ ‘ਚ ਮੁਲਾਜ਼ਮ, ਕਿਸਾਨ-ਮਜ਼ਦੂਰ ਤੇ ਇਨਸਾਫ਼ ਪਸੰਦ ਜਥੇਬੰਦੀਆਂ ਦੇ ਸਹਿਯੋਗ ਨਾਲ ਵਿਸ਼ਾਲ ਰੋਸ ਪ੍ਰਦਰਸ਼ਨ ਕੀਤਾ ਸੀ, ਜਿਸ ਤੋਂ ਘਬਰਾਈ ਪੰਜਾਬ ਸਰਕਾਰ ਨੇ ਆਪਣੇ ਪਹਿਲੇ ਫੈਸਲੇ ਤੋਂ ਯੂ ਟਰਨ ਲੈਂਦੇ ਹੋਏ ਕਰੀਬ 40 ਦਿਨਾਂ ਬਾਅਦ ਨਹਿਰੀ ਪਟਵਾਰੀਆਂ ਦੇ ਸੂਬਾ ਪ੍ਰਧਾਨ ਜਸਕਰਨ ਸਿੰਘ ਨੂੰ ਤੁਰੰਤ ਬਹਾਲ ਕਰਨ ‘ਚ ਹੀ ਆਪਣੀ ਭਲਾਈ ਸਮਝੀ ਹੈ |
Menu
