ਪੁਲਿਸ ਨੇ ਰੇਪ ਦੇ ਦੋਸ਼ਾਂ ਤਹਿਤ ਇੱਕ ਹੋਰ “ਬਾਬਾ” ਕੀਤਾ ਕਾਬੂ
ਬਰਨਾਲਾ 2 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ)-ਬਾਬਿਆਂ ਦੇ ਭੇਸ ‘ਚ ਬਲਾਤਕਾਰੀ ਚਿਹਰੇ ਪਰਗਟ ਹੋਣ ਦੀ ਕਹਾਣੀ ਜਾਰੀ ਹੈ। ਇਹ ਘਟਨਾ ਭਾਵੇਂ ਪੰਜਾਬ ਤੋਂ ਬਾਹਰਲੀ ਹੈ, ਪਰੰਤੂ ਹੈ ਵਿਚਾਰਨ ਵਾਲੀ ਕਿ ਲੋਕਾਂ ਨੂੰ ਧਰਮ ਦੇ ਨਾਮ ‘ਤੇ ਡੇਰੇ ਖੋਲ੍ਹ ਕੇ ਬੈਠੇ ਭੇਖਧਾਰੀਆਂ ਉੱਪਰ ਅੱਖਾਂ ਬੰਦ ਕਰਕੇ ਵਿਸ਼ਵਾਸ ਨਹੀਂ ਕਰਨਾ ਚਾਹੀਦਾ । ਤਾਜ਼ਾ ਘਟਨਾ ਅਨੁਸਾਰ ਕਰਨਾਟਕ ਦੇ ਚਿਤਰਦੁਰਗਾ ਜ਼ਿਲ੍ਹੇ ਦੇ ਮੁਰਗਾ ਮੱਠ ਦੀਆਂ ਨਾਬਾਲਗ ਵਿਦਿਆਰਥਣਾਂ ਨਾਲ ਜਿਨਸੀ ਸ਼ੋਸ਼ਣ ਦੇ ਦੋਸ਼ਾਂ ਤਹਿਤ ਮੱਠ ਦੇ ਮਹੰਤ ਸ਼ਿਵਮੂਰਤੀ ਸਰਨਾਰੁੂ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਨੇ ਮਹੰਤ ਸ਼ਿਵਮੂਰਤੀ ਦੇ ਖ਼ਿਲਾਫ਼ ਪੋਕਸੋ ਤਹਿਤ ਕੇਸ ਦਰਜ ਕੀਤਾ ਹੈ। ਮਹੰਤ ਦੀਆਂ ਸ਼ਰਮਨਾਕ ਹਰਕਤਾਂ ਤੋਂ ਬਾਅਦ ਕਈ ਮਾਪੇ ਆਪਣੇ ਬੱਚਿਆਂ ਨੂੰ ਘਰ ਲੈ ਗਏ ਅਤੇ ਬਾਕੀਆਂ ਨੂੰ ਸਰਕਾਰੀ ਹੋਸਟਲ ਵਿਚ ਤਬਦੀਲ ਕੀਤਾ ਗਿਆ ਹੈ। ਪੁਲਿਸ ਨੇ ਮਹੰਤ ਦੇ ਖਿਲਾਫ ਐਸਸੀ/ਐਸਟੀ ਐਕਟ ਤਹਿਤ ਵੀ ਮਾਮਲਾ ਦਰਜ ਕੀਤਾ ਹੈ ਕਿਉਂਕਿ ਪੀੜਤ ਵਿਦਿਆਰਥਣਾਂ ਵਿਚ ਇਕ ਦਲਿਤ ਵਿਦਿਆਰਥਣ ਵੀ ਹੈ। ਰਾਸ਼ਟਰੀ ਬਾਲ ਅਧਿਕਾਰ ਸੁਰੱਖਿਆ ਕਮਿਸ਼ਨ ਨੇ ਵੀ ਘਟਨਾ ਸਾਹਮਣੇ ਆਉਣ ਤੋਂ ਬਾਅਦ ਕਰਨਾਟਕ ਪੁਲੀਸ ਤੋਂ ਜਾਂਚ ਰਿਪੋਰਟ ਮੰਗੀ ਹੈ। ਮਹੰਤ ਉੱਪਰ ਜਿਣਸੀ ਸ਼ੋਸ਼ਣ ਦਾ ਦੋਸ਼ ਲਗਾਉਣ ਵਾਲੀਆਂ ਦੋ ਨਾਬਾਲਗ ਲੜਕੀਆਂ ਨੇ ਮੈਜਿਸਟ੍ਰੇਟ ਦੇ ਸਾਹਮਣੇ ਵੀ ਆਪਣੇ ਬਿਆਨ ਦਰਜ ਕਰਵਾਏ ਹਨ। ਦੂਜੇ ਪਾਸੇ ਮਹੰਤ ਨੇ ਇਸ ਸਾਰੀ ਘਟਨਾ ਨੂੰ ਇਕ ਸਾਜ਼ਿਸ਼ ਦਾ ਹਿੱਸਾ ਦੱਸਿਆ ਹੈ । ਫਿਲਹਾਲ ! ਪੁਲਸ ਨੇ ਪੀੜਤ ਨਾਬਾਲਗ ਵਿਦਿਆਰਥਣਾਂ ਦੇ ਬਿਆਨਾਂ ਤੇ ਮਾਮਲਾ ਦਰਜ ਕਰਕੇ ਮਹੰਤ ਨੂੰ ਕਾਬੂ ਕਰ ਲਿਆ ਹੈ। ਧਰਮ ਦੇ ਨਾਮ ਤੇ ਸੰਸਥਾਵਾਂ ਚਲਾਉਣ ਵਾਲੇ ਕਈ ਬਾਬੇ ਹੁਣ ਤਕ ਸਲਾਖਾਂ ਪਿੱਛੇ ਹਨ ਜਿਨ੍ਹਾਂ ਉੱਪਰ ਬਲਾਤਕਾਰ ਦੇ ਦੋਸ਼ ਲੱਗੇ ਹਨ, ਜਿਸ ਕਰਕੇ ਲੋਕਾਂ ਦਾ ਧਰਮਾਰਥ ਲਹਿਰ ਤੋਂ ਵਿਸ਼ਵਾਸ ਹੀ ਉੱਠਦਾ ਜਾ ਰਿਹਾ ਹੈ।
