Gee98 news service…ਵਿਸ਼ੇਸ਼ ਰਿਪੋਰਟ
ਬਰਨਾਲਾ,25 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-ਬਰਨਾਲਾ ਜ਼ਿਲ੍ਹੇ ਵਿੱਚ ਸੱਤਾਧਾਰੀ ਪਾਰਟੀ ਨਾਲ ਸਬੰਧਿਤ ਚਾਹਵਾਨਾਂ ਨੂੰ ਚਾਰ ਮਾਰਕੀਟ ਕਮੇਟੀਆਂ ਦੀਆਂ ਚੇਅਰਮੈਨੀ ਦੀਆਂ ਖਾਲੀ ਪਈਆਂ ਕੁਰਸੀਆਂ ਰੜਕ ਰਹੀਆਂ ਹਨ। ਬਰਨਾਲਾ ਵਿੱਚ ਕੁੱਲ ਪੰਜ ਮਾਰਕੀਟ ਕਮੇਟੀਆਂ ਬਰਨਾਲਾ, ਤਪਾ, ਭਦੌੜ, ਮਹਿਲ ਕਲਾਂ ਅਤੇ ਧਨੌਲਾ ਹਨ ਜਿਨਾਂ ਵਿੱਚੋਂ ਇਕ ਮਾਰਕੀਟ ਕਮੇਟੀ ਤਪਾ ਦੇ ਚੇਅਰਮੈਨ ਦੀ ਨਿਯੁਕਤੀ ਹੋਈ ਹੈ ਅਤੇ ਚਾਰ ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨ ਦੀਆਂ ਕੁਰਸੀਆਂ ਸਬੰਧਤ ਵਿਧਾਨ ਸਭਾ ਹਲਕਾ ਦੇ ਸਿਆਸੀ ਆਕਾ ਦੇ ਹੁਕਮਾਂ ਨੂੰ ਉਡੀਕ ਰਹੀਆਂ ਹਨ। ਬਰਨਾਲਾ, ਭਦੌੜ, ਮਹਿਲ ਕਲਾਂ ਤੇ ਧਨੌਲਾ ਵਿੱਚ ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨ ਬਣਨ ਲਈ ਉਤਾਵਲੇ ਆਮ ਆਦਮੀ ਪਾਰਟੀ ਦੇ ਆਗੂ ਇਹਨਾਂ ਖਾਲੀ ਕੁਰਸੀਆਂ ਕਾਰਨ ਸਿਆਸੀ ਤਕਲੀਫ਼ ਮੰਨ ਰਹੇ ਹਨ ਕਿਉਂਕਿ ਗਾਹੇ-ਬਗਾਹੇ ਸੋਸ਼ਲ ਮੀਡੀਆ ‘ਤੇ ਇਹਨਾਂ ਆਗੂਆਂ ਦੀਆਂ ਪੋਸਟਾਂ ਸਪੱਸ਼ਟ ਕਰ ਰਹੀਆਂ ਹਨ ਕਿ ਸਰਕਾਰ ਵੱਲੋਂ ਸਰਕਾਰ ਬਣਨ ਤੋਂ ਲੈ ਕੇ ਦੋ ਸਾਲਾਂ ਤੱਕ ਵੀ ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨਾਂ ਦੀ ਨਾਮਜ਼ਦਗੀ ਨਾ ਕੀਤੇ ਜਾਣ ਕਰਕੇ ਚਾਹਵਾਨ ਆਗੂ ਔਖੇ ਹਨ। ਸੂਤਰਾਂ ਅਨੁਸਾਰ ਅਜੇ ਇਹਨਾਂ ਚਾਹਵਾਨਾਂ ਨੂੰ ਹੋਰ ਉਡੀਕ ਕਰਨੀ ਪਵੇਗੀ ਕਿਉਂਕਿ ਪੰਜਾਬ ਦੇ ਸਿਆਸੀ ਮਾਹੌਲ ਅਨੁਸਾਰ ਪੰਚਾਇਤ ਚੋਣਾਂ ਤੇ ਲੋਕ ਸਭਾ ਦੀਆਂ ਚੋਣਾਂ ਤੋਂ ਬਾਅਦ ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨਾਂ ਦੇ ਖਾਲੀ ਅਹੁਦੇ ਭਰੇ ਜਾ ਸਕਦੇ ਹਨ। ਉੰਝ ਭਾਵੇਂ ਸੂਬੇ ‘ਚ ਕੁਝ ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨ ਨਿਯੁਕਤ ਵੀ ਕੀਤੇ ਜਾ ਚੁੱਕੇ ਹਨ ਪ੍ਰੰਤੂ ਬਾਕੀ ਬਚੀਆਂ ਮਾਰਕੀਟ ਕਮੇਟੀਆਂ ਸਬੰਧੀ ਆਮ ਆਦਮੀ ਪਾਰਟੀ ਰਵਾਇਤੀ ਸਿਆਸੀ ਪਾਰਟੀਆਂ ਦੇ ਨਕਸ਼ੇ ਕਦਮ ‘ਤੇ ਚੱਲ ਰਹੀ ਹੈ ਕਿਉਂਕਿ ਕਾਂਗਰਸ ਤੇ ਅਕਾਲੀ ਦਲ-ਭਾਜਪਾ ਵੱਲੋਂ ਵੀ ਆਪਣੀਆਂ ਸਰਕਾਰਾਂ ਮੌਕੇ ਸੱਤਾ ਦੇ ਦੋ-ਢਾਈ ਸਾਲ ਲੰਘ ਜਾਣ ਤੋਂ ਬਾਅਦ ਹੀ ਚੇਅਰਮੈਨ ਨਾਮਜ਼ਦ ਕੀਤੇ ਜਾਂਦੇ ਸਨ । ਅਜਿਹਾ ਇਸ ਕਰਕੇ ਵੀ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਜੇਕਰ ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਬਾਕੀ ਬਚੀਆਂ ਮਾਰਕੀਟ ਕਮੇਟੀਆਂ ਚੇਅਰਮੈਨ ਨਾਮਜ਼ਦ ਕਰ ਦਿੱਤੇ ਜਾਂਦੇ ਹਨ ਤਾਂ ਚੇਅਰਮੈਨੀ ਤੋਂ ਵਾਂਝੇ ਰਹੇ ਚਾਹਵਾਨ ਭਮੱਕੜ ਪੁੱਠਾ ਝਾੜੂ ਵੀ ਫੇਰ ਸਕਦੇ ਹਨ। ਸ਼ਾਇਦ ਇਸੇ ਕਰਕੇ ਜ਼ਿਲ੍ਹੇ ਦੇ ਤਿੰਨਾਂ ਹਲਕਿਆਂ ਵਿੱਚ ਖਾਲੀ ਮਾਰਕੀਟ ਕਮੇਟੀਆਂ ਦੇ ਚੇਅਰਮੈਨਾਂ ਸਬੰਧੀ “ਉਪਰਲੀ ਕਿਰਪਾ” ਰੁਕੀ ਹੋਈ ਹੈ। ਇੱਥੇ ਇਹ ਵੀ ਦੱਸ ਦਈਏ ਕਿ ਮਾਰਕੀਟ ਕਮੇਟੀ ਬਰਨਾਲਾ, ਭਦੌੜ, ਮਹਿਲ ਕਲਾਂ, ਧਨੌਲਾ ਲਈ “ਇੱਕ ਅਨਾਰ ਸੌ ਬਿਮਾਰ” ਵਾਲੀ ਸਥਿਤੀ ਬਣੀ ਹੋਈ ਹੈ ਭਾਵ ਕਿ ਇੱਕ ਤੋਂ ਵੱਧ ਦਾਅਵੇਦਾਰ ਮੈਦਾਨ ਵਿੱਚ ਨਿਤਰੇ ਹੋਏ ਹਨ। ਇਹਨਾਂ ਦਾਅਵੇਦਾਰਾਂ ਨੂੰ ਪੱਤਰਕਾਰਾਂ ਵੱਲੋਂ ਜਦੋਂ ਕਦੇ ਪੁੱਛਿਆ ਜਾਂਦਾ ਹੈ ਕਿ “ਕਦੋਂ ਬਣ ਰਹੇ ਹੋ ਚੇਅਰਮੈਨ”, ਤਾਂ ਇਹ ਚੀਸ ਜਿਹੀ ਵੱਟ ਕੇ ਆਖ ਦਿੰਦੇ ਹਨ “ਕੋਈ ਪਤਾ ਨਹੀਂ, ਇਹ ਤਾਂ ਲੀਡਰਾਂ ਨੂੰ ਪਤਾ, ਕਦੋਂ ਕਿਰਪਾ ਹੋਵੇਗੀ”। ਵਿਧਾਨ ਸਭਾ ਹਲਕਾ ਬਰਨਾਲਾ ‘ਚ ਧਨੌਲਾ ਅਤੇ ਬਰਨਾਲਾ, ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ‘ਚ ਮਹਿਲ ਕਲਾਂ ਅਤੇ ਵਿਧਾਨ ਸਭਾ ਹਲਕਾ ਭਦੌੜ ਵਿੱਚ ਭਦੌੜ ਮਾਰਕੀਟ ਕਮੇਟੀ ਦੇ ਚੇਅਰਮੈਨਾਂ ਲਈ ਇਹਨਾਂ ਹਲਕਿਆਂ ਦੇ ਸਿਆਸੀ ਸਰਦਾਰਾਂ ਵੱਲੋਂ ਲਗਭਗ ਦੋ ਸਾਲਾਂ ਤੱਕ ਵੀ ਯੋਗ ਵਰਕਰਾਂ ਦੀ ਤਲਾਸ਼ ਨਾ ਕੀਤੇ ਜਾਣ ਕਰਕੇ ਇਹਨਾਂ ਹਲਕਿਆਂ ਵਿੱਚ ਕਈ ਕਈ ਦਾਅਵੇਦਾਰਾਂ ਲਈ ਮਾਰਕੀਟ ਕਮੇਟੀ ਦੀ ਚੇਅਰਮੈਨੀ “ਊਠ ਦਾ ਬੁੱਲ” ਬਣੀ ਹੋਈ ਹੈ ਜਿਸ ਦੇ ਡਿੱਗਣ ਦੀ ਉਡੀਕ ਵਿੱਚ ਚਾਹਵਾਨਾਂ ਦੀਆਂ ਨਜ਼ਰਾਂ ਆਪਣੇ ਆਪਣੇ ਸਿਆਸੀ ਆਕਾਵਾਂ ‘ਤੇ ਟਿਕੀਆਂ ਹੋਈਆਂ ਹਨ । ਸੱਤਾਧਾਰੀ ਪਾਰਟੀ ਦੇ ਆਗੂਆਂ ਨਾਲ ਜਦੋਂ ਇਸ ਮਸਲੇ ‘ਤੇ ਰਸਮੀ ਤੌਰ ‘ਤੇ ਗੱਲਬਾਤ ਕੀਤੀ ਜਾਂਦੀ ਹੈ ਤਾਂ ਕੋਈ ਵੀ ਖੁੱਲ੍ਹ ਕੇ ਦੱਸਣ ਲਈ ਤਿਆਰ ਨਹੀਂ ਹੈ ਕਿ ਆਖ਼ਰ ਮਾਮਲਾ ਕਿੱਥੇ ਕੁ ਲਟਕਿਆ ਹੋਇਆ ਹੈ। ਕੀ ਇਹ ਮੰਨ ਲਿਆ ਜਾਵੇ ਕਿ ਤਿੰਨੋ ਵਿਧਾਨ ਸਭਾ ਹਲਕਿਆਂ ਦੇ ਵਿਧਾਇਕਾਂ ਨੇ ਯੋਗ ਵਰਕਰਾਂ ਦੀ ਤਲਾਸ਼ ਕਰਕੇ ਉਹਨਾਂ ਦੇ ਨਾਮ ਚੇਅਰਮੈਨੀਆਂ ਲਈ ਉੱਪਰ ਨਹੀਂ ਭੇਜੇ ਜਾਂ ਫਿਰ ਜੇਕਰ ਵਿਧਾਇਕਾਂ ਨੇ ਯੋਗ ਵਰਕਰਾਂ ਦੀਆਂ ਸੂਚੀਆਂ ਉਪਰ ਭੇਜ ਦਿੱਤੀਆਂ ਹਨ ਤਾਂ ਕਿ ਇਹਨਾਂ ਸੂਚੀਆਂ ਨੂੰ “ਫਾਈਨਲ” ਕਰਵਾਉਣ ਵਿੱਚ ਦੇਰੀ ਕਿਉਂ ਹੋ ਰਹੀ ਹੈ। ਫਿਰ ਵੀ ਇੱਕ ਗੱਲ ਤਾਂ ਪੱਕੀ ਜਾਪਦੀ ਹੈ ਕਿ ਲੋਕ ਸਭਾ ਦੀਆਂ ਚੋਣਾਂ ਤੋਂ ਬਾਅਦ ਹੀ ਮਾਰਕੀਟ ਕਮੇਟੀਆਂ ਦੀ ‘ਚੇਅਰਮੈਨੀ ਦੇ ਰੂਪ ਵਿੱਚ ਅੰਬੀਆਂ ਦਾ ਬੂਰ’ ਚਾਹਵਾਨ ਵਰਕਰਾਂ ਦੀ ਝੋਲੀ ਵਿੱਚ ਮਿੱਠੇ ਅੰਬ ਬਣ ਕੇ ਡਿੱਗੇਗਾ, ਉਦੋਂ ਤੱਕ ਇਹਨਾਂ ਵਰਕਰਾਂ ਨੂੰ “ਕੱਚੇ ਕਿੰਨੂਆਂ ਦੀ ਖਟਾਸ” ਵਾਲੇ ਮਾਹੌਲ ਵਿੱਚ ਹੀ ਰਹਿਣਾ ਪਵੇਗਾ।
Menu
