ਚੰਡੀਗੜ੍ਹ,29 ਜਨਵਰੀ-ਕਿਸੇ ਕਾਰਨ ਪਤੀ ਤੋਂ ਵੱਖ ਰਹਿ ਰਹੀ ਪਤਨੀ ਜੇਕਰ ਪਤੀ ਤੋਂ ਗੁਜ਼ਾਰੇ ਭੱਤੇ ਦੀ ਮੰਗ ਕਰੇ ਤਾਂ ਪਤੀ ਦੀ ਭਾਵੇਂ ਕਿਸੇ ਨੌਕਰੀ ਤੋਂ ਕੋਈ ਆਮਦਨ ਹੋਵੇ ਜਾਂ ਨਾ ਹੋਵੇ ਫਿਰ ਵੀ ਪਤਨੀ ਨੂੰ ਗੁਜ਼ਾਰਾ ਭੱਤਾ ਦੇਣਾ ਹੀ ਪਵੇਗਾ। ਇਲਾਹਾਬਾਦ ਹਾਈਕੋਰਟ ਨੇ ਅਜਿਹਾ ਫੈਸਲਾ ਸੁਣਾਉਂਦੇ ਹੋਏ ਇੱਕ ਮਜ਼ਦੂਰ ਪਤੀ ਨੂੰ ਆਪਣੀ ਵੱਖ ਰਹਿੰਦੀ ਪਤਨੀ ਨੂੰ ਗੁਜ਼ਾਰਾ ਭੱਤਾ ਦੇਣ ਦਾ ਹੁਕਮ ਦਿੱਤਾ ਹੈ। ਦਰਅਸਲ ਇਸ ਤੋਂ ਪਹਿਲਾਂ ਪਰਿਵਾਰਕ ਅਦਾਲਤ ਨੇ ਵੀ ਪਤੀ ਨੂੰ ਹੁਕਮ ਦਿੱਤਾ ਸੀ ਕਿ ਉਹ ਆਪਣੀ ਪਤਨੀ ਨੂੰ ਖਰਚਾ ਦੇਵੇ ਪਰੰਤੂ ਪਤੀ ਨੇ ਪਰਿਵਾਰਿਕ ਅਦਾਲਤ ਦੇ ਹੁਕਮਾਂ ਦੇ ਖ਼ਿਲਾਫ਼ ਹਾਈਕੋਰਟ ਤੱਕ ਪਹੁੰਚ ਕੀਤੀ ਸੀ। ਹਾਈਕੋਰਟ ਵਿੱਚ ਪਤੀ ਨੇ ਤਰਕ ਦਿੱਤਾ ਕਿ ਉਹ ਇੱਕ ਅਕੁਸ਼ਲ ਮਜ਼ਦੂਰ ਹੈ, ਉਸ ਕੋਲ ਆਮਦਨ ਦਾ ਕੋਈ ਸਾਧਨ ਨਹੀਂ ਜਿਸ ਕਰਕੇ ਉਹ ਆਪਣੀ ਪਤਨੀ ਨੂੰ ਖਰਚਾ ਨਹੀਂ ਦੇ ਸਕਦਾ, ਪ੍ਰੰਤੂ ਮਾਮਲੇ ਦੀ ਸੁਣਵਾਈ ਦੌਰਾਨ ਹਾਈਕੋਰਟ ਨੇ ਕਿਹਾ ਕਿ ਇੱਕ ਅਕੁਸ਼ਲ ਮਜ਼ਦੂਰ ਵੀ ਰੋਜ਼ਾਨਾ ਲੱਗਭੱਗ 300-400 ਕਮਾ ਸਕਦਾ ਹੈ। ਜਸਟਿਸ ਰੇਣੂ ਅਗਰਵਾਲ ਨੇ ਹੇਠਲੀ ਅਦਾਲਤ ਨੂੰ ਵੀ ਹੁਕਮ ਦਿੱਤਾ ਕਿ ਉਹ ਪਤਨੀ ਦੇ ਹੱਕ ਵਿੱਚ ਗੁਜ਼ਾਰੇ ਦੀ ਵਸੂਲੀ ਲਈ ਪਤੀ ਵਿਰੁੱਧ ਸਾਰੇ ਜਾਇਜ਼ ਕਦਮ ਚੁੱਕੇ। ਹਾਈਕੋਰਟ ਨੇ ਪਰਿਵਾਰਿਕ ਅਦਾਲਤ ਦੇ ਹੁਕਮਾਂ ਖ਼ਿਲਾਫ਼ ਪਤੀ ਦੀ ਰਿਵੀਜ਼ਨ ਪਟੀਸ਼ਨ ਨੂੰ ਵੀ ਰੱਦ ਕਰ ਦਿੱਤਾ।
Menu
