-ਸੀਮਿੰਟ ਅਤੇ ਬਾਂਸ ਦੇ ਰੁੱਖ ਗਾਰਡ ਬਣਾਉਣ ਦੇ ਨਾਮ ’ਤੇ 52 ਲੱਖ ਦਾ ਘਪਲਾ
ਚੰਡੀਗੜ , 30 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਵਿਜੀਲੈਂਸ ਬਿਊਰੋ ਨੇ ਬੁਢਲਾਡਾ ਦੇ ਵਣਰੇਂਜ ਅਫ਼ਸਰ ਸੁਖਵਿੰਦਰ ਸਿੰਘ ਨੂੰ ਲੱਖਾਂ ਰੁਪਏ ਦੇ ਗਬਨ ਦੇ ਦੋਸ਼ਾਂ ਤਹਿਤ ਗਿ੍ਫਤਾਰ ਕੀਤਾ ਹੈ। ਵਿਜੀਲੈਂਸ ਬਿਊਰੋ ਦੇ ਬੁਲਾਰੇ ਨੇ ਦੱਸਿਆ ਕਿ ਸੁਖਵਿੰਦਰ ਸਿੰਘ ਨੇ ਵਿਭਾਗ ਦੇ ਹੋਰ ਕਰਮਚਾਰੀਆਂ ਨਾਲ ਮਿਲੀ ਭੁਗਤ ਕਰਕੇ ਸੀਮਿੰਟ ਦੇ ਰੁੱਖ ਗਾਰਡ ਖਰੀਦਣ ਦੇ ਮਾਮਲੇ ’ਚ ਲੱਗਭੱਗ 52 ਲੱਖ ਦਾ ਘਪਲਾ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਰੁੱਖ ਗਾਰਡ ਤਿਆਰ ਕਰਨ ਲਈ ਵਣਰੇਂਜ ਅਫ਼ਸਰ ਨੇ ਮੈਸਰਜ਼ ਅੰਬੇ ਸੀਮਿੰਟ ਸਟੋਰ ਚੰਨੋ (ਸੰਗਰੂੁਰ) ਅਤੇ ਐਨਐਸ ਜੈਨ ਸੀਮਿੰਟ ਐੱਡ ਐਕਸੈਸਰੀਜ਼ ਸਟੋਰ ਪਟਿਆਲਾ ਨਾਮੀ ਫਰਮਾਂ ਪਾਸੋ ਸਮਾਨ ਖਰੀਦਣ ਸੰਬੰਧੀ ਬਿੱਲ ਹਾਸਲ ਕੀਤੇ ਪ੍ਰੰਤੂ ਪੜਤਾਲ ਦੌਰਾਨ ਸਾਹਮਣੇ ਆਇਆ ਕਿ ਉਕਤ ਨਾਵਾਂ ਦੀਆਂ ਫਰਮਾਂ ਨਹੀਂ ਹਨ ਅਤੇ ਬਿੱਲਾਂ ਉੱਪਰ ਲਿਖੀ ਜੀਐਸਟੀ ਨੰਬਰ ਫਰਜ਼ੀ ਹਨ ਤੇ ਸੰਪਰਕ ਨੰਬਰ ਵੀ ਠੀਕ ਨਹੀਂ ਹਨ। ਬੁਲਾਰੇ ਨੇ ਦੱਸਿਆ ਸੁਖਵਿੰਦਰ ਸਿੰਘ ਨੇ ਉਸ ਵੇਲੇ ਦੇ ਵਣਰੇਂਜ ਅਫ਼ਸਰ ਮਾਨਸਾ ਅਮਿਤ ਚੌਹਾਨ ਨਾਲ ਮਿਲੀ ਭੁਗਤ ਕਰਕੇ ਫਰਜ਼ੀ ਫਰਮਾਂ ਦੇ ਜਾਅਲੀ ਬਿੱਲ ਤਿਆਰ ਕਰਕੇ 45, 69, 000 ਰੁਪਏ ਦਾ ਗਬਨ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਪੜਤਾਲ ਦੌਰਾਨ ਸਾਹਮਣੇ ਆਇਆ ਕਿ ਉੁਕਤ ਸੁਖਵਿੰਦਰ ਸਿੰਘ ਵੱਲੋਂ ਦਸੰਬਰ 2021 ਵਿੱਚ ਬਾਂਸ ਦੇ ਰੁੱਖ ਗਾਰਡ ਗੁਰੂ ਕਿਰਪਾ ਬੈਂਬੂ ਸਟੋਰ ਮਾਨਸਾ ਨਾਮੀ ਫਰਮ ਪਾਸੋ 7 ਲੱਖ ਰੁਪਏ ਦੇ ਖਰੀਦਣ ਸੰਬੰਧੀ ਬਿੱਲ ਵੀ ਜਾਅਲੀ ਨਿੱਕਲੇ ਹਨ ਕਿਉਂਕਿ ਉਕਤ ਫਰਮ ਵੀ ਮੌਜੂਦ ਨਹੀਂ ਹੈ। ਬੁਲਾਰੇ ਨੇ ਦੱਸਿਆ ਕਿ ਤਫ਼ਤੀਸ ਦੇ ਆਧਾਰ ’ਤੇ ਸਾਹਮਣੇ ਆਇਆ ਹੈ ਕਿ ਸੁਖਵਿੰਦਰ ਸਿੰਘ ਵੱਲੋਂ ਅਮਿਤ ਚੌਹਾਨ ਅਤੇ ਹੋਰਾਂ ਨਾਲ ਮਿਲੀ ਭੁਗਤ ਕਰਕੇ ਫਰਜ਼ੀ ਫਰਮਾਂ ਦੇ ਬਿੱਲ ਤਿਆਰ ਕਰਕੇ ਜਾਅਲੀ ਦਸਤਖ਼ਤ ਕਰਕੇ ਸਰਕਾਰੀ ਰਕਮ ਨੂੰ ਹੋਰ ਵੱਖਰੇ ਬੈਂਕ ਖਾਤੇ ਵਿੱਚ ਤਬਦੀਲ ਕਰਕੇ ਨਗਦ ਕਢਵਾ ਲਿਆ ਗਿਆ। ਬੁਲਾਰੇ ਅਨੁਸਾਰ ਦੋਸ਼ੀਆਂ ਖਿਲਾਫ਼ ਵਿਜੀਲੈਂਸ ਬਿਊਰੋ ਦੇ ਉਡਣ ਦਸਤਾ ਪੰਜਾਬ ਦੇ ਥਾਣਾ ਮੋਹਾਲੀ ਵਿਖੇ ਮੁਕੱਦਮਾ ਨੰਬਰ 7 ਮਿਤੀ 6 ਜੂਨ 2022 ਨੂੰ ਆਈਪੀਸੀ ਦੀਆਂ ਧਰਾਵਾਂ 120ਬੀ, 409, 420,465, 467,468, 471 ਅਤੇ ਭਿ੍ਸ਼ਟਚਾਰ ਰੋਕੂ ਐਕਟ ਦੀ ਧਾਰਾ 7 , 7ਏ, 13 (1) ਏ (2) ਤਹਿਤ ਮੁਕੱਮਦਾ ਪਹਿਲਾਂ ਹੀ ਦਰਜ ਕੀਤਾ ਸੀ ਜਿਸ ਦੀ ਪੜਤਾਲ ਤਹਿਤ ਉਕਤ ਘਪਲਾ ਸਾਹਮਣੇ ਆਇਆ ਅਤੇ ਸੁਖਵਿੰਦਰ ਸਿੰਘ ਵਣਰੇਂਜ ਅਫ਼ਸਰ ਬੁਢਲਾਡਾ ਨੂੰ ਗਿ੍ਫ਼ਤਾਰ ਕਰਕੇ ਅਗਲੇਰੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾ ਰਹੀ ਹੈ।
