ਬਰਨਾਲਾ,21 ਜੂਨ (ਨਿਰਮਲ ਸਿੰਘ ਪੰਡੋਰੀ)-
-ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਉੱਪਰ ਅਕਸਰ ਗੋਲਕ ਦੇ ਪੈਸੇ ਦੀ ਦੁਰਵਰਤੋਂ ਦੇ ਦੋਸ਼ ਲੱਗਦੇ ਰਹਿੰਦੇ ਹਨ। ਇਹ ਇੱਕ ਵਾਰ ਨਹੀਂ ਸਗੋਂ ਅਨੇਕਾਂ ਵਾਰ ਅਜਿਹੇ ਮਾਮਲੇ ਸਾਹਮਣੇ ਆਏ ਹਨ ਜਿਨਾਂ ਵਿੱਚ ਸ਼੍ਰੋਮਣੀ ਕਮੇਟੀ ਵੱਲੋਂ ਸੰਗਤਾਂ ਦੇ ਚੜਾਵੇ ਦੇ ਰੂਪ ਵਿੱਚ ਆਏ ਪੈਸੇ ਦੀ ਵਰਤੋਂ ਦੇ ਤੌਰ ਤਰੀਕੇ ‘ਤੇ ਸਵਾਲ ਉੱਠਦੇ ਰਹੇ ਹਨ। ਅਜਿਹਾ ਹੀ ਇੱਕ ਮਾਮਲਾ ਅੱਜਕੱਲ੍ਹ ਬਰਨਾਲਾ ਵਿਖੇ ਰੌਸ਼ਨੀ ਵਿੱਚ ਹੈ ਜਿੱਥੇ ਸ਼੍ਰੋਮਣੀ ਕਮੇਟੀ ਦੇ ਪ੍ਰਬੰਧਾਂ ਅਧੀਨ ਗੁਰਦੁਆਰਾ ਬਾਬਾ ਗਾਂਧਾ ਸਿੰਘ ਅਤੇ ਡੇਰਾ ਬਾਬਾ ਗਾਂਧਾ ਸਿੰਘ ਵਿਚਕਾਰ ਜਾਇਦਾਦ ਦੇ ਵਿਵਾਦ ਦੌਰਾਨ ਸਾਲ 2023 ‘ਚ ਹੋਂਦ ਵਿੱਚ ਆਈ ਇੱਕ ਕਮੇਟੀ ਨੂੰ ਲੱਖਾਂ ਰੁਪਏ ਦੇ ਚੈੱਕ ਬਿਨਾਂ ਤਾਰੀਕ ਤੋਂ ਦਿੱਤੇ ਗਏ ਹਨ। ਗੁਰਦੁਆਰਾ ਬਾਬਾ ਗਾਂਧਾ ਸਿੰਘ ਜੀ ਬਰਨਾਲਾ ਦੇ ਮੈਨੇਜਰ ਵੱਲੋਂ ਐਚਡੀਐਫਸੀ ਬੈਂਕ ਦੇ ਖਾਤਾ ਨੰਬਰ 50100646695487 ਵਿੱਚੋਂ ਦੋ ਚੈੱਕ ਕੱਟੇ ਗਏ ਹਨ ਜਿਨਾਂ ਵਿੱਚੋਂ ਇੱਕ ਚੈੱਕ ਨੰਬਰ 000108 ਕੁੱਲ 45 ਲੱਖ 43 ਹਜ਼ਾਰ 750 ਰੁਪਏ ਦਾ ਹੈ ਅਤੇ ਦੂਜਾ ਚੈੱਕ ਨੰਬਰ 000109 ਕੁੱਲ 23 ਲੱਖ 83 ਹਜ਼ਾਰ 562 ਰੁਪਏ ਦਾ ਹੈ। ਇਹ ਦੋਵੇਂ ਚੈੱਕ ਡੇਰਾ ਬਾਬਾ ਗਾਂਧਾ ਸਿੰਘ ਨਿਰਮਲ ਭੇਖ ਪ੍ਰਬੰਧਕ ਕਮੇਟੀ ਬਰਨਾਲਾ ਦੇ ਨਾਮ ‘ਤੇ ਕੱਟੇ ਗਏ ਹਨ। ਧਿਆਨਦੇਣ ਯੋਗ ਹੈ ਕਿ ਦੋਵੇਂ ਚੈੱਕਾ ਉੱਪਰ ਕੋਈ ਤਾਰੀਕ ਦਰਜ ਨਹੀਂ ਹੈ, ਜਿਸ ‘ਤੇ ਸਵਾਲ ਉੱਠ ਰਹੇ ਹਨ। ਕੋਈ ਵਿਅਕਤੀ ਆਪਣੀ ਨਿੱਜੀ ਕਮਾਈ ਵਿੱਚੋਂ ਕਿਸੇ ਦੂਸਰੇ ਵਿਅਕਤੀ ਜਾਂ ਸੰਸਥਾ ਨੂੰ ਬਿਨਾਂ ਤਾਰੀਕ ਤੋਂ ਚੈੱਕ ਕੱਟ ਕੇ ਦੇ ਦੇਵੇ ਜਾਂ ਖਾਲੀ ਚੈੱਕ ਕੱਟ ਕੇ ਦੇ ਦੇਵੇ ਇਹ ਇੱਕ ਵੱਖਰਾ ਮਾਮਲਾ ਹੈ ਪਰੰਤੂ ਜਿਹੜੀ ਸੰਸਥਾ ਗੁਰਦੁਆਰਿਆਂ ਦੇ ਪ੍ਰਬੰਧ, ਸਾਂਭ ਸੰਭਾਲ ਸਬੰਧੀ ਹੋਂਦ ਵਿੱਚ ਆਈ ਅਤੇ ਲੋਕ ਗੁਰੂ ਘਰ ਨਤਮਸਤਕ ਹੋਣ ਸਮੇਂ ਸ਼ਰਧਾ ਵਜੋਂ ਮਾਇਆ ਭੇਟ ਕਰਦੇ ਹਨ, ਇਸੇ ਪੈਸੇ ਨਾਲ ਸ਼੍ਰੋਮਣੀ ਕਮੇਟੀ ਵੱਲੋਂ ਗੁਰੂ ਘਰਾਂ ਦੀ ਸਾਂਭ ਸੰਭਾਲ, ਪ੍ਰਬੰਧ ਅਤੇ ਵਿਦਿਅਕ ਸੰਸਥਾਵਾਂ ਸਮੇਤ ਹੋਰ ਸੰਸਥਾਵਾਂ ਦੇ ਪ੍ਰਬੰਧ ਕੀਤੇ ਜਾਂਦੇ ਹਨ, ਜੇਕਰ ਅਜਿਹੀ ਸੰਸਥਾ ਦੇ ਵਿੱਤੀ ਲੈਣ ਦੇਣ ਵਿੱਚ ਗੜਬੜ ਦੇ ਸਵਾਲ ਉਠਦੇ ਹਨ ਤਾਂ ਸਾਰੀ ਦਾਲ ਹੀ ਕਾਲੀ ਮੰਨੀ ਜਾ ਸਕਦੀ ਹੈ।
ਜੇਕਰ ਲੋਕਾਂ ਵੱਲੋਂ ਸ਼ਰਧਾ ਸਮੇਤ ਦਿੱਤੇ ਗਏ ਪੈਸੇ ਦੀ ਵਰਤੋਂ ‘ਤੇ ਸਵਾਲ ਉੱਠਣਗੇ ਤਾਂ ਸ਼੍ਰੋਮਣੀ ਕਮੇਟੀ ਦੇ ਇਹਨਾਂ ਗੁਰੂ ਘਰਾਂ ਵਿੱਚ ਬੈਠੇ ਲੰਬੜਦਾਰ ਹੀ ਨਹੀਂ ਸਗੋਂ ਚੁਣੇ ਗਏ ਲੰਬੜਦਾਰ ਵੀ ਜਵਾਬਦੇਹ ਹਨ ਪ੍ਰੰਤੂ ਇਹ ਹੈਰਾਨੀ ਦੀ ਗੱਲ ਹੈ ਕਿ ਲੱਖਾਂ ਰੁਪਏ ਦੇ ਚੈੱਕ ਬਿਨਾਂ ਤਾਰੀਕ ਤੋਂ ਕੱਟਣ ਦੇ ਮਾਮਲੇ ਵਿੱਚ ਕਾਫੀ ਸਮੇਂ ਤੋਂ ਸਵਾਲ ਉਠੇ ਰਹੇ ਹਨ ਜਿਸ ਉੱਪਰ ਬਰਨਾਲਾ ਜ਼ਿਲ੍ਹੇ ਨਾਲ ਸਬੰਧਿਤ ਕੋਈ ਵੀ ਸ਼੍ਰੋਮਣੀ ਕਮੇਟੀ ਮੈਂਬਰ ਜਵਾਬ ਦੇਣ ਲਈ ਸਾਹਮਣੇ ਨਹੀਂ ਆ ਰਿਹਾ। ਜਿਸ ਤਰ੍ਹਾਂ ਸਵਾਲ ਚੁੱਕਣ ਵਾਲਿਆਂ ਵੱਲੋਂ ਮੀਡੀਆ ਨੂੰ ਇਕੱਠੇ ਕਰਕੇ ਬਕਾਇਦਾ ਪ੍ਰੈਸ ਕਾਨਫਰੰਸ ਕਰਕੇ ਦੋਸ਼ ਲਗਾਏ ਜਾ ਰਹੇ ਹਨ ਤਾਂ ਕੀ ਕਾਰਨ ਹੈ ਕਿ ਬਰਨਾਲੇ ਜ਼ਿਲ੍ਹੇ ਨਾਲ ਸੰਬੰਧਿਤ ਸ਼੍ਰੋਮਣੀ ਕਮੇਟੀ ਮੈਂਬਰ ਜਿਨਾਂ ਦੀ ਨਿਗਰਾਨੀ ਹੇਠ ਇਥੋਂ ਦੇ ਗੁਰੂ ਘਰਾਂ ਦਾ ਪ੍ਰਬੰਧ ਚਲਾਇਆ ਜਾ ਰਿਹਾ ਹੈ ਉਹ ਮੀਡੀਆ ਸਾਹਮਣੇ ਆ ਕੇ ਇਹਨਾਂ ਦੋਸ਼ਾਂ ਦਾ ਜਵਾਬ ਕਿਉਂ ਨਹੀਂ ਦਿੰਦੇ। ਚਰਚਾ ਤਾਂ ਇਹ ਵੀ ਹੈ ਕਿ “ਚੋਰ ਤੇ ਲਾਠੀ ਦੋ ਜਣੇ,ਮੈਂ ਤੇ ਬਾਪੂ ਕੱਲੇ’ ਦੀ ਕਹਾਵਤ ਅਨੁਸਾਰ ਇਸ ਮਾਮਲੇ ਨੂੰ ਆਪਣੇ ਅਹੁਦਿਆਂ ਦੇ ਜ਼ੋਰ ‘ਤੇ ਦੱਬਣ ਦੇ ਯਤਨ ਕੀਤੇ ਜਾ ਰਹੇ ਹਨ ਪ੍ਰੰਤੂ ਹੁਣ ਜਦੋਂ ਮਾਮਲਾ ਮੀਡੀਆ ਰਾਹੀਂ ਰੌਸ਼ਨੀ ਵਿੱਚ ਆ ਹੀ ਗਿਆ ਹੈ ਤਾਂ ਸੰਗਤ 70 ਲੱਖ ਦੇ ਕਰੀਬ ਕੱਟੇ ਗਏ ਇਹਨਾਂ ਚੈੱਕਾ ਦੀ ਤਾਰੀਕ ਜਾਨਣ ਦੀ ਹੱਕਦਾਰ ਕਿਉਂ ਨਹੀਂ ਹੈ। ਬਰਨਾਲਾ ਜ਼ਿਲ੍ਹੇ ਨਾਲ ਸੰਬੰਧਿਤ ਸ਼੍ਰੋਮਣੀ ਕਮੇਟੀ ਮੈਂਬਰਾਂ ਦੀ ਚੁੱਪ ‘ਤੇ ਉੱਠ ਰਹੇ ਸਵਾਲ ਵੀ ਵਾਜਿਬ ਹਨ ਕਿਉਂਕਿ ਸ਼੍ਰੋਮਣੀ ਕਮੇਟੀ ਦਾ ਇੱਕ ਮੁਲਾਜ਼ਮ ਆਪਣੇ ਪੱਧਰ ‘ਤੇ ਇਸ ਤਰ੍ਹਾਂ ਦੇ ਵੱਡੇ ਫੈਸਲੇ ਨਹੀਂ ਲੈ ਸਕਦਾ। ਹੁਣ ਇਹ ਤਾਂ ਮੰਨਿਆ ਨਹੀਂ ਜਾ ਸਕਦਾ ਕਿ ਸ਼੍ਰੋਮਣੀ ਕਮੇਟੀ ਮੈਂਬਰਾਂ ਨੂੰ ਇਸ ਸਾਰੇ ਮਾਮਲੇ ਦੀ ਜਾਣਕਾਰੀ ਨਹੀਂ ਹੋਵੇਗੀ ਫਿਰ ਵੀ ਸ਼੍ਰੋਮਣੀ ਕਮੇਟੀ ਮੈਂਬਰਾਂ ਦੀ ਚੁੱਪ ਦੇ ਪਿਛਲੀ ਕਹਾਣੀ ਅਦਾਰਾ Gee98 news ਵੱਲੋਂ ਪਾਠਕਾਂ ਨਾਲ ਸਾਂਝੀ ਕਰਨ ਦੇ ਯਤਨ ਕੀਤੇ ਜਾਣਗੇ।
