ਚੰਡੀਗੜ੍ਹ,13 ਦਸੰਬਰ-ਲੋਕ ਸਭਾ ‘ਤੇ ਅੱਤਵਾਦੀ ਹਮਲੇ ਦੀ 22ਵੀਂ ਬਰਸੀ ਮੌਕੇ ਬੁੱਧਵਾਰ ਨੂੰ ਲੋਕ ਸਭਾ ਦੇ ਦਰਸ਼ਕ ਗੈਲਰੀ ਵਿੱਚੋਂ ਹਾਲ ਵਿੱਚ ਕੁੱਦਣ ਵਾਲੇ ਦੋ ਨੌਜਵਾਨਾਂ ‘ਚੋਂ ਇੱਕ ਵੱਲੋਂ ਸੁੱਟੇ ਗਏ ਕਲਰ ਬੰਬ ਨੂੰ ਪੰਜਾਬ ਦੇ ਇਕ ਲੋਕ ਸਭਾ ਮੈਂਬਰ ਨੇ ਚੁੱਕ ਕੇ ਤੁਰੰਤ ਬਾਹਰ ਸੁੱਟ ਦਿੱਤਾ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਲੋਕ ਸਭਾ ਹਲਕਾ ਅੰਮ੍ਰਿਤਸਰ ਤੋਂ ਮੈਂਬਰ ਪਾਰਲੀਮੈਂਟ ਗੁਰਜੀਤ ਸਿੰਘ ਔਜਲਾ ਨੇ ਦੱਸਿਆ ਕਿ ” ਲੋਕ ਸਭਾ ‘ਚ ਜੀਰੋ ਆਵਰ ਦਾ ਅੰਤਿਮ ਸਮਾਂ ਚੱਲ ਰਿਹਾ ਸੀ, ਅਸੀਂ ਅੱਗੇ ਬੈਠੇ ਸੀ, ਕੁਝ ਰੌਲਾ ਰੱਪਾ ਜਿਹਾ ਪਿਆ ਤਾਂ ਮੇਰਾ ਧਿਆਨ ਉੱਪਰ ਗਿਆ, ਉੱਪਰੋਂ ਦਰਸ਼ਕ ਗੈਲਰੀ ਵਿੱਚ ਇੱਕ ਨੌਜਵਾਨ ਹਾਲ ਵਿੱਚ ਕੁੱਦ ਚੁੱਕਿਆ ਸੀ ਤੇ ਦੂਸਰਾ ਕੁੱਦਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਜੋ ਪਹਿਲਾਂ ਨੀਚੇ ਕੁੱਦ ਚੁੱਕਿਆ ਸੀ ਉਹ ਸਪੀਕਰ ਵੱਲ ਵੱਧ ਰਿਹਾ ਸੀ ਉਸਨੇ ਆਪਣੀ ਜੁੱਤੀ ਉਤਾਰਨੀ ਸ਼ੁਰੂ ਕੀਤੀ, ਜੁੱਤੇ ਵਿੱਚ ਕੁਝ ਸੀ ਪ੍ਰੰਤੂ ਐਨੇ ਵਿੱਚ ਉਸ ਨੂੰ ਲੋਕ ਸਭਾ ਮੈਂਬਰ ਬੈਨੀਵਾਲ ਨੇ ਫੜ ਲਿਆ। ਮੈਨੂੰ ਪਤਾ ਸੀ ਕਿ ਉਸ ਦੇ ਪਿੱਛੇ ਇੱਕ ਨੌਜਵਾਨ ਹੋਰ ਵੀ ਹੈ ਕਿਉਂਕਿ ਮੈਂ ਉਸ ਨੂੰ ਦੇਖ ਲਿਆ ਸੀ, ਉਸ ਦੂਜੇ ਨੌਜਵਾਨ ਨੇ ਲੋਕ ਸਭਾ ਹਾਲ ਅੰਦਰ ਕੁਝ ਸੁੱਟਿਆ ਜਿਸ ਨਾਲ ਧੂੰਆਂ ਧੂੰਆਂ ਹੋ ਗਿਆ, ਇਸ ਧੂੰਏ ਦਾ ਰੰਗ ਪੀਲਾ ਸੀ ਮੈਂ ਤੁਰੰਤ ਉਸ ਨੂੰ ਚੁੱਕਿਆ ਅਤੇ ਬਾਹਰ ਸੁੱਟ ਦਿੱਤਾ, ਉਸ ਮੌਕੇ ਇਹ ਨਹੀਂ ਪਤਾ ਲੱਗ ਰਿਹਾ ਸੀ ਕਿ ਉਹ ਕੀ ਚੀਜ਼ ਸੀ ਪਰ ਸਾਰਿਆਂ ਦੀ ਸੁਰੱਖਿਆ ਦਾ ਮਾਮਲਾ ਸੀ ਇਸ ਕਰਕੇ ਮੈਂ ਉਸ ਨੂੰ ਤੁਰੰਤ ਚੁੱਕ ਕੇ ਬਾਹਰ ਸੁੱਟ ਦਿੱਤਾ, ਇਸ ਤੋਂ ਬਾਅਦ ਹੋਰ ਲੋਕ ਸਭਾ ਮੈਂਬਰ ਆ ਗਏ ਤੇ ਉਸ ਨੂੰ ਫੜ ਲਿਆ ਗਿਆ। ਗੁਰਜੀਤ ਸਿੰਘ ਔਜਲਾ ਨੇ ਕਿਹਾ ਕਿ ਉਹਨਾਂ ਦੇ ਹੱਥ ਉੱਪਰ ਵੀ ਪੀਲਾ ਰੰਗ ਲੱਗ ਗਿਆ ਹੈ। ਔਜਲਾ ਨੇ ਕਿਹਾ ਕਿ ਦੋਵੇਂ ਨੌਜਵਾਨ ਸਦਨ ਅੰਦਰ “ਤਾਨਾਸ਼ਾਹੀ ਬੰਦ ਕਰੋ” ਦੇ ਨਾਅਰੇ ਵੀ ਲਗਾ ਰਹੇ ਸਨ, ਪ੍ਰੰਤੂ ਨਾਅਰਿਆਂ ਵੱਲ ਕਿਸੇ ਨੇ ਧਿਆਨ ਨਹੀਂ ਦਿੱਤਾ ਕਿਉਂਕਿ ਸਾਰਿਆਂ ਦਾ ਧਿਆਨ ਉਹਨਾਂ ਨੂੰ ਫੜਨ ਵੱਲ ਲੱਗਿਆ ਹੋਇਆ ਸੀ। ਸੰਸਦ ਔਜਲਾ ਨੇ ਲੋਕ ਸਭਾ ਦੀ ਨਵੀਂ ਇਮਾਰਤ ‘ਤੇ ਵੀ ਸਵਾਲ ਖੜੇ ਕੀਤੇ ਹਨ। ਉਹਨਾਂ ਕਿਹਾ ਕਿ ਇਹ ਸੁਰੱਖਿਆ ‘ਚ ਬਹੁਤ ਵੱਡੀ ਕੁਤਾਹੀ ਹੈ। ਜਦੋਂ ਦੀ ਪਾਰਲੀਮੈਂਟ ਦੀ ਨਵੀਂ ਬਿਲਡਿੰਗ ਬਣੀ ਹੈ, ਕੁਝ ਨਾ ਕੁਝ ਸਮੱਸਿਆਵਾਂ ਆ ਰਹੀਆਂ ਹਨ।
