ਚੰਡੀਗੜ੍ਹ,22 ਜੁਲਾਈ, Gee98 news service
-ਸਰਮਾਏਦਾਰੀ ਸੋਚ ਦੇ ਮਾਲਕ ਵੱਲੋਂ ਆਪਣੇ ਸਾਥੀ ਨਾਲ ਮਿਲ ਕੇ ਆਪਣੇ ਖੇਤ ਵਿੱਚ ਇੱਕ ਮਜ਼ਦੂਰ ਦੇ ਹੱਥ ਬੰਨ ਕੇ ਉਸ ਦੀ ਅਲਫ ਨੰਗਾ ਕਰਕੇ ਵੀਡੀਓ ਬਣਾਉਣ ਦੀ ਕਰਤੂਤ ਸਾਹਮਣੇ ਆਈ ਹੈ। ਇਹ ਘਟਨਾ ਜਗਰਾਉਂ ਦੇ ਥਾਣਾ ਸਿੱਧਵਾਂ ਬੇਟ ਅਧੀਨ ਪਿੰਡ ਬੰਗਸੀਪੁਰਾ ਦੀ ਹੈ ਜਿੱਥੇ ਇੱਕ ਖੇਤ ਮਾਲਕ ਨੇ ਮਜ਼ਦੂਰ ਨੂੰ ਕੰਮ ਲਈ ਬੁਲਾਇਆ ਹੋਇਆ ਸੀ। ਖੇਤ ਮਾਲਕ ਆਪਣੇ ਇੱਕ ਸਾਥੀ ਨਾਲ ਮਿਲ ਕੇ ਮੋਟਰ ‘ਤੇ ਸ਼ਰਾਬ ਪੀ ਰਿਹਾ ਸੀ ਜਦ ਉਸਨੇ ਮਜ਼ਦੂਰ ਨੂੰ ਸ਼ਰਾਬ ਪੀਣ ਲਈ ਕਿਹਾ ਤਾਂ ਸਿਖ਼ਰ ਦੁਪਹਿਰੇ ਮਜ਼ਦੂਰ ਨੇ ਸ਼ਰਾਬ ਪੀਣ ਤੋਂ ਨਾਂਹ ਕਰ ਦਿੱਤੀ, ਜਿਸ ਤੋਂ ਬਾਅਦ ਨਸ਼ੇ ’ਚ ਧੁੱਤ ਖੇਤ ਮਾਲਕ ਅਤੇ ਉਸਦੇ ਸਾਥੀ ਨੇ ਮਜ਼ਦੂਰ ਨੂੰ ਦਬਕਾਉਂਦਿਆਂ ਕੱਪੜੇ ਉਤਾਰਨ ਲਈ ਕਿਹਾ, ਮਜ਼ਦੂਰ ਨੇ ਕੱਪੜੇ ਨਾ ਉਤਾਰੇ ਤਾਂ ਖੇਤ ਮਾਲਕ ਅਤੇ ਉਸ ਦੇ ਸਾਥੀ ਨੇ ਮਜ਼ਦੂਰ ਦੇ ਹੱਥ ਬੰਨ ਕੇ ਉਸ ਨੂੰ ਅਲਫ ਨੰਗਾ ਕਰ ਦਿੱਤਾ। ਸ਼ਰਾਬ ਪੀਣ ’ਚ ਮਸਤ ਖੇਤ ਮਾਲਕ ਅਤੇ ਉਸਦੇ ਸਾਥੀ ਦੇ ਚੁੁੰਗਲ ਵਿੱਚੋਂ ਕਿਸੇ ਤਰ੍ਹਾਂ ਭੱਜੇ ਮਜ਼ਦੂਰ ਨੇ ਇਕ ਰੂੜੀ ਤੋਂ ਕੱਪੜਾ ਚੁੱਕ ਕੇ ਆਪਣਾ ਤਨ ਢਕਿਆ ਤੇ ਘਰ ਪੁੱਜਾ।ਇਸ ਤੋਂ ਬਾਅਦ ਸ਼ਾਮ ਪੈਣ ‘ਤੇ ਮਜ਼ਦੂਰ ਮੁੁੜ ਖੇਤ ਮਾਲਕ ਕੋਲ ਗਿਆ ਤੇ ਉਸ ਨੇ ਉਸ ਦੀ ਅਲਫ ਨੰਗਿਆਂ ਬਣਾਈ ਵੀਡੀਓ ਡਿਲੀਟ ਕਰਨ ਲਈ ਕਿਹਾ ਪਰ ਖੇਤ ਮਾਲਕ ਨੇ ਫਿਰ ਉਸਨੂੰ ਦਬਕਾਉਂਦਿਆਂ ਬੇਰੰਗ ਮੋੜ ਦਿੱਤਾ। ਖੇਤ ਮਾਲਕ ਵੱਲੋਂ ਮਜ਼ਦੂਰ ਦੀ ਬਣਾਈ ਵੀਡੀਓ ਉਸਦੇ ਪੁੱਤ ਨੂੰ ਵੀ ਵਿਖਾ ਦਿੱਤੀ। ਇਸ ਪੂਰੇ ਮਾਮਲੇ ਦੀ ਜਦੋਂ ਇਲਾਕੇ ’ਚ ਸਰਗਰਮ ਪੇਂਡੂ ਮਜ਼ਦੂਰ ਯੂਨੀਅਨ (ਮਸ਼ਾਲ) ਅਤੇ ਪੇਂਡੂ ਮਜ਼ਦੂਰ ਯੂਨੀਅਨ ਨੂੰ ਭਿਣਕ ਲੱਗੀ ਤਾਂ ਉਹ ਮਜ਼ਦੂਰ ਦੀ ਹਮਾਇਤ ਵਿੱਚ ਨਿੱਤਰ ਆਏ। ਜਥੇਬੰਦੀਆਂ ਨੇ ਇਸ ਮਾਮਲੇ ’ਚ ਮਜ਼ਦੂਰ ਨੂੰ ਨਾਲ ਲੈ ਕੇ ਥਾਣਾ ਸਿੱਧਵਾਂ ਬੇਟ ਵਿਖੇ ਸ਼ਿਕਾਇਤ ਦਰਜ ਕਰਵਾਉਣ ਲਈ ਪੁੱਜੀਆਂ। ਪੇਂਡੂ ਮਜ਼ਦੂਰ ਯੂਨੀਅਨ (ਮਸ਼ਾਲ) ਦੇ ਜਥੇਬੰਦਕ ਸਕੱਤਰ ਡਾ.ਸੁੁਖਦੇਵ ਸਿੰਘ ਭੂੰਦੜੀ ਅਤੇ ਪੇਂਡੂ ਮਜ਼ਦੂਰ ਯੂਨੀਅਨ ਪੰਜਾਬ ਦੇ ਜ਼ਿਲ੍ਹਾ ਲੁੁਧਿਆਣਾ ਦੇ ਪ੍ਰਧਾਨ ਅਵਤਾਰ ਸਿੰਘ ਤਾਰੀ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਜਥੇਬੰਦੀਆਂ ਮਜ਼ਦੂਰ ਨੂੰ ਨਾਲ ਲੈ ਕੇ ਥਾਣਾ ਸਿੱਧਵਾਂ ਬੇਟ ਵਿਖੇ ਕਾਰਵਾਈ ਕਰਵਾਉਣ ਲਈ ਪੁੱਜੀਆਂ ਤਾਂ ਖੇਤ ਮਾਲਕ ਨੇ ਅੱਜ ਪਿੰਡ ਵਿੱਚ ਹੋਏ ਇਕੱਠ ਦੌਰਾਨ ਆਪਣੀ ਇਸ ਕਰਤੂਤ ਲਈ ਮਾਫ਼ੀ ਮੰਗੀ।
Menu
