ਕੌੜਤੂਬਾ ਭਾਗ -2 : ਪੁਲਿਸ ਦੇ ਸਿਕੰਜੇ ’ਚ ਬਲੈਕਮੇਲਿੰਗ ਦਾ ਗੋਰਖ਼ ਧੰਦਾ ਕਰਨ ਵਾਲੀ ਤਿੱਕੜੀ
ਬਰਨਾਲਾ, 27 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬ ਦੀ ਸਿਆਸੀ, ਪ੍ਰਸਾਸ਼ਨਿਕ ਫ਼ਿਜ਼ਾ ਵਿੱਚ ਬਦਲਾਅ ਦੇ ਵਾਅਦੇ ਨਾਲ ਸੱਤਾ ’ਚ ਆਈ ਆਮ ਆਦਮੀ ਪਾਰਟੀ ਨੇ ਪੰਜਾਬ ’ਚ ਲੋਕਤੰਤਰ ਦੇ ਚੌਥੇ ਥੰਮ ਮੀਡੀਆ ਦੇ ਕਾਰਜਖੇਤਰ ਸੰਬੰਧੀ ਬਦਲਾਅ ਦੇ ਸਬੂਤ ਵਜੋਂ ਪੱਤਰਕਾਰਤਾ ਦੇ ਨਾਮ ’ਤੇ ਬਲੈਕਮੇਲਿੰਗ ਦਾ ਗੋਰਖ਼ ਧੰਦਾ ਕਰਨ ਵਾਲੇ ਅਖੌਤੀ ਪੱਤਰਕਾਰਾਂ ਨੂੰ ਨੱਥ ਪਾਉਣੀ ਸ਼ੁਰੂ ਕਰ ਦਿੱਤੀ ਹੈ ਜਿਸ ਦਾ ਆਮ ਲੋਕਾਂ ਵੱਲੋਂ ਸਵਾਗਤ ਕੀਤਾ ਜਾ ਰਿਹਾ ਹੈ। ਸੰਗਰੂਰ ਜ਼ਿਲ੍ਹੇ ਦੇ ਸਨਾਮ ਤੋਂ ਸ਼ੁਰੂ ਹੋ ਕੇ ਸਰਕਾਰ ਦੀ ਅਖੌਤੀ ਪੱਤਰਕਾਰਾਂ ਦੇ ਖਿਲਾਫ਼ ਮੁਹਿੰਮ ਸ਼ੇਰਪੁਰ ਅਤੇ ਮੁਕਤਸਰ ਵਿਖੇ ਸਾਰਥਕ ਨਤੀਜੇ ਦੇਣ ਤੋਂ ਬਾਅਦ ਸੂਬੇ ਦੇ ਜ਼ਿਲ੍ਹਾ ਪੁਲਿਸ ਮੁਖੀਆਂ ਦੇ ਦਫ਼ਤਰਾਂ ਵਿੱਚ ਅਗਲਾ ਸਫ਼ਰ ਤੈਅ ਕਰਨ ਲਈ ਤਿਆਰ-ਬਰ-ਤਿਆਰ ਹੈ। ਪੰਜਾਬ ਪੁਲਿਸ ਦੇ ਇੱਕ ਸੀਨੀਅਰ ਅਫ਼ਸਰ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ’ਤੇ ਦੱਸਿਆ ਕਿ ਉੱਚ ਅਧਿਕਾਰੀਆਂ ਦੀਆਂ ਹਦਾਇਤਾਂ ’ਤੇ ਪੱਤਰਕਾਰਤਾ ਦੇ ਖੇਤਰ ’ਚ ਕੰਮ ਕਰਨ ਵਾਲੇ ਵਿਅਕਤੀਆਂ ਉੱਪਰ ਨਜ਼ਰ ਰੱਖੀ ਜਾ ਰਹੀ ਹੈ ਅਤੇ ਉਨ੍ਹਾਂ ਦੇ ਪਿਛੋਕੜ ਤੇ ਵਰਤਮਾਨ ਦੀਆਂ ਗਤੀਵਿਧੀਆਂ ਦੀ ਘੋਖ ਕੀਤੀ ਜਾ ਰਹੀ ਹੈ। ਪੱਤਰਕਾਰੀ ਦੇ ਨਾਮ ’ਤੇ ਬਲੈਕਮੇਲਿੰਗ ਦਾ ਗੋਰਖ਼ ਧੰਦਾ ਸੈਂਕੜਿਆਂ/ਹਜ਼ਾਰਾਂ ਵਿੱਚੋਂ ਨਿੱਕਲ ਕੇ ਲੱਖਾਂ ਦੇ ਅੰਕੜੇ ਤੱਕ ਪੁੱਜ ਚੁੱਕਾ ਹੈ ਜਿਸ ਤੋਂ ਬਾਅਦ ਅਜਿਹੇ ਪੱਤਰਕਾਰਾਂ ਦਾ ਸ਼ਿਕਾਰ ਬਣ ਚੁੱਕੇ ਜਾਂ ਬਣ ਰਹੇ ਕਾਰੋਬਾਰੀਆਂ /ਵਪਾਰੀਆਂ/ਮੁਲਾਜ਼ਮਾਂ ਇੱਥੋ ਤੱਕ ਕਿ ਉੱਚ ਅਧਿਕਾਰੀਆਂ ਨੇ ਅਜਿਹੇ ਪੱਤਰਕਾਰਾਂ ਨੂੰ ਨੱਥ ਪਾਉਣ ਲਈ ਅਵਾਜ਼ ਚੁੱਕਣੀ ਸ਼ੁਰੂ ਕੀਤੀ ਜਿਸ ਤੋਂ ਬਾਅਦ ਲਿਖਤੀ ਸ਼ਿਕਾਇਤਾਂ ਪੁਲਿਸ ਕੋਲ ਹੋਣ ਲੱਗੀਆਂ ਅਤੇ ਅਖੌਤੀ ਪੱਤਰਕਾਰਾਂ ਉੱਪਰ ਮੁਕੱਦਮੇ ਦਰਜ ਹੋਏ। ਇਹ ਤਾਂ ਮੰਨਿਆ ਨਹੀਂ ਜਾ ਸਕਦਾ ਕਿ ਪਿਛਲੀਆਂ ਸਰਕਾਰਾਂ ਮੌਕੇ ਸ਼ਿਕਾਰੀ ਪੱਤਰਕਾਰਾਂ ਨੇ ਕਾਰੋਬਾਰੀਆਂ /ਵਪਾਰੀਆਂ/ਮੁਲਾਜ਼ਮਾਂ ਦਾ ਮਾਲੀ ਸ਼ਿਕਾਰ ਨਹੀਂ ਕੀਤਾ ਹੋਵੇਗਾ ਬਲਕਿ ਇਹ ਕਿਹਾ ਜਾ ਸਕਦਾ ਹੈ ਕਿ ਪਿਛਲੀਆਂ ਸਰਕਾਰਾਂ ਮੌਕੇ ਕੁੱਤੀ ਚੋਰਾਂ ਨਾਲ ਰਲੀ ਹੋਈ ਸੀ ਜਾਂ ਕੁੱਤੀ ਹੈ ਹੀ ਚੋਰਾਂ ਦੀ ਸੀ । ਭਗਵੰਤ ਮਾਨ ਸਰਕਾਰ ਦੀ ਭਿ੍ਸ਼ਟਾਚਾਰ ਦੇ ਖਿਲਾਫ਼ ਸ਼ੁਰੂ ਕੀਤੀ ਜ਼ੀਰੋ ਟਾਲਰੈਂਸ ਮੁਹਿੰਮ ਦੇ ਘੇਰੇ ’ਚ ਜਾਅਲੀ ਪੱਤਰਕਾਰਾਂ ਨੂੰ ਵੀ ਲਿਆ ਜਾਣਾ ਇਸ ਗੱਲ ਦਾ ਸੰਕੇਤ ਹੈ ਕਿ ਸਰਕਾਰੀ ਦਫ਼ਤਰਾਂ ਵਿੱਚ ਕੁਝ ਭਿ੍ਸ਼ਟ ਸਿਆਸੀ ਆਗੂਆਂ ਦੀ ਸ਼ਹਿ ’ਤੇ ਕੁਝ ਭਿ੍ਸ਼ਟ ਮੁਲਾਜ਼ਮਾਂ ਵੱਲੋਂ ਖੇਡੀ ਜਾ ਰਹੀ ਭਿ੍ਸ਼ਟਾਚਾਰ ਦੀ ਖੇਡ ਉੱਪਰ ਕੁਝ ਹੱਦ ਤੱਕ ਰੋਕ ਲੱਗੇਗੀ ਕਿਉਂਕਿ ਇਸ ਖੇਡ ਦੇ ਜੇਕਰ ਸਿਆਸੀ ਆਗੂਆਂ ਤੇ ਮੁਲਾਜ਼ਮਾਂ ਨੂੰ ਖਿਡਾਰੀ ਮੰਨਿਆ ਜਾਵੇ ਤਾਂ ਬਲੈਕਮੇਲਰਾਂ ਦੇ ਰੂਪ ’ਚ ਵਿਚਰ ਰਹੇ ਅਖੌਤੀ ਪੱਤਰਕਾਰ ਇਸ ਖੇਡ ਦੇ ਰੈਫ਼ਰੀ ਦੀ ਭੂਮਿਕਾ ਨਿਭਾਉਂਦੇ ਆ ਰਹੇ ਹਨ। ਬਰਨਾਲਾ ਖੇਤਰ ਵਿੱਚ ਵੀ ਭਿ੍ਸ਼ਟ ਸਿਆਸੀ ਆਗਆਂ / ਭਿ੍ਸ਼ਟ ਮੁਲਾਜ਼ਮਾਂ ਅਤੇ ਪੱਤਰਕਾਰੀ ਦਾ ਮਖੌਟਾ ਪਾ ਕੇ ਬਲੈਕਮੇਲਿੰਗ ਦਾ ਗੋਰਖ਼ ਧੰਦਾ ਕਰਨ ਵਾਲੀ ਤਿੱਕੜੀ ਪੂਰੀ ਸਰਗਰਮ ਹੈ। ਸਿਤਮਜ਼ਰੀਫ਼ੀ ਇਹ ਹੈ ਕਿ ਉੱਚ ਅਧਿਕਾਰੀਆਂ ਦੇ ਧਿਆਨ ਵਿੱਚ ਹੋਣ ਦੇ ਬਾਵਜੂਦ ਵੀ ਇਸ ਤਿੱਕੜੀ ਦੀਆਂ ਗਤੀਵਿਧੀਆਂ ਬਾਦਸਤੂਰ ਜਾਰੀ ਹਨ।
