ਬਰਨਾਲਾ,31 ਜੁਲਾਈ, (ਨਿਰਮਲ ਸਿੰਘ ਪੰਡੋਰੀ)-
-ਸਿਆਸੀ ਮੁਹਾਜ਼ ‘ਤੇ ਆਪਣੇ ਆਪ ਨੂੰ ਸਭ ਤੋਂ ਅਨੁਸ਼ਾਸਿਤ ਪਾਰਟੀ ਮੰਨਣ ਵਾਲੀ ਭਾਜਪਾ ਦੀ ਬਰਨਾਲਾ ਇਕਾਈ ਵਿੱਚ “ਸਭ ਅੱਛਾ ਨਹੀਂ” ਹੈ। ਬਰਨਾਲਾ ਜ਼ਿਲ੍ਹੇ ਵਿੱਚ ਭਾਜਪਾ ਦੇ ਆਗੂਆਂ/ਵਰਕਰਾਂ ਦੀ ਏਕਤਾ ਦੀਆਂ ਚੂਲਾਂ ਪਿਛਲੇ ਕੁਝ ਸਮੇਂ ਤੋਂ ਢਿੱਲੀਆਂ ਹੋ ਰਹੀਆਂ ਹਨ ਅਤੇ ਇੱਥੋਂ ਦੇ ਆਗੂਆਂ ਵੱਲੋਂ ਇੱਕ ਦੂਜੇ ਦੇ ਵਿਰੋਧੀ ਸੁਰਾਂ ਕੱਢੀਆਂ ਜਾ ਰਹੀਆਂ ਹਨ। ਵੇਖਣ ਵਿੱਚ ਆ ਰਿਹਾ ਹੈ ਕਿ ਭਾਜਪਾ ਦੇ ਮੌਜੂਦਾ ਜ਼ਿਲ੍ਹਾ ਪ੍ਰਧਾਨ ਅਤੇ ਸਾਬਕਾ ਜ਼ਿਲ੍ਹਾ ਪ੍ਰਧਾਨ ਦੀ ਇੱਕ ਦੂਜੇ ਵੱਲ ਟੇਢੀ ਅੱਖ ਹੈ। ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਇੱਕ ਦੂਜੇ ਨੂੰ ਸਿਰ ਜੋੜ ਕੇ ਚੱਲਣ ਦੀ ਨੀਤੀ ਪ੍ਰਤੀ ਉਤਸ਼ਾਹਿਤ ਕਰਨ ਦੀ ਬਜਾਏ ਪਾਰਟੀ ਦੇ ਸੀਨੀਅਰ ਆਗੂਆਂ ਵੱਲੋਂ ਜ਼ਿਲ੍ਹਾ ਪੱਧਰ ‘ਤੇ ਵੱਖੋ ਵੱਖਰੇ ਮੁਹਾਜਾਂ ‘ਤੇ ਖੜੇ ਸਥਾਨਕ ਆਗੂਆਂ ਦੀ ਪਿੱਠ ਥਾਪੜੀ ਜਾ ਰਹੀ ਹੈ। ਅਜੇ ਕੁਝ ਦਿਨ ਪਹਿਲਾਂ ਸੀਨੀਅਰ ਆਗੂ ਅਰਵਿੰਦ ਖੰਨਾ ਨੇ ਲੋਕ ਸਭਾ ਚੋਣਾਂ ਸਬੰਧੀ ਧੰਨਵਾਦ ਕਰਨ ਲਈ ਇੱਕ ਗਰੁੱਪ ਦੀ ਅਗਵਾਈ ਹੇਠ ਇਕੱਠ ਵਿੱਚ ਪੁੱਜ ਕੇ ਵੋਟਰਾਂ ਦਾ ਧੰਨਵਾਦ ਕੀਤਾ ਜਿੱਥੇ ਦੂਜੇ ਗਰੁੱਪ ਦੇ ਸੀਨੀਅਰ ਆਗੂ ਗੈਰ ਹਾਜ਼ਰ ਰਹੇ। ਦੂਜੇ ਪਾਸੇ ਸੀਨੀਅਰ ਆਗੂ ਹਰਜੀਤ ਸਿੰਘ ਗਰੇਵਾਲ ਨੇ ਪ੍ਰੈਸ ਕਾਨਫਰੰਸ ਕੀਤੀ ਜਿਸ ਦੌਰਾਨ ਵੀ ਬਹੁਤੇ ਸਥਾਨਕ ਆਗੂ ਗੈਰ ਹਾਜ਼ਰ ਵਿਖੇ ਗਏ। ਬਰਨਾਲਾ ਵਿਧਾਨ ਸਭਾ ਹਲਕੇ ਦੀ ਹੋਣ ਜਾ ਰਹੀ ਜ਼ਿਮਨੀ ਚੋਣ ਦੇ ਮੱਦੇਨਜ਼ਰ ਪਾਰਟੀ ਦੇ ਸਥਾਨਕ ਆਗੂਆਂ ਦੀ ਫੁੱਟ ਪ੍ਰਤੀ ਜਦ ਹਰਜੀਤ ਗਰੇਵਾਲ ਨੂੰ ਪੱਤਰਕਾਰਾਂ ਨੇ ਸਵਾਲ ਕੀਤਾ ਤਾਂ ਗਰੇਵਾਲ ਨੇ ਕਿਹਾ ਕਿ ਪਾਰਟੀ ਉਮੀਦਵਾਰ ਦਾ ਵਿਰੋਧ ਕਰਨ ਵਾਲਿਆਂ ਨੂੰ ਪਾਰਟੀ ਤੋਂ ਬਾਹਰ ਦਾ ਰਸਤਾ ਵਿਖਾ ਦਿੱਤਾ ਜਾਵੇਗਾ ਪ੍ਰੰਤੂ ਗਰੇਵਾਲ ਦੇ ਇਹ ਦਾਅਵੇ ਹਕੀਕਤ ਵਿੱਚ ਬਦਲਣੇ ਯਕੀਨੀ ਨਹੀਂ ਹਨ ਕਿਉਂਕਿ ਦੂਜੇ ਪਾਸੇ ਵੀ ਹਰਜੀਤ ਗਰੇਵਾਲ ਦੇ ਬਰਾਬਰ ਦੇ ਆਗੂਆਂ ਦਾ ਹੱਥ ਹੈ। ਬਰਨਾਲਾ ‘ਚ ਭਾਜਪਾ ਆਗੂਆਂ ਦੀ ਫੁੱਟ ਦੇ ਹਾਲਾਤ ਇਥੋਂ ਤੱਕ ਵੱਧ ਚੁੱਕੇ ਹਨ ਕਿ ਇੱਕ ਗਰੁੱਪ ਦੀ ਤਾਂ “ਵੱਡੇ ਆਗੂ ਦੀ ਵੱਡੇ ਝੰਡੇ ਵਾਲੀ ਵੱਡੀ ਕੋਠੀ” ਵਿੱਚ ਐਂਟਰੀ ਤੱਕ ਵੀ ਨਹੀਂ ਹੈ। ਜ਼ਿਲ੍ਹੇ ‘ਚ ਭਾਜਪਾ ਦੇ ਇਹ ਹਾਲਾਤ ਜ਼ਿਮਨੀ ਚੋਣ ਲੜਨ ਵਾਲੇ ਕਿਸੇ ਆਗੂ ਲਈ ਬਹੁਤੇ ਸੁਖਾਵੇਂ ਨਹੀਂ ਕਹੇ ਜਾ ਸਕਦੇ। ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਪਾਰਟੀ ਦੇ ਸੀਨੀਅਰ ਆਗੂਆਂ ਵੱਲੋਂ ਸਥਾਨਕ ਆਗੂਆਂ ਦੇ ਮੂੰਹ ਸਿੱਧੇ ਕਰਨ ਦੀ ਬਜਾਏ ਫੁੱਟ ਨੂੰ ਹੁਲਾਰਾ ਦਿੱਤਾ ਜਾ ਰਿਹਾ ਹੈ। ਜ਼ਿਲ੍ਹੇ ‘ਚ ਭਾਜਪਾ ਆਗੂਆਂ ਦੀ ਏਕਤਾ ਤੇ ਮੌਜੂਦਾ ਹਾਲਾਤਾਂ ਸਬੰਧੀ ਜਦ ਸਥਾਨਕ ਕੁਝ ਆਗੂਆਂ ਨਾਲ ਗੱਲ ਕੀਤੀ ਤਾਂ ਸਾਰਿਆਂ ਨੇ ਇਹੋ ਕਿਹਾ ਕਿ “ਅਜਿਹੀ ਕੋਈ ਗੱਲਬਾਤ ਨਹੀਂ, ਅਸੀਂ ਇੱਕੋ ਹੀ ਹਾਂ”, ਪ੍ਰੰਤੂ ਸੱਚਾਈ ਇਹੀ ਹੈ ਕਿ ਬਰਨਾਲਾ ‘ਚ ‘ਕਮਲ ਦੇ ਫੁੱਲ ਨੂੰ ਖਿੜਣ ਤੋਂ ਰੋਕਣ ਲਈ ਆਪਣਿਆਂ ਵੱਲੋਂ ਹੀ ਮਾੜੇ ਹਾਲਾਤ ਪੈਦਾ ਕੀਤੇ ਜਾ ਰਹੇ ਹਨ। ਕੋਈ ਕਹਿਣ ਨੂੰ ਭਾਵੇਂ ਕੁਝ ਵੀ ਕਹੀ ਜਾਵੇ ਪਰੰਤੂ ਜੇਕਰ ਭਾਜਪਾ ਦੀ ਸੀਨੀਅਰ ਲੀਡਰਸ਼ਿਪ ਨੇ ਬਰਨਾਲਾ ਦੇ ਹਾਲਾਤਾਂ ਵੱਲ ਧਿਆਨ ਨਾ ਦਿੱਤਾ ਤਾਂ ਭਾਜਪਾ ਲਈ ਬਰਨਾਲਾ ਸੀਟ ਤੋਂ ਵਿਧਾਨ ਸਭਾ ਦੀ ਦੂਰੀ ਬਣੀ ਰਹਿ ਸਕਦੀ ਹੈ।
