ਬਰਨਾਲਾ 10 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ)-
ਬਰਨਾਲਾ ਸ਼ਹਿਰ ਵਿੱਚ ਇੱਕ ਅਜਿਹਾ ਵਿਅਕਤੀ ਸਾਹਮਣੇ ਆਇਆ ਹੈ ਜਿਸ ਨੂੰ ਪੁਲਿਸ ਕਿਸੇ ਜੁਰਮ ਅਧੀਨ ਗ੍ਰਿਫਤਾਰ ਕਰਕੇ ਜੇਲ੍ਹ ਭੇਜ ਦਿੰਦੀ ਹੈ ਅਤੇ ਉਹ ਬਾਹਰ ਆ ਤੇ ਫੇਰ ਉਹੀ ਜੁਰਮ ਕਰਦਾ ਹੈ । “ਚੋਰ ਸਿਪਾਹੀ” ਦੀ ਇਸ ਖੇਡ ਵਿੱਚ ਉਕਤ ਵਿਅਕਤੀ ਉਪਰ ਇੱਕੋ ਹੀ ਜੁਰਮ ਦੇ 10 ਮੁਕੱਦਮੇ ਦਰਜ ਹੋ ਚੁੱਕੇ ਹਨ ਪਰੰਤੂ ਉਹ ਅਜੇ ਵੀ ਨਹੀਂ ਹਟਿਆ ਅਤੇ ਇੱਕ ਵਾਰ ਫੇਰ ਪੁਲਿਸ ਨੇ ਇਸ ਵਿਅਕਤੀ ਨੂੰ ਉਸੇ ਹੀ ਜ਼ੁਰਮ ਵਿਚ ਗ੍ਰਿਫਤਾਰ ਕੀਤਾ ਹੈ । ਬਰਨਾਲਾ ਦੇ ਪੁਰਾਣਾ ਬਜ਼ਾਰ ਦਾ ਵਾਸੀ ਪ੍ਰਦੀਪ ਕੁਮਾਰ ਉਰਫ਼ ਰਿੰਕੂ ਪੁੱਤਰ ਰੁਕਮੇਸ਼ ਕੁਮਾਰ ਨੂੰ ਸੀਆਈਏ ਪੁਲਿਸ ਨੇ ਪਾਬੰਦੀਸ਼ੁਦਾ ਚਾਇਨਾ ਡੋਰ ਦੇ 13 ਗੱਟਿਆਂ ਸਮੇਤ ਕਾਬੂ ਕਰਕੇ ਉਸ ਦੇ ਖਿਲਾਫ਼ ਥਾਣਾ ਸਿਟੀ ਵਿੱਚ ਮੁਕੱਦਮਾ ਦਰਜ ਕੀਤਾ ਹੈ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਹੀ ਪਰਦੀਪ ਕੁਮਾਰ ਉਰਫ਼ ਰਿੰਕੂ ਦੇ ਖ਼ਿਲਾਫ਼ ਥਾਣਾ ਸਿਟੀ ਵਿੱਚ ਹੀ 10 ਪਰਚੇ ਇਸੇ ਜੁਰਮ ਤਹਿਤ ਦਰਜ ਹਨ । ਪੁਲਿਸ ਉਸ ਨੂੰ ਚਾਈਨਾ ਡੋਰ ਦੇ ਗੱਟਿਆਂ ਸਮੇਤ ਕਾਬੂ ਕਰਕੇ ਜੇਲ ਭੇਜਦੀ ਹੈ ਅਤੇ ਉਹ ਜ਼ਮਾਨਤ ਉੱਪਰ ਰਿਹਾਅ ਹੋ ਕੇ ਦੁਬਾਰਾ ਫੇਰ ਚਾਇਨਾ ਡੋਰ ਵੇਚਣੀ ਸ਼ੁਰੂ ਕਰ ਦਿੰਦਾ ਹੈ। ਜ਼ਿਕਰਯੋਗ ਹੈ ਕਿ ਸਰਕਾਰ ਨੇ ਚਾਈਨਾ ਡੋਰ ਵੇਚਣ/ਵਰਤਣ ‘ਤੇ ਪਾਬੰਦੀ ਲਗਾਈ ਹੋਈ ਹੈ ਕਿਉਂਕਿ ਇਸ ਡੋਰ ਨਾਲ ਕਈ ਵਿਅਕਤੀਆਂ ਦੀਆਂ ਮੌਤਾਂ ਹੋ ਚੁੱਕੀਆਂ ਹਨ ਅਤੇ ਕਈ ਵਿਅਕਤੀ ਜ਼ਖ਼ਮੀ ਹੋ ਚੁੱਕੇ ਹਨ। ਚਾਇਨਾ ਡੋਰ ਨਾਲ ਪੰਛੀ ਦੀ ਵੱਡੀ ਗਿਣਤੀ ਵਿੱਚ ਮਾਰੇ ਗਏ ਹਨ, ਇਹਨਾਂ ਸਾਰੀਆਂ ਗੱਲਾਂ ਤੋਂ ਜਾਣੂ ਹੋਣ ਦੇ ਬਾਵਜੂਦ ਵੀ ਦੋਸ਼ੀ ਪ੍ਰਦੀਪ ਕੁਮਾਰ ਵਾਰ-ਵਾਰ ਇਹ ਜੁਰਮ ਕਰ ਰਿਹਾ ਹੈ। ਕੁਝ ਸਮਾਜਸੇਵੀ ਅਤੇ ਪੰਛੀ ਪ੍ਰੇਮੀਆਂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਤੋਂ ਮੰਗ ਕੀਤੀ ਹੈ ਕਿ ਚਾਇਨਾ ਡੋਰ ਵੇਚਣ/ਵਰਤਣ ਵਾਲਿਆਂ ਦੇ ਖ਼ਿਲਾਫ਼ ਬਣੇ ਕਾਨੂੰਨ ਦੀਆਂ ਧਾਰਾਵਾਂ ਹੋਰ ਸਖਤ ਕੀਤੀਆਂ ਜਾਣ, ਕਿਉਂਕਿ ਜਿਸ ਚੀਜ਼ ਦੀ ਵਰਤੋਂ ਨਾਲ ਕਿਸੇ ਵਿਅਕਤੀ ਦੀ ਜਾਨ ਵੀ ਜਾਂਦੀ ਹੋਵੇ ਉਸ ਦੀ ਪਾਬੰਦੀ ਹੋਣ ਦੇ ਬਾਵਜੂਦ ਵੀ ਵਰਤੋਂ ਕਰਨ ਵਾਲਿਆਂ ਖਿਲਾਫ ਸਖ਼ਤ ਕਾਨੂੰਨ ਹੋਣਾ ਚਾਹੀਦਾ ਹੈ। ਦੱਸਣਯੋਗ ਹੈ ਕਿ ਉਕਤ ਦੋਸ਼ੀ ਪ੍ਰਦੀਪ ਕੁਮਾਰ ਨੇ ਚਾਈਨਾ ਡੋਰ ਵੇਚਣ ਦਾ ਪਹਿਲਾ ਜੁਰਮ 2014 ਵਿਚ ਕੀਤਾ ਸੀ । ਉਸ ਤੋਂ ਬਾਅਦ ਪ੍ਰਦੀਪ ਕੁਮਾਰ ਉਪਰ 2016 ਵਿੱਚ ਇਸੇ ਜੁਰਮ ਤਹਿਤ ਇਕ ਹੋਰ ਮੁਕੱਦਮਾ ਦਰਜ ਹੋਇਆ ਅਤੇ ਇਸ ਜੁਰਮ ਤਹਿਤ ਪ੍ਰਦੀਪ ਕੁਮਾਰ ਉਪਰ 2018 ਵਿੱਚ ਦੋ ਮੁਕੱਦਮੇ, 2019 ਵਿੱਚ ਦੋ ਮੁਕੱਦਮੇ, 2020 ਵਿੱਚ ਇੱਕ ਮੁਕੱਦਮਾ ਅਤੇ 2021 ਤਿੰਨ ਮੁੱਕਦਮੇ ਦਰਜ਼ ਹੋਏ ਸਨ ਪ੍ਰੰਤੂ ਫਿਰ ਵੀ ਉਕਤ ਦੋਸ਼ੀ ਨੂੰ ਚਾਇਨਾ ਡੋਰ ਨਾਲ ਮਰਨ ਵਾਲੇ ਵਿਅਕਤੀਆਂ, ਬੱਚਿਆਂ, ਪੰਛੀਆਂ ਉਪਰ ਰਹਿਮ ਨਹੀਂ ਆ ਰਿਹਾ ਅਤੇ ਉਹ ਵਾਰ-ਵਾਰ ਇਹੋ ਜ਼ੁਰਮ ਕਰ ਰਿਹਾ ਹੈ ।
