ਚੰਡੀਗੜ੍ਹ, 30 ਮਾਰਚ, Gee98 news service
-ਪੰਜਾਬ ਦੀ ਇੱਕ ਮਹਿਲਾ ਆਈਏਐਸ ਅਧਿਕਾਰੀ ਦੇ ਪਤੀ ਨੂੰ ਲੁਧਿਆਣਾ ਵਿਖੇ ਇੱਕ ਫਾਰਮ ਹਾਊਸ ਵਿੱਚ ਰੰਗਰਲੀਆਂ ਮਨਾਉਂਦੇ ਹੋਏ ਪੁਲਿਸ ਵੱਲੋਂ ਗ੍ਰਿਫ਼ਤਾਰ ਕੀਤੇ ਜਾਣ ਦੀਆਂ ਖ਼ਬਰਾਂ ਹਨ ਪ੍ਰੰਤੂ ਪੁਲਿਸ ਇਸ ਮਾਮਲੇ ਤੋਂ ਪੱਲਾ ਝਾੜ ਰਹੀ ਹੈ ਕਿ ਉਸਨੇ ਕਿਸੇ ਆਈਏਐਸ ਅਧਿਕਾਰੀ ਦੇ ਪਤੀ ਨੂੰ ਮੌਜ ਮਸਤੀ ਕਰਦੇ ਹੋਏ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਸੂਚਨਾ ਦੇ ਅਧਾਰ ‘ਤੇ ਬੀਤੇ ਕੱਲ ਰੂਸ ਤੇ ਤਜ਼ਾਕਿਸਤਾਨ ਵਰਗੇ ਮੁਲਕਾਂ ਚੋਂ ਲੜਕੀਆਂ ਲਿਆ ਕੇ ਧੰਦਾ ਕਰਨ ਵਾਲੇ ਇੱਕ ਗਿਰੋਹ ਨੂੰ ਤਾਂ ਕਾਬੂ ਕੀਤਾ ਹੈ ਅਤੇ ਇਸ ਸਬੰਧੀ ਸਰਾਭਾ ਨਗਰ ਥਾਣੇ ਵਿੱਚ ਮੁਕੱਦਮਾ ਵੀ ਦਰਜ ਕੀਤਾ ਗਿਆ ਹੈ, ਪ੍ਰੰਤੂ ਪੁਲਿਸ ਇਸ ਗੱਲੋਂ ਪੈਰ ‘ਤੇ ਪਾਣੀ ਨਹੀਂ ਪੈਣ ਦੇ ਰਹੀ ਕਿ ਫੜੇ ਗਏ ਵਿਅਕਤੀਆਂ ਵਿੱਚ ਕਿਸੇ ਮਹਿਲਾ ਆਈਏਐਸ ਅਧਿਕਾਰੀ ਦਾ ਪਤੀ ਵੀ ਹੈ। ਸੂਤਰਾਂ ਅਨੁਸਾਰ ਦਰਜ ਕੀਤੇ ਮੁਕੱਦਮੇ ਵਿੱਚ ਵੀ ਮਹਿਲਾ ਆਈਏਐਸ ਅਧਿਕਾਰੀ ਦੇ ਪਤੀ ਦਾ ਨਾਮ ਨਹੀਂ ਪ੍ਰੰਤੂ ਇਹ ਪੁਖਤਾ ਜਾਣਕਾਰੀ ਹੈ ਕਿ ਉਸ ਨੂੰ ਰਾਤ ਭਰ ਥਾਣੇ ਜ਼ਰੂਰ ਬਿਠਾ ਕੇ ਰੱਖਿਆ ਗਿਆ। ਜਾਣਕਾਰੀ ਇਹ ਵੀ ਨਿਕਲੀ ਹੈ ਕਿ ਆਈਏਐਸ ਅਧਿਕਾਰੀ ਦਾ ਪਤੀ ਮੌਜ ਮਸਤੀਆਂ ਕਰਨ ਦਾ ਸ਼ੌਂਕੀਨ ਹੈ ਜਿਸ ਕਾਰਨ ਉਸ ਦੀ ਅਫਸਰ ਪਤਨੀ ਵੀ ਪਰੇਸ਼ਾਨ ਹੈ। ਬਹਰਹਾਲ ! “ਤਕੜੇ ਦਾ ਸੱਤੀਂ ਵੀਹੀਂ ਸੌ” ਕਹਾਵਤ ਅਨੁਸਾਰ ਪੁਲਿਸ ਫੜੇ ਗਏ ਗਿਰੋਹ ਵਿੱਚ ਆਈਏਐਸ ਅਧਿਕਾਰੀ ਦੇ ਪਤੀ ਦੀ ਸ਼ਮੂਲੀਅਤ ਦੀ ਕਹਾਣੀ ਨੂੰ ਰਫ਼ਾ ਦਫ਼ਾ ਕਰਨ ਲੱਗੀ ਹੋਈ ਹੈ।
Menu
