ਚੰਡੀਗੜ੍ਹ, 29 ਜੂਨ -ਪੰਜਾਬ ਦੇ ਗਵਰਨਰ ਤੇ ਮੁੱਖ ਮੰਤਰੀ ਵਿਚਕਾਰ ਖਿੱਚੋਤਾਣ ਦੇ ਚੱਲਦਿਆਂ ਪੰਜਾਬ ਸਰਕਾਰ ਨੇ 19-20 ਜੂਨ ਦੇ ਵਿਸ਼ੇਸ਼ ਇਜਲਾਸ ਵਿੱਚ ਪਾਸ ਕੀਤੇ ਦੋ ਬਿੱਲ ਗਵਰਨਰ ਬੀ ਐਲ ਪੁਰੋਹਿਤ ਨੂੰ ਮਨਜ਼ੂਰੀ ਲਈ ਭੇਜੇ ਹਨ । ਸਰਕਾਰ ਨੇ ਗੁਰਦਵਾਰਾ (ਸੋਧ) ਅਤੇ ਪੁਲਿਸ (ਸੋਧ) ਬਿੱਲ ਪਾਸ ਕਰਵਾਉਣ ਲਈ ਗਵਰਨਰ ਨੂੰ ਭੇਜੇ ਹਨ । ਜ਼ਿਕਰਯੋਗ ਹੈ ਕਿ ਸਰਕਾਰ ਨੇ ਚਾਰ ਬਿੱਲ ਪਾਸ ਕੀਤੇ ਸਨ ਜਿਨ੍ਹਾਂ ਵਿਚੋਂ ਦੋ ਬਿੱਲ ਹੀ ਗਵਰਨਰ ਨੂੰ ਭੇਜੇ ਗਏ ਹਨ । ਚਰਚਾ ਹੈ ਕਿ ਸਰਕਾਰ ਗਵਰਨਰ ਦਾ ਮੂਡ ਵੇਖਣਾ ਚਾਹੁੰਦੀ ਹੈ ਸ਼ਾਇਦ ਇਸੇ ਕਰਕੇ ਫਿਲਹਾਲ ਮਨਜ਼ੂਰੀ ਲਈ ਦੋ ਬਿੱਲ ਸਰਕਾਰ ਨੇ ਗਵਰਨਰ ਨੂੰ ਭੇਜੇ ਹਨ । ਪੰਜਾਬ ਦੀ “ਆਪ” ਸਰਕਾਰ ਲਈ ਇਹ ਦੋਵੇਂ ਬਿੱਲ ਗਵਰਨਰ ਤੋਂ ਪਾਸ ਕਰਵਾਉਣ ਲਈ ਇੱਕ ਵੱਡੀ ਚੁਣੌਤੀ ਹੈ ਕਿਉਂਕਿ ਇਕ ਪਾਸੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਗਵਰਨਰ ਨੂੰ ਮਿਲ ਕੇ ਗੁਰਦੁਆਰਾ ਬਿੱਲ ਦਾ ਵਿਰੋਧ ਕਰ ਚੁੱਕੀ ਹੈ ਅਤੇ ਦੂਜੇ ਪਾਸੇ ਗਵਰਨਰ ਤੇ ਮੁੱਖ ਮੰਤਰੀ ਵਿਚਕਾਰ ਮਾਹੌਲ ਸਾਜ਼ਗਾਰ ਨਹੀਂ ਹੈ । ਹੁਣ ਸਭ ਦੀਆਂ ਨਜ਼ਰਾਂ ਗਵਰਨਰ ‘ਤੇ ਟਿਕੀਆਂ ਹੋਈਆਂ ਹਨ ਕਿ ਇਨ੍ਹਾਂ ਬਿੱਲਾਂ ਨੂੰ ਮਨਜ਼ੂਰੀ ਦਿੰਦੇ ਹਨ ਜਾਂ ਇਹ ਬਿੱਲ ਰਾਜਭਵਨ ਦੇ ਮੇਜ਼ ‘ਤੇ ਕਾਨੂੰਨ ਦੀਆਂ ਘੁੰਮਣਘੇਰੀਆਂ ਵਿਚ ਫਸ ਜਾਣਗੇ । ਕਾਨੂੰਨੀ ਮਾਹਿਰਾਂ ਅਨੁਸਾਰ “ਆਪ” ਸਰਕਾਰ ਦੇ ਇਨ੍ਹਾਂ ਬਿੱਲਾਂ ਨੂੰ ਗਵਰਨਰ ਦੀ ਮਨਜ਼ੂਰੀ ਮਿਲਣ ਦੇ ਆਸਾਰ ਘੱਟ ਹਨ । ਦੂਜੇ ਪਾਸੇ ਜੇਕਰ ਇਹਨਾਂ ਬਿੱਲਾਂ ਨੂੰ ਗਵਰਨਰ ਦੀ ਮਨਜ਼ੂਰੀ ਨਹੀਂ ਮਿਲਦੀ ਤਾਂ ਭਗਵੰਤ ਮਾਨ ਸਰਕਾਰ ਅਦਾਲਤ ਜਾਣ ਦੀ ਤਿਆਰੀ ਖਿੱਚੀ ਬੈਠੀ ਹੈ ।
ਪੰਜਾਬ ਸਰਕਾਰ ਨੇ ਮਨਜ਼ੂਰੀ ਲਈ ਗਵਰਨਰ ਨੂੰ ਗੁਰਦੁਆਰਾ ਅਤੇ ਪੁਲਿਸ ਸੋਧ ਬਿੱਲ ਭੇਜੇ
