ਚੰਡੀਗੜ੍ਹ,22 ਜੂਨ, Gee98 news service
-ਇੱਕ ਨੂੰਹ ਨੇ ਪਹਿਲਾਂ ਥਾਣੇ ਵਿੱਚ ਆਪਣੀ ਸੱਸ ਦੇ ਲਾਪਤਾ ਹੋਣ ਦੀ ਸੂਚਨਾ ਦਰਜ ਕਰਵਾਈ ਪ੍ਰੰਤੂ ਜਦ ਪੁਲਿਸ ਨੇ ਨੂੰਹ ਨੂੰ ਸੱਸ ਦੇ ਲਾਪਤਾ ਹੋਰ ਸਬੰਧੀ ਪੜਤਾਲ ਵਿੱਚ ਸ਼ਾਮਿਲ ਕੀਤਾ ਤਾਂ ਨੂੰਹ ਨੇ ਸੱਸ ਦੇ ਕਤਲ ਦਾ ਜੁਰਮ ਕਬੂਲ ਕੀਤਾ। ਹੈਰਾਨੀ ਉਸ ਵੇਲੇ ਹੋਈ ਜਦ, ਜਿਹੜੀ ਸੱਸ ਦੇ ਕਤਲ ਦੀ ਗੱਲ ਨੂੰਹ ਨੇ ਕਬੂਲ ਕੀਤੀ ਸੀ, ਉਹ ਸੱਸ ਜਿਉਂਦੀ ਥਾਣੇ ਪੁੱਜ ਗਈ। ਇਹ ਮਾਮਲਾ ਮੋਗਾ ਜਿਲ੍ਹੇ ਦੇ ਧਰਮਕੋਟ ਕਸਬੇ ਨਾਲ ਸੰਬੰਧਿਤ ਹੈ । ਧਰਮਕੋਟ ਦੇ ਜਲੰਧਰ ਬਾਈਪਾਸ ’ਤੇ ਰਹਿੰਦੇ ਇਕ ਪਰਿਵਾਰ ਦਾ ਇੱਕੋ-ਇਕ ਕਮਾਉਣ ਵਾਲਾ ਮੈਂਬਰ ਅਮਨਜੋਤ ਸਿੰਘ ਬੀਤੇ ਕਈ ਸਾਲਾਂ ਤੋਂ ਰੁਜ਼ਗਾਰ ਦੇ ਸਿਲਸਿਲੇ ’ਚ ਦੁਬਈ ’ਚ ਰਹਿ ਰਿਹਾ ਸੀ। ਪਿੱਛੇ ਘਰ ’ਚ ਅਮਨਜੋਤ ਦੀ ਪਤਨੀ ਤੇ ਮਾਂ ਸੁਖਵੰਤ ਕੌਰ ਹੀ ਰਹਿੰਦੀਆਂ ਸਨ। ਬੀਤੀ 2 ਜੂਨ ਨੂੰ ਅਮਨਜੋਤ ਦੀ ਮਾਂ ਸੁਖਵੰਤ ਦਰਬਾਰ ਸਾਹਿਬ ਅੰਮ੍ਰਿਤਸਰ ਚਲੀ ਗਈ। ਪਰ ਜਦੋਂ ਉਹ ਵਾਪਸ ਨਾ ਪਰਤੀ ਤਾਂ ਅਮਨਜੋਤ ਦੇ ਕਹਿਣ ’ਤੇ ਉਸ ਦੀ ਪਤਨੀ ਨੇ ਥਾਣਾ ਧਰਮਕੋਟ ’ਚ ਸੱਸ ਦੇ ਲਾਪਤਾ ਹੋਣ ਦੀ ਇਤਲਾਹ ਦਿੱਤੀ। ਇਸ ’ਤੇ ਥਾਣਾ ਮੁਖੀ ਨੇ ਤਫਤੀਸ਼ ਸ਼ੁਰੂ ਕਰ ਦਿੱਤੀ। ਇਸੇ ਦੌਰਾਨ ਸੁਖਵੰਤ ਕੌਰ ਦੇ ਜੇਠ ਗੁਰਜੇਬ ਸਿੰਘ ਨੇ ਵੀ ਥਾਣੇ ’ਚ ਆਪਣੀ ਭਰਜਾਈ ਦੇ ਲਾਪਤਾ ਹੋਣ ਪਿੱਛੇ ਕੁਝ ਸ਼ੱਕੀ ਕਹਾਣੀ ਹੋਣ ਦੀ ਸ਼ਿਕਾਇਤ ਦਰਜ ਕਰਵਾਈ। ਪੁਲਿਸ ਜਾਂਚ ਦੌਰਾਨ ਗੁਆਂਢੀਆਂ ਨੇ ਵੀ ਕਿਹਾ ਕਿ ਸੁਖਵੰਤ ਕੌਰ ਦੀ ਨੂੰਹ ਉਸ ਨੂੰ ਤੰਗ ਕਰਦੀ ਸੀ। ਉਹ ਲਾਪਤਾ ਨਹੀਂ ਹੋਈ, ਉਸ ਦੀ ਹੱਤਿਆ ਕੀਤੀ ਗਈ ਹੈ। ਪੁਲਿਸ ਨੇ ਸ਼ੱਕ ਦੇ ਆਧਾਰ ’ਤੇ ਜਦੋਂ ਸੁਖਵੰਤ ਕੌਰ ਦੀ ਨੂੰਹ ਤੇ ਉਸ ਦੇ ਮਾਮੇ ਤੋਂ ਪੁੱਛਗਿੱਛ ਕੀਤੀ ਤਾਂ ਉਨ੍ਹਾਂ ਪੁਲਿਸ ਦੀ ਕੁੱਟ ਤੋਂ ਡਰਿਦਆਂ ਸੁਖਵੰਤ ਕੌਰ ਦੇ ਕਤਲ ਦਾ ਜੁਰਮ ਕਬੂਲ ਲਿਆ। ਪੁਲਿਸ ਨੇ ਨੂੰਹ ਨੂੰ ਹਿਰਾਸਤ ’ਚ ਲੈ ਲਿਆ। ਓਧਰ ਅੰਮ੍ਰਿਤਸਰ ਦਰਬਾਰ ਸਾਹਿਬ ਦੇ ਕਿਸੇ ਸੇਵਾਦਾਰ ਨੇ ਵ੍ਹਟਸਐਪ ਰਾਹੀਂ ਸੁਖਵੰਤ ਕੌਰ ਦੀ ਉਸ ਦੇ ਦੁਬਈ ਬੈਠੇ ਪੁੱਤਰ ਅਮਨਜੋਤ ਨਾਲ ਵੀਡੀਓ ਕਾਲ ਜ਼ਰੀਏ ਗੱਲ ਕਰਵਾ ਦਿੱਤੀ। ਮਾਂ ਦੇ ਜ਼ਿੰਦਾ ਹੋਣ ਬਾਰੇ ਪਤਾ ਲੱਗਣ ’ਤੇ ਅਮਨਜੋਤ ਨੇ ਧਰਮਕੋਟ ’ਚ ਆਪਣੇ ਵਾਰਡ ਦੇ ਐੱਮਸੀ ਨੂੰ ਫੋਨ ’ਤੇ ਸਾਰੀ ਜਾਣਕਾਰੀ ਦਿੱਤੀ ਤੇ ਆਪ ਵੀ ਉਹ ਉਸੇ ਰਾਤ ਦੁਬਈ ਤੋਂ ਅੰਮ੍ਰਿਤਸਰ ਆ ਗਿਆ। ਅਮਨਜੋਤ ਅੰਮ੍ਰਿਤਸਰ ਤੋਂ ਆਪਣੀ ਮਾਂ ਨੂੰ ਲੈ ਧਰਮਕੋਟ ਆਇਆ। ਫਿਰ ਐਮਸੀ ਗੁਰਪਿੰਦਰ ਸਿੰਘ ਤੇ ਅਮਨਜੋਤ, ਸੁਖਵੰਤ ਕੌਰ ਨੂੰ ਲੈ ਕੇ ਧਰਮਕੋਟ ਪੁਲਿਸ ਥਾਣੇ ’ਚ ਪੇਸ਼ ਹੋ ਗਏ। ‘ਕਤਲ’ ਹੋ ਚੁੱਕੀ ਮਹਿਲਾ ਦੇ ਇਸ ਤਰ੍ਹਾਂ ਥਾਣੇ ’ਚ ਪੇਸ਼ ਹੋਣ ਨਾਲ ਪੁਲਿਸ ਅਧਿਕਾਰੀਆਂ ਤੇ ਹੋਰ ਲੋਕਾਂ ਨੂੰ ਹੈਰਾਨ ਕਰ ਦਿੱਤਾ। ਡੀਐੱਸਪੀ ਧਰਮਕੋਟ ਅਮਰਜੀਤ ਸਿੰਘ ਤੇ ਇੰਸਪੈਕਟਰ ਨਵਦੀਪ ਸਿੰਘ ਭੱਟੀ ਨੇ ਇਸ ਗੁੰਝਲਦਾਰ ਕਹਾਣੀ ਦੀ ਪੁਸ਼ਟੀ ਕਰਦਿਆਂ ਦੱਸਿਆ ਕਿ ਪੰਜ ਜੂਨ ਨੂੰ ਪੁਲਿਸ ਕੋਲ ਸੁਖਵੰਤ ਕੌਰ ਦੇ ਲਾਪਤਾ ਹੋਣ ਦੀ ਦਰਖ਼ਾਸਤ ਆਈ ਸੀ। ਮੁਹੱਲਾ ਵਾਸੀਆਂ ਨੇ ਨੂੰਹ ’ਤੇ ਦੋਸ਼ ਲਗਾਏ ਸਨ ਕਿ ਉਸ ਨੇ ਆਪਣੀ ਸੱਸ ਦੀ ਕੁੱਟਮਾਰ ਕਰ ਕੇ ਉਸ ਨੂੰ ਮਾਰ ਦਿੱਤਾ ਹੈ। ਇਸੇ ਦੌਰਾਨ ਘਬਰਾਈ ਹੋਈ ਉਸ ਦੀ ਨੂੰਹ ਨੇ ਕਤਲ ਦੀ ਗੱਲ ਮੰਨ ਲਈ ਪਰ ਪੁਲਿਸ ਨੂੰ ਉਸ ਦੇ ਹਾਵ-ਭਾਵ ’ਤੇ ਯਕੀਨ ਨਹੀਂ ਸੀ ਹੋ ਰਿਹਾ। ਇਸ ਲਈ ਪੁਲਿਸ ਨੇ ਆਪਣੇ ਪੱਧਰ ਤੇ ਇਸ ਮਾਮਲੇ ਦੀ ਜਾਂਚ ਜਾਰੀ ਰੱਖੀ ਅਤੇ ਕੋਈ ਕਾਨੂੰਨੀ ਕਾਰਵਾਈ ਰਿਕਾਰਡ ’ਤੇ ਨਹੀਂ ਲਿਆਂਦੀ। ਇਸੇ ਦੌਰਾਨ ਸੁਖਵੰਤ ਕੌਰ 19 ਜੂਨ ਨੂੰ ਸਹੀ ਸਲਾਮਤ ਵਾਪਸ ਆਪਣੇ ਘਰ ਆ ਗਈ ਅਤੇ ਨੂੰਹ ਉੱਪਰ ਆਪਣੀ ਹੀ ਸੱਸ ਦੇ ਕਤਲ ਦੇ ਦੋਸ਼ਾਂ ਦੀ ਇਸ ਕਹਾਣੀ ਦਾ ਅੰਤ ਹੋ ਗਿਆ।
Menu
