ਕੰਮ ’ਚ ਦੇਰੀ ਕਾਰਨ ਭੈਣ-ਭਰਾ ਦੇ ਕੀਤੀ ਆਤਮਹੱਤਿਆ ਦੀ ਕੋਸ਼ਿਸ਼
ਬਰਨਾਲਾ, 28 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਐਤਵਾਰ ਧਨੌਲਾ ਵਿਖੇ ਵਾਪਰੀ ਇੱਕ ਦਰਦਨਾਕ ਘਟਨਾ ਨੇ ਆਮ ਲੋਕਾਂ ਦੀਆਂ ਮੁਸ਼ਕਿਲਾਂ ਸੰਬੰਧੀ ਪ੍ਰਸਾਸ਼ਨਿਕ ਅਧਿਕਾਰੀਆਂ ਵੱਲੋਂ ਵਰਤੀ ਜਾਂਦੀ ਲਾਪਰਵਾਹੀ ਵੱਲ ਧਿਆਨ ਖਿੱਚਿਆ ਹੈ। ਧਨੌਲਾ ’ਚ ਇੱਕ ਗਲੀ ਦੇ ਮਾਮਲੇ ’ਤੇ ਪ੍ਰਸਾਸ਼ਨ ਦੀ ਬੇਰੁਖੀ ਤੋਂ ਤੰਗ ਆ ਕੇ ਭੈਣ-ਭਰਾ ਨੇ ਆਤਮਹੱਤਿਆ ਕਰਨ ਦੀ ਕੋਸ਼ਿਸ਼ ਕੀਤੀ , ਭੈਣ ਨੇ ਸਪਰੇਅ ਪੀਤੀ ਅਤੇ ਭਰਾ ਨੇ ਪੈਟਰੋਲ ਆਪਣੇ ਉੱਪਰ ਛਿੜਕ ਲਿਆ। ਲੋਕਾਂ ਨੇ ਭਰਾ ਨੂੰ ਅੱਗ ਲੱਗਣ ਤੋਂ ਪਹਿਲਾਂ ਬਚਾ ਲਿਆ ਪ੍ਰੰਤੂ ਭੈਣ ਦੀ ਹਾਲਤ ਗੰਭੀਰ ਹੈ ਜੋ ਇਲਾਜ ਅਧੀਨ ਹੈ। ਸਵਾਲ ਉਠਦਾ ਹੈ ਕਿ ਇਹ ਪਰਿਵਾਰ ਪ੍ਰਸਾਸ਼ਨਿਕ ਅਧਿਕਾਰੀਆਂ ਤੋਂ ਕਿੰਨਾ ਕੁ ਤੰਗ ਹੋਵੇਗਾ, ਜਿਸ ਕਰਕੇ ਉਨਾਂ ਨੇ ਆਪਣੀ ਜ਼ਿੰਦਗੀ ਹੀ ਦਾਅ ਤੇ ਲਾ ਦਿੱਤੀ। ਇਹ ਘਟਨਾ ਇਸ ਗੱਲ ਦਾ ਵੀ ਸਬੂਤ ਹੈ ਕਿ ਸੱਤਾ ਤਬਦੀਲੀ ਤੋਂ ਬਾਅਦ ਸਰਕਾਰੀ ਦਫ਼ਤਰਾਂ ਵਿੱਚ ਬੈਠੀ ਅਫ਼ਸਰਸ਼ਾਹੀ ਸੋਚ ਬਹੁਤੀ ਨਹੀਂ ਬਦਲੀ। ਲੋਕਾਂ ਨੂੰ ਆਪਣੇ ਕੰਮ ਕਰਵਾਉਣ ਲਈ ਵਾਰ-ਵਾਰ ਦਫ਼ਤਰਾਂ ਦੇ ਚੱਕਰ ਕੱਟਣੇ ਪੈ ਰਹੇ ਹਨ। ਦਫ਼ਤਰੀ ਬਾਬੂ ਆਮ ਲੋਕਾਂ ਦੀਆਂ ਮੁਸ਼ਕਿਲਾਂ ਨੂੰ ਸਮਝਣ ਦਾ ਯਤਨ ਵੀ ਨਹੀਂ ਕਰ ਰਹੇ। ਇਹ ਵੀ ਦੇਖਣ ਵਿੱਚ ਆਇਆ ਹੈ ਕਿ ਦਫ਼ਤਰਾਂ ਵਿੱਚ ਸਿਆਸੀ ਦਖਲਅੰਦਾਜ਼ੀ ਪਹਿਲਾਂ ਵਾਂਗ ਹੀ ਹੋ ਰਹੀ ਹੈ। ਲੋਕਾਂ ਦੇ ਨਿੱਜੀ ਕੰਮਾਂ ਦੇ ਮਾਮਲੇ ਵਿੱਚ ਵੀ ਦਫ਼ਤਰੀ ਬਾਬੂਆਂ ਵੱਲੋਂ ਕੰਮ ਕਰਵਾਉਣ ਆਏ ਲੋਕਾਂ ਦੀਆਂ ਪੱਗਾਂ ਦੇ ਰੰਗ ਦੇਖੇ ਜਾਂਦੇ ਹਨ। ਸੱਤਾ ਤਬਦੀਲੀ ਦੀ ਹਵਾ ਦੇ ਕਾਰਨ ਦਫ਼ਤਰਾਂ ਵਿੱਚ ਬਸੰਤੀ ਪੱਗਾਂ ਚਮਕ ਰਹੀਆਂ ਹਨ ਪ੍ਰੰਤੂ ਚਿੱਟੀਆਂ ਤੇ ਨੀਲੀਆਂ ਰੁਲ ਰਹੀਆਂ ਹਨ। ਧਨੌਲੇ ਵਾਲੀ ਘਟਨਾ ਤੋਂ ਬਾਅਦ ਸਮਾਜਿਕ ਜਥੇਬੰਦੀਆਂ ਆਪੋ ਆਪਣੇ ਝੰਡੇ ਲੈ ਕੇ ਮੈਦਾਨ ਵਿੱਚ ਨਿਤਰਣਗੀਆਂ, ਪੀੜਤਾਂ ਲਈ ਇਨਸਾਫ ਮੰਗਿਆ ਜਾਵੇਗਾ ਅਤੇ ਦੋਸ਼ੀਆਂ ਖਿਲਾਫ਼ ਕਾਰਵਾਈ ਦੀ ਗੁਹਾਰ ਲਗਾਈ ਜਾਵੇਗੀ ਪ੍ਰੰਤੂ ਸਰਕਾਰੀ ਦਫ਼ਤਰਾਂ ਵਿੱਚ ਵਰਿਆਂ ਤੋਂ ਹੁੰਦੀ ਆ ਰਹੀ ਦਫ਼ਰਤੀ ਬਾਬੂਆਂ ਦੀ ਡਿਕਟੇਟਰਸ਼ਿਪ ਪੱਕੇ ਤੌਰ ’ਤੇ ਖ਼ਤਮ ਕਰਵਾਉਣ ਲਈ ਕੋਈ ਠੋਸ ਉਪਰਾਲਾ ਨਹੀਂ ਕੀਤਾ ਜਾ ਰਿਹਾ। ਧਨੌਲੇ ਵਰਗੀਆਂ ਘਟਨਾਵਾਂ ਲਈ ਸਿਰਫ ਦਫ਼ਤਰੀ ਬਾਬੂ ਹੀ ਜ਼ਿੰਮੇਵਾਰ ਨਹੀਂ ਹਨ ਸਗੋਂ ਸਮੇਂ ਦੀ ਹਕੂਮਤ ਵਿੱਚ ਬੈਠੇ ਕੁਝ ਆਗੂਆਂ, ਜਿਨਾਂ ਉੱਪਰ ਚਿੱਟੀਆਂ ਤੇ ਨੀਲੀਆਂ ਦਾ ਲੇਪ ਚੜਿਆ ਹੋਇਆ ਹੈ , ਨੇ ਆਪਣੀ ਚੜ ਮਚਾਈ ਹੋਈ ਹੈ। ਕਈ ਵਰਿਆਂ ਬਾਅਦ ਬਰਨਾਲੇ ਵਿੱਚ ਝੰਡੀ ਵਾਲੀ ਕਾਰ ਵੜੀ ਪੰ੍ਰਤੂ ਇਹ ਵਿਚਾਰਨ ਵਾਲੀ ਗੱਲ ਹੈ ਕਿ ਝੰਡੀ ਵਾਲੀ ਕਾਰ ਦੇ ਹੂਟਰਾਂ ਦੀ ਅਵਾਜ਼ ਦਫ਼ਤਰੀ ਬਾਬੂਆਂ ਦੇ ਕੰਨਾਂ ਵਿੱਚ ਨਹੀਂ ਪੈ ਰਹੀ ਜਾਂ ਫਿਰ ਹੂਟਰ ਦੀ ਸਵਿੱਚ ਦਾ ਕੰਟਰੋਲ ਪਹਿਲੀਆਂ ਸਰਕਾਰਾਂ ਵਾਂਗ ਦਫ਼ਤਰੀ ਬਾਬੂਆਂ ਦੇ ਹੱਥ ਵਿੱਚ ਹੀ ਹੈ। ਹਕੂਮਤੀ ਆਗੂਆਂ ਦੇ ਇਹ ਦਾਅਵੇ ਕੁਝ ਹੱਦ ਤੱਕ ਮੰਨਣਯੋਗ ਹਨ ਕਿ ਵਰਿਆਂ ਤੋਂ ਵਿਗੜੀ ਨੂੰ ਦਿਨਾਂ ’ਚ ਸੰਵਾਰਿਆ ਨਹੀਂ ਜਾ ਸਕਦਾ ਪ੍ਰੰਤੂ ਜਦੋ ਆਮ ਲੋਕ ਦਫ਼ਰਤੀ ਬਾਬੂਆਂ ਦੀ ਬੇਰੁਖੀ ਤੋਂ ਤੰਗ ਆ ਕੇ ਸਪਰੇਅ ਪੀਣ , ਆਪਣੇ ’ਤੇ ਪੈਟਰੋਲ ਛਿੜਕ ਲੈਣ ਤਾਂ ਅਜਿਹੀ ਸਥਿਤੀ ਨੂੰ ਵਰਿਆਂ ਤੋਂ ਵਿਗੜੀ ਦੇ ਬਹਾਨਿਆਂ ਦੇ ਭਾਰ ਹੇਠ ਨਹੀਂ ਦੱਬਿਆ ਜਾ ਸਕਦਾ। ਧਨੌਲੇ ਵਾਲੀ ਘਟਨਾ ਕੋਈ ਆਮ ਘਟਨਾ ਨਹੀਂ ਹੈ, ਗੱਲ ਵਿਚਾਰਨਯੋਗ ਹੈ ।
