ਚੰਡੀਗੜ੍ਹ 29 ਜੂਨ-ਕਾਂਗਰਸ ਪਾਰਟੀ ਨੇ ਅਮਰੀਕਾ ਤੋਂ ਡਰੋਨ ਖਰੀਦਣ ਦੇ ਸੌਦੇ ਨੂੰ ਇੱਕ ਵੱਡਾ ਘੋਟਾਲਾ ਦੱਸਿਆ ਹੈ । ਕਾਂਗਰਸ ਦੇ ਬੁਲਾਰੇ ਪਵਨ ਖੇੜਾ ਨੇ ਕਿਹਾ ਕਿ ਇਹ “ਰਾਫੇਲ” ਤੋਂ ਵੀ ਵੱਡਾ ਘੁਟਾਲਾ ਹੈ । ਜ਼ਿਕਰਯੋਗ ਹੈ ਕਿ ਪਿਛਲੇ ਦਿਨੀ ਅਮਰੀਕਾ ਦੌਰੇ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅਮਰੀਕਾ ਤੋਂ ਡਰੋਨ ਖਰੀਦਣ ਦੇ 25 ਹਜ਼ਾਰ 200 ਕਰੋੜ ਰੁਪੈ ਦੇ ਸੌਦੇ ਨੂੰ ਅੰਤਮ ਰੂਪ ਦਿੱਤਾ ਹੈ । ਕਾਂਗਰਸ ਦਾ ਕਹਿਣਾ ਹੈ ਕਿ ਜਿਸ ਕੀਮਤ ‘ਤੇ ਭਾਰਤ ਨੇ ਇਹ ਡਰੋਨ ਖਰੀਦਣੇ ਹਨ, ਬਾਕੀ ਦੇਸ਼ ਉਸ ਕੀਮਤ ਤੋਂ ਚਾਰ ਗੁਣਾ ਘੱਟ ਕੀਮਤ ‘ਤੇ ਇਹ ਖਰੀਦ ਰਹੇ ਹਨ । ਪਵਨ ਖੇੜਾ ਨੇ ਕਿਹਾ ਕਿ ਅਸੀਂ ਇੱਕ ਡਰੋਨ 812 ਕਰੋੜ ਦਾ ਖਰੀਦ ਰਹੇ ਹਾਂ ਜਦਕਿ DRDO ਅਜਿਹੇ ਡਰੋਨ 10-20% ਕੀਮਤ ‘ਤੇ ਬਣਾ ਸਕਦਾ ਹੈ । ਦੱਸਣਯੋਗ ਹੈ ਕਿ ਅਮਰੀਕਾ ਦੀ ਜਨਰਲ ਐਟਾਮਿਕਸ ਕੰਪਨੀ ਤੋਂ ਭਾਰਤ 31 ਡਰੋਨ ਖਰੀਦ ਰਿਹਾ ਹੈ । ਇਹ ਡਰੋਨ ਕਰੀਬ 35 ਘੰਟੇ ਹਵਾ ‘ਚ ਰਹਿ ਸਕਦਾ ਹੈ ਇਸ ਦਾ ਸਾਰਾ ਸਿਸਟਮ ਰੀਮੋਟ ਕੰਟਰੋਲਡ ਹੈ । ਇਹ ਡਰੋਨ ਇੱਕ ਵਾਰ ਉਡਾਨ ਭਰਨ ਤੋਂ ਬਾਅਦ 1900 ਕਿਲੋਮੀਟਰ ਦੇ ਇਲਾਕੇ ਤੱਕ ਕ ਦੀ ਨਿਗਰਾਨੀ ਕਰਦਾ ਹੈ । ਕੰਪਨੀ ਨਾਲ ਹੋਏ ਸੌਦੇ ਮੁਤਾਬਿਕ ਜੁਲਾਈ ਮਹੀਨੇ ਡਰੋਨ ਭਾਰਤ ਪੁੱਜਣੇ ਸ਼ੁਰੂ ਹੋ ਜਾਣਗੇ । ਕਾਂਗਰਸ ਪਾਰਟੀ ਨੇ ਡਰੋਨ ਦੀਆਂ ਕੀਮਤਾਂ ‘ਤੇ ਸਵਾਲ ਚੁੱਕਦੇ ਹੋਏ ਕਿਹਾ ਕਿ ਇਹ “ਰਾਫੇਲ ਤੋਂ ਵੀ ਵੱਡਾ ਘੁਟਾਲਾ” ਹੈ ।
Menu
