-ਹਲਕਾ ਵਿਧਾਇਕ ਨੂੰ ਘਰੇਲੂ ਖੇਤਰ ‘ਚ ਚੁਣੌਤੀ ਦੇਣ ਦੀ ਬਣਾਈ ਜਾ ਰਹੀ ਹੈ ਨੀਤੀ
ਬਰਨਾਲਾ 28 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ)-
ਸ਼੍ਰੋਮਣੀ ਅਕਾਲੀ ਦਲ ਨੇ ਲੰਘੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਅਣਕਿਆਸੀ ਹਾਰ ਤੋਂ ਬਾਅਦ ਮੁੜ ਪੈਰਾਂ ਸਿਰ ਹੋਣ ਲਈ ਸਰਗਰਮੀਆਂ ਆਰੰਭ ਕਰ ਦਿੱਤੀਆਂ ਹਨ । ਪਾਰਟੀ ਵੱਲੋਂ ਨਿਯੁਕਤ ਕੀਤੇ ਜ਼ਿਲ੍ਹਾ ਅਬਜਰਵਰਾਂ ਨੇ ਹਲਕਾਵਾਈਜ਼ ਸਥਾਨਕ ਆਗੂਆਂ ਦੀਆਂ ਮੀਟਿੰਗਾਂ ਦਾ ਸਿਲਸਿਲਾ ਸ਼ੁਰੂ ਕੀਤਾ ਹੋਇਆ ਹੈ ਤਾਂ ਜੋ ਪਾਰਟੀ ਨਾਲ ਪੱਕੇ ਤੌਰ ‘ਤੇ ਡੱਟ ਕੇ ਖੜੇ ਸਥਾਨਕ ਆਗੂਆਂ ਤੋਂ ਰਾਇ ਲੈ ਕੇ ਪਾਰਟੀ ਨੂੰ ਲੱਗੇ ਖੋਰੇ ਕਾਰਨ ਹੋਏ ਨੁਕਸਾਨ ਦੀ ਭਰਪਾਈ ਦੀਆਂ ਸਰਗਰਮੀਆਂ ਸ਼ੁਰੂ ਕੀਤੀਆ ਜਾਣ। ਇਸੇ ਮੁਹਿੰਮ ਤਹਿਤ ਜ਼ਿਲ੍ਹਾ ਬਰਨਾਲਾ ਦੇ ਅਬਜਰਵਰ ਸੀਨੀਅਰ ਅਕਾਲੀ ਆਗੂ ਇਕਬਾਲ ਸਿੰਘ ਝੂੰਦਾਂ ਨੇ ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ਦੇ ਸਥਾਨਕ ਚੋਟੀ ਦੇ ਆਗੂਆਂ ਦੀ ਮੀਟਿੰਗ ਕੀਤੀ। ਮੀਟਿੰਗ ਵਿੱਚ ਪਾਰਟੀ ਨੂੰ ਪਿੰਡ ਪੱਧਰ ‘ਤੇ ਮਜ਼ਬੂਤ ਕਰਨ ਦੇ ਨੁਕਤਿਆਂ ਸਮੇਤ ਹਲਕਾ ਇੰਚਾਰਜ ਲਗਾਉਣ ਦੀ ਵੀ ਗੰਭੀਰਤਾ ਨਾਲ ਵਿਚਾਰ ਹੋਈ ਦੱਸੀ ਜਾਂਦੀ ਹੈ। ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਮਾੜੀ ਹਾਲਤ ਹੋਣ ਤੋਂ ਬਾਅਦ ਸ਼੍ਰੋਮਣੀ ਅਕਾਲੀ ਦਲ ਹੁਣ “ਗਰਮ ਦੁੱਧ ਨਾਲ ਬੁੱਲ੍ਹ ਸੜਨ ਤੋਂ ਬਾਅਦ, ਫੂਕਾਂ ਮਾਰ-ਮਾਰ ਲੱਸੀ ਪੀਣ” ਦੀ ਨੀਤੀ ‘ਤੇ ਚੱਲ ਰਿਹਾ ਜਾਪਦਾ ਹੈ, ਨਹੀਂ ਤਾਂ ਪਹਿਲਾਂ ਮਾਰਕੀਟ ਕਮੇਟੀ ਦੀ ਚੇਅਰਮੈਨੀ ਤੋਂ ਲੈ ਕੇ ਹਲਕਾ ਇੰਚਾਰਜ ਤੱਕ ਦੀਆਂ ਨਿਯੁਕਤੀਆਂ ਦੇ ਮਾਮਲੇ ਵਿੱਚ ਟਕਸਾਲੀ ਆਗੂਆਂ ਦੀ ਬਲੀ ਦੇ ਕੇ ਉਪਰੋਂ ਹੀ ਫ਼ੈਸਲੇ ਥੋਪੇ ਜਾਂਦੇ ਸਨ । ਭਰੋਸੇਯੋਗ ਸੂਤਰਾਂ ਅਨੁਸਾਰ ਇਕਬਾਲ ਸਿੰਘ ਝੂੰਦਾਂ ਨੇ ਸਥਾਨਕ ਆਗੂਆਂ ਤੋਂ ਹਲਕਾ ਇੰਚਾਰਜ ਲਗਾਉਣ ਸਬੰਧੀ ਰਾਏ ਮੰਗੀ ਜਿਸ ਤੋਂ ਬਾਅਦ ਮੀਟਿੰਗ ਵਿੱਚ ਸ਼ਾਮਲ ਬਹੁਤੇ ਆਗੂਆਂ ਨੇ ਮਹਿਲ ਕਲਾਂ ਪਿੰਡ ਦੇ ਪਟੜੀਫੇਰ ਇਕ ਵੱਡੇ ਪਿੰਡ ਦੇ ਇੱਕ ਸਰਗਰਮ ਨੌਜਵਾਨ ਦੇ ਨਾਮ ‘ਤੇ ਗ਼ੌਰ ਕਰਨ ਦੀ ਸਲਾਹ ਦਿੱਤੀ। ਧਿਆਨਦੇਣ ਯੋਗ ਹੈ ਕਿ ਜ਼ਿਲ੍ਹੇ ਦੇ ਅਬਜਰਵਰ ਵੱਲੋਂ ਬੁਲਾਈ ਵਿਸ਼ੇਸ਼ ਮੀਟਿੰਗ ਵਿੱਚ ਹਲਕਾ ਇੰਚਾਰਜੀ/ ਆਉਣ ਵਾਲੀਆਂ ਚੋਣਾਂ ਵਿੱਚ ਟਿਕਟ ਦੇ ਦਾਅਵੇਦਾਰ ਦਲਿਤ ਆਗੂ ਹਾਜ਼ਰ ਨਹੀਂ ਸਨ । ਇਹ ਵੀ ਪਤਾ ਲੱਗਿਆ ਹੈ ਕਿ ਚਲਦੀ ਮੀਟਿੰਗ ਵਿੱਚ ਜਦ ਹਲਕਾ ਇੰਚਾਰਜ ਦਾ ਦਾਅਵੇਦਾਰ ਇੱਕ ਦਲਿਤ ਆਗੂ ਸ਼ਾਮਲ ਹੋਇਆ ਤਾਂ ਅਬਜਰਵਰ ਨੇ ਉਸ ਨੂੰ ਮੀਟਿੰਗ ਤੋਂ ਬਾਹਰ ਜਾਣ ਲਈ ਕਿਹਾ, ਜਿਸ ਤੋਂ ਬਾਅਦ ਉਹ ਦਲਿਤ ਆਗੂ ਮੀਟਿੰਗ ਤੋਂ ਬਾਹਰ ਚਲਾ ਗਿਆ । ਸੂਤਰਾਂ ਅਨੁਸਾਰ ਸ਼੍ਰੋਮਣੀ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਦੀ ਨਿਯੁਕਤੀ ਸਬੰਧੀ ਸਥਾਨਕ ਆਗੂਆਂ ਵਿਚੋਂ ਬਹੁਤੇ ਆਗੂਆਂ ਦੀ ਇਹੋ ਰਾਇ ਰਹੀ ਕਿ ਬਤੌਰ ਹਲਕਾ ਇੰਚਾਰਜ ਮਹਿਲ ਕਲਾਂ ਖੇਤਰ ਦੇ ਕਿਸੇ ਨੌਜਵਾਨ ਆਗੂ ਨੂੰ ਇਹ ਜ਼ਿੰਮੇਵਾਰੀ ਦਿੱਤੀ ਜਾਣੀ ਚਾਹੀਦੀ ਹੈ । ਹਲਕਾ ਮਹਿਲ ਕਲਾਂ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਹਲਕਾ ਵਿਧਾਇਕ ਦੀਆਂ ਸਰਗਰਮੀਆਂ ਉਪਰ ਨੇੜੇ ਤੋਂ ਨਜ਼ਰ ਰੱਖ ਰਿਹਾ ਹੈ ਤਾਂ ਜੋ ਆਮ ਆਦਮੀ ਪਾਰਟੀ ਦੇ ਹਲਕਾ ਵਿਧਾਇਕ ਨੂੰ ਮਹਿਲਕਲਾਂ ਖੇਤਰ ਵਿੱਚ ਉਲਝਾਉਣ ਲਈ ਬਰਾਬਰ ਦਾ ਨੌਜਵਾਨ ਆਗੂ ਮੈਦਾਨ ਵਿੱਚ ਉਤਾਰਿਆ ਜਾਵੇ। ਸ਼੍ਰੋਮਣੀ ਅਕਾਲੀ ਦਲ ਜੇਕਰ ਹਲਕੇ ਦੇ ਆਗੂ ਦੀ ਚੋਣ ਸਬੰਧੀ ਸਹੀ ਫ਼ੈਸਲਾ ਲੈ ਲੈਂਦਾ ਹੈ ਤਾਂ ਆਮ ਆਦਮੀ ਪਾਰਟੀ ਦੇ ਵੱਡੇ ਆਗੂਆਂ ਦੇ ਨਾਮ ‘ਤੇ ਦੋ ਵਾਰ ਜਿੱਤ ਦਰਜ ਕਰਨ ਵਾਲੇ ਹਲਕਾ ਵਿਧਾਇਕ ਨੂੰ ਤਕੜੀ ਚਣੌਤੀ ਮਿਲਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
