ਬਰਨਾਲਾ, 23 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਆਪਣੀ ਕੁੱਟਮਾਰ ਕਰਨ ਵਾਲੇ ਵਿਅਕਤੀਆਂ ਖਿਲਾਫ਼ ਪੁਲਿਸ ਵੱਲੋਂ ਕੋਈ ਕਾਰਵਾਈ ਨਾ ਕਰਨ ਤੋਂ ਖਫ਼ਾ ਇੱਕ ਬਜ਼ੁਰਗ ਹਲਕਾ ਭਦੌੜ ਦੇ ਪਿੰਡ ਉੱਗੋਕੇ ਦੀ ਅਨਾਜ ਮੰਡੀ ਵਿਚਲੇ ਟਾਵਰ ਉੱਪਰ ਪੈਟਰੋਲ ਦੀ ਬੋਤਲ ਲੈ ਕੇ ਚੜ੍ਹ ਗਿਆ। ਟਾਵਰ ਦੇ ਉੱਪਰ ਚੜਿਆ ਇਹ ਵਿਅਕਤੀ ਸੋਹਨ ਲਾਲ ਗੋਇਲ ਪੁੱਤਰ ਦੇਵਰਾਜ ਵਾਸੀ ਤਪਾ ਆਮ ਆਦਮੀ ਪਾਰਟੀ ਦਾ ਸਰਗਰਮ ਵਰਕਰ ਹੈ ਅਤੇ ਇਸ ਨੂੰ ‘ਮਿੰਨੀ ਕੇਜਰੀਵਾਲ’ ਵੀ ਕਿਹਾ ਜਾਂਦਾ ਹੈ। ਸੋਹਨ ਲਾਲ ਨੇ ਦੱਸਿਆ ਕਿ ਤਪਾ ਮੰਡੀ ਦੇ ਕੁਝ ਅਸਰਰਸੂਖ਼ ਰੱਖਣ ਵਾਲੇ ਕਾਂਗਰਸੀ ਵਿਅਕਤੀ ਪਿਛਲੇ ਕਾਫੀ ਸਮੇਂ ਤੋਂ ਉਸ ਦੀ ਕੁੱਟਮਾਰ ਕਰ ਰਹੇ ਹਨ ਜਿਸ ਸੰਬੰਧੀ ਪੁਲਿਸ ਕੋਲ ਇਤਲਾਹ ਦਿੱਤੀ ਹੈ ਪ੍ਰੰਤੂ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਸੋਹਨ ਲਾਲ ਨੇ ਦੁੱਖ ਪ੍ਰਗਟ ਕੀਤਾ ਕਿ ਉਸ ਦੀ ਪਾਰਟੀ ਦੀ ਸਰਕਾਰ ਹੋਣ ਦੇ ਬਾਵਜੂਦ ਵੀ ਉਸ ਦੀ ਕੋਈ ਸੁਣਵਾਈ ਨਹੀਂ ਹੋ ਰਹੀ ਜਿਸ ਕਰਕੇ ਰੋਸ ਵਜੋਂ ਉਸ ਨੂੰ ਇਹ ਕਦਮ ਚੁੱਕਣਾ ਪਿਆ। ਇਸ ਸੰਬੰਧੀ ਕੁੱਟਮਾਰ ਦੇ ਦੋਸ਼ਾਂ ਦਾ ਸਾਹਮਣਾ ਕਰਨ ਵਾਲੇ ਤਪਾ ਮੰਡੀ ਦੇ ਰਸੂਖ਼ ਵਾਲੇ ਕਾਂਗਰਸੀਆਂ ਨੇ ਕਿਹਾ ਕਿ ਸੋਹਨ ਲਾਲ ਵੱਲੋਂ ਲਗਾਏ ਜਾ ਰਹੇ ਦੋਸ਼ ਬੇਬੁਨਿਆਦ ਹਨ । ਚੰਡੀਗੜ੍ਹ ਗਏ ਹਲਕਾ ਵਿਧਾਇਕ ਲਾਭ ਸਿੰਘ ਉੱਗੋਕੇ ਨੂੰ ਜਦ ਮਿੰਨੀ ਕੇਜਰੀਵਾਲ ਦੇ ਟਾਵਰ ਉੱਪਰ ਚੜਨ ਬਾਰੇ ਪਤਾ ਲੱਗਿਆ ਤਾਂ ਉਸ ਨੇ ਆਪਣੇ ਸਮਰਥਕਾਂ ਨੂੰ ਮੌਕੇ ’ਤੇ ਭੇਜਿਆ। ਵਿਧਾਇਕ ਨੇ ਆਪਣੇ ਸਮਰਥਕਾਂ ਰਾਹੀ ਸੋਹਨ ਲਾਲ ਨੂੰ ਭਰੋਸਾ ਦਿੱਤਾ ਕਿ ਉਸ ਦੀ ਪੂਰੀ ਸੁਣਵਾਈ ਹੋਵੇਗੀ ਅਤੇ ਨਾਲ ਹੀ ਵਿਧਾਇਕ ਨੇ ਫੋਨ ’ਤੇ ਸੋਹਨ ਲਾਲ ਨੂੰ ਦੱਸਿਆ ਕਿ ਸੰਬੰਧਿਤ ਐਸਐਚਓ ਨੂੰ ਦੋਸ਼ੀਆਂ ਖਿਲਾਫ਼ ਕਾਨੂੰਨ ਅਨੁਸਾਰ ਕਾਰਵਾਈ ਕਰਨ ਲਈ ਕਹਿ ਦਿੱਤਾ ਹੈ। ਆਪਣੇ ਵਿਧਾਇਕ ਦੀ ਗੱਲ ’ਤੇ ਭਰੋਸਾ ਕਰਕੇ ਸੋਹਨ ਲਾਲ ਗੋਇਲ ਉਰਫ ‘ਮਿੰਨੀ ਕੇਜਰੀਵਾਲ’ ਟਾਵਰ ਤੋਂ ਹੇਠਾਂ ਤਾਂ ਉੱਤਰ ਆਇਆ ਪ੍ਰੰਤੂ ਉਸ ਨੇ ਚਿਤਾਵਨੀ ਦਿੱਤੀ ਜੇਕਰ ਉਸ ਦੀ ਪੁਲਿਸ ਨੇ ਸੁਣਵਾਈ ਨਾ ਕੀਤੀ ਤਾਂ ਉਹ ਫਿਰ ਅਜਿਹਾ ਕਦਮ ਚੁੱਕੇਗਾ।
