ਬਰਨਾਲਾ, 6 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ)-
ਪਤੀ ਦੀ ਮੌਤ ਤੋਂ ਬਾਅਦ ਆਰਥਿਕ ਤੰਗੀ ਨਾਲ ਜੂਝ ਰਹੀ ਇਕ ਵਿਧਵਾ ਔਰਤ ਵੱਲੋਂ ਮੀਡੀਆ ਰਾਹੀਂ ਮੱਦਦ ਕਰਨ ਦੀ ਅਪੀਲ ਪੜ੍ਹ ਕੇ ਜਿਲੇ ਦੀ ਡਿਪਟੀ ਕਮਿਸ਼ਨਰ ਪੂਨਮਦੀਪ ਕੌਰ ਨੇ ਇਕ ਸਲਾਘਾਯੋਗ ਕੰਮ ਕੀਤਾ ਹੈ। ਮੀਡੀਆ ‘ਚ ਇੱਕ ਵਿਧਵਾ ਔਰਤ ਵੱਲੋਂ ਮਦਦ ਲਈ ਲਗਾਈ ਗਈ ਗੁਹਾਰ ਦਾ ਨੋਟਿਸ ਲੈਂਦਿਆਂ ਡਿਪਟੀ ਕਮਿਸ਼ਨਰ ਸ਼੍ਰੀਮਤੀ ਪੂਨਮਦੀਪ ਕੌਰ ਨੇ ਬਲਜੀਤ ਕੌਰ ਪਤਨੀ ਸਵ: ਸੁਖਪਾਲ ਸਿੰਘ ਵਾਸੀ ਨਾਨਕਪੁਰਾ ਧੌਲਾ ਦੀ ਵਿਧਵਾ ਪੈਨਸ਼ਨ ਅਤੇ ਉਸ ਦੀ ਬੇਟੀ ਦੀ ਆਸ਼ਰਿਤ ਪੈਨਸ਼ਨ ਮਨਜ਼ੂਰ ਕਰਕੇ ਉਸ ਦੇ ਕਾਗਜ਼ਾਤ ਉਸ ਨੂੰ ਆਪਣੇ ਦਫਤਰ ਵਿਖੇ ਸੌਂਪੇ। ਜ਼ਿਕਰਯੋਗ ਹੈ ਕਿ ਪਿਛਲੇਂ ਦਿਨੀਂ ਬਲਜੀਤ ਕੌਰ ਸਬੰਧੀ ਖ਼ਬਰਾਂ ਛਪੀਆਂ ਸਨ, ਜਿਸ ਵਿਚ ਉਸ ਨੇ ਦੱਸਿਆ ਸੀ ਕਿ ਉਸਦੇ ਪਤੀ ਦੀ ਮੌਤ ਤੋਂ ਬਾਅਦ ਉਸ ਦਾ ਗੁਜ਼ਾਰਾ ਔਖਾ ਹੋ ਗਿਆ ਹੈ। ਡਿਪਟੀ ਕਮਿਸ਼ਨਰ ਨੇ ਜ਼ਿਲ੍ਹਾ ਸਮਾਜਿਕ ਸੁਰੱਖਿਆ ਅਫਸਰ ਡਾ. ਤੇਆਵਾਸਪ੍ਰੀਤ ਕੌਰ ਨੂੰ ਬਲਜੀਤ ਕੌਰ ਅਤੇ ਉਸ ਦੇ ਬੇਟੀ ਦੀ ਪੈਨਸ਼ਨ ਲਗਾਉਣ ਦੇ ਦਿਸ਼ਾ ਨਿਰਦੇਸ਼ ਦਿੱਤੇ,ਇਸ ਉਪਰੰਤ ਸਾਰੀ ਕਾਰਵਾਈ ਪੂਰਨ ਕੀਤੀ ਗਈ। ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਨਾਲ ਹੀ ਬਲਜੀਤ ਕੌਰ ਦੇ ਨੈਸ਼ਨਲ ਫੈਮਿਲੀ ਬੈਨੇਫਿਟ ਸਕੀਮ ਅਧੀਨ ਕਾਗ਼ਜ਼ ਭਰ ਦਿੱਤੇ ਗਏ ਹਨ ਜਿਸ ਨਾਲ ਉੇਸ ਨੂੰ ਸਰਕਾਰ ਵੱਲੋਂ 20,000 ਰੁਪਏ ਦੀ ਮਾਲੀ ਮਦਦ ਮਿਲੇਗੀ। ਉਹਨਾਂ ਦੱਸਿਆ ਕਿ ਪਰਿਵਾਰ ਨੂੰ ਪੈਨਸ਼ਨ ਵੀ ਜਲਦ ਹੀ ਮਿਲਣੀ ਸ਼ੁਰੂ ਹੋ ਜਾਵੇਗੀ। ਇਸ ਤੋਂ ਇਲਾਵਾ ਵੀ ਲੋੜ ਅਨੁਸਾਰ ਪਰਿਵਾਰ ਦੀ ਮਦਦ ਕੀਤੀ ਜਾਵੇਗੀ।
