ਬੋਲ ਪੰਡੋਰੀ ਦੇ…ਭਲਾ ਹੋਵੇ ਕਰਤਾਰ ਸਿਆਂ ਤੇਰਾ….!
– ਪੰਜਾਬ ਦੀਆਂ ਸ਼ੌਕੀਨ ਔਰਤਾਂ ਕਰਤਾਰ ਸਿਉਂ ਦੇ ਸੋਹਲੇ ਗਾ ਰਹੀਆਂ ਨੇ…ਜਿਉਂਦਾ ਰਹੇ ਵੇ ਕਰਤਾਰਿਆ…ਸੋਚ ਸੱਚੀਂ ਸੁਲੱਖਣੀ ਨਿਕਲੀ….ਬਰਨਾਲੇ ਜੁੱਤੀਆਂ ਵਾਲੇ ਮੋਰਚੇ ਦੇ ਜੁੱਤੀਆਂ ਵੇਚਣ ਵਾਲੇ ਦੁਕਾਨਦਾਰ ਵੀ ਹੱਕੇ ਬੱਕੇ ਰਹਿ ਗਏ…ਕਿਸੇ ਨੂੰ ਪਤਾ ਹੀ ਨਹੀਂ ਸੀ ਕਿ ਜੁੱਤੀਆਂ ਕਿੱਥੇ ਮਿਲਦੀਆਂ ਨੇ…ਉਹਨਾਂ ਸਾਰਿਆਂ ‘ਤੇ ਕਾਨੂੰਨੀ ਕਾਰਵਾਈ ਹੋਣੀ ਚਾਹੀਦੀ ਹੈ ਜਿਹੜੇ ਹੁਣ ਤੱਕ ਜੁੱਤੀਆਂ ਨੂੰ ਨਿੱਕੀਆਂ ਜਿਹੀਆਂ ਦੁਕਾਨਾਂ ‘ਚ ਰੱਖ ਕੇ ਵੇਚਦੇ ਰਹੇ…ਇਹ ਕੋਈ ਸਥਾਨ ਹੈ ਭਲਾ ਜੁੱਤੀਆਂ ਰੱਖਣ ਦਾ…. ਕਰਤਾਰ ਸਿਉ ਤੋਂ ਪਹਿਲਾਂ ਜਿੰਨੇ ਵੀ ਵੱਡੀ ਕੁਰਸੀ ‘ਤੇ ਬੈਠੇ…ਉਹਨਾਂ ‘ਤੇ ਵੀ ਕਾਰਵਾਈ ਹੋਵੇ ਜਿਨ੍ਹਾਂ ਨੂੰ ਜੁੱਤੀਆਂ ਦੇ ਅਸਲ ਟਿਕਾਣੇ ਦਾ ਪਤਾ ਹੀ ਨਹੀਂ ਲੱਗਿਆ….ਖ਼ਬਰਦਾਰ ਜੇ ਕਿਸੇ ਨੇ ਕਿਤਾਬਾਂ ਸ਼ੀਸ਼ਿਆਂ ਵਿੱਚ ਰੱਖੀਆਂ ਤਾਂ…ਊਂ ਵੈਸੇ ਗੱਲ ਆਂ ਇੱਕ.. ਤੁਸੀਂ ਕਦੇ ਕਿਸੇ ਬੰਦੇ ਦੇ ਜੁੱਤੀਆਂ ਪੈਂਦੀਆਂ ਵੇਖੀਆਂ ਨੇ…ਨਹੀਂ ਵੇਖੀਆਂ ਤਾਂ ਅੱਜਕੱਲ੍ਹ ਵਿਧਾਨ ਸਭਾ ਦਾ ਸੈਸ਼ਨ ਵੇਖ ਲਵੋ…ਜਿਨਾਂ ਨੂੰ ਤੁਸੀਂ ਆਪਣੇ ਮਸਲੇ ਚੁੱਕਣ ਲਈ…ਮਸਲੇ ਹੱਲ ਕਰਨ ਲਈ ਚੁਣ ਕੇ ਭੇਜਿਆ ਨਾ…ਇਹ ਉੱਥੇ ਇੱਕ ਦੂਜੇ ਦੇ ਖ਼ੂਬ ਮਾਰਦੇ ਨੇ…. ਕੀਹਨੇ ਕਿਹਾ ਕਿ ਕਰਤਾਰੇ ਦੀ ਅਕਲ ਪੈਰਾਂ ‘ਚ….ਕਰਤਾਰੇ ਦੀ ਅਕਲ ਦੀ ਤਾਂ ਉਸਤਤਿ ਹੋਣੀ ਚਾਹੀਦੀ ਆਂ…ਹੁਣ ਇਹ ਭੁਲੇਖਾ ਕਿਵੇਂ ਦੂਰ ਹੋਵੇ…ਕੌਣ ਦੂਰ ਕਰੇ ਕਿ ਕਰਤਾਰੇ ਵੀ ਅਕਲ ਸਿਰ ਤੋਂ ਨਿਕਲ ਕੇ ਜੁੱਤੀਆਂ ‘ਚ ਆਈ ਜਾਂ ਜੁੱਤੀਆਂ ਕਰਤਾਰੇ ਵੀ ਅਕਲ ਵਿੱਚ ਚਲੀਆਂ ਗਈਆਂ…. ਚਲੋ ਅਕਲ ਜਿੱਥੇ ਮਰਜ਼ੀ ਰਹੇ,ਸੌਕੀਨਣਾਂ ਨੂੰ ਪਤਾ ਲੱਗ ਗਿਆ ਕਿ ਜੁੱਤੀਆਂ ਕਿੱਥੇ ਨੇ…ਅਖੇ.. ਘੁੰਡ ਕੱਢ ਲੈ ਪਤਲੀਏ ਨਾਰੇ ਸਹੁਰਿਆਂ ਦਾ ਪਿੰਡ ਆ ਗਿਆ…ਲੈ ਹੁਣ ਘੁੰਡ ਕਿਹਨੇ ਵੇਖਣਾ…ਹੁਣ ਤਾਂ ਲੋਕਾਂ ਨੇ ਜੁੱਤੀਆਂ ਵੇਖਣੀਆਂ ਨੇ…ਬੜੀ ਟੋਕਾ ਟਾਕੀ ਹੁੰਦੀ ਸੀ ਜੇ ਘੁੰਡ ਨਹੀਂ ਕੱਢਣਾ ਚੁੰਨੀ ਤਾਂ ਲੈ ਲਿਆ ਕਰੋ ਸਿਰ ‘ਤੇ…ਭਲਾ ਹੋਵੇ ਕਰਤਾਰੇ ਦਾ ਗੱਲ ਘੁੰਡ ਤੇ ਚੁੰਨੀਆਂ ਤੋਂ ਜੁੱਤੀਆਂ ਤੱਕ ਆਗੀ…ਪੰਜਾਬ ਸਿਆਂ ਤੂੰ ਛੱਡ ਚਿੰਤਾ ਡੁੱਬਦੀ ਖੇਤੀ ਦੀ, ਮੁੱਕਦੇ ਪਾਣੀਆਂ ਦੀ, ਤੈਂ ਕੀ ਲੈਣਾ ਟਾਹਲੀ ਵਾਲੇ ਖੇਤ ਟਾਹਣੇ ਨਾਲ ਲਮਕਦੀ ਲਾਸ਼ ਤੋਂ…ਤੈਨੂੰ ਕੀ ਜੇ ਕੋਈ ਸਪਰੇਅ ਦੀ ਸ਼ੀਸ਼ੀ ਪੀ ਕੇ ਮਰ ਗਿਆ…ਤੈਨੂੰ ਕਿਹੜਾ ਪੁੱਛ ਕੇ ਮੁੰਡੇ ਕੁੜੀਆਂ ਡਿਗਰੀਆਂ ਲੈਂਦੇ ਨੇ,ਐਵੇਂ ਚੁੱਕੀ ਫਿਰਦੇ ਨੇ…ਪੰਜਾਬ ਸਿਆਂ ਤੂੰ ਕਰਤਾਰੇ ਦੀਆਂ ਜੁੱਤੀਆਂ ਪਾ ਕੇ ਵੇਖ…ਹਵਾ ‘ਚ ਉੱਡਦਾ ਫਿਰੇਗਾ…ਇਹ ਉਹ ਜੁੱਤੀ ਨਹੀਂ…ਜੁੱਤੀ ਕਸੂਰੀ ਪੈਰੀਂ ਨਾ ਪੂਰੀ….ਇਹ ਤਾਂ ਪੈਰਾਂ ‘ਚ ਪਾ ਕੇ ਚੀਕੂ ਚੀਕੂ ਕਰਨ ਵਾਲੀ ਜੁੱਤੀ ਆਂ…ਆ ਪੰਜਾਬ ਸਿਆਂ ਪਾ ਕੇ ਵੇਖ ਪੈਰਾਂ ‘ਚ…ਉੱਡਦਾ ਫਿਰੇਗਾ ਹਵਾ ‘ਚ, ਪਹਿਲਾਂ ਵੀ ਤਾਂ ਉੱਡਦਾ ਪੰਜਾਬ ਲੋਕ ਤੈਨੂੰ ਆਖੀ ਹੀ ਜਾਂਦੇ ਨੇ ਪਰ ਸਾਡੀ ਜੁੱਤੀ ਪਾ ਕੇ ਉੱਡ….ਸਾਰੇ ਦੁੱਖ ਕੱਟੇ ਜਾਣਗੇ….ਭਲਾ ਹੋਵੇ ਕਰਤਾਰੇ ਦਾ ਜਿਹਨੇ ਜੁੱਤੀਆਂ ਵਿੱਚ ਸਾਰੀਆਂ ਸਮੱਸਿਆਵਾਂ ਦਾ ਹੱਲ ਲੱਭ ਦਿੱਤਾ….ਸੁਣਿਓ ਜੀ….ਵਿਧਾਨ ਸਭਾ ਚੱਲੇ ਓ…ਦੋ ਚਾਰ ਜੋੜੇ ਜੁੱਤੀਆਂ ਦੇ ਲੈ ਆਇਓ…. ਐਤਕੀਂ ਚੋਣ ਪ੍ਰਚਾਰ ‘ਚ ਬਹੁਤ ਜੁੱਤੀਆਂ ਟੁੱਟਣੀਆਂ ਨੇ… ਮੁਕਾਬਲਾ ਤਕੜਾ ਹੋਵੇਗਾ ਲੱਗਦੈ….ਬਣਾ ਦੇ ਸਰਤਾਜ ਅਗਲਾ ਗੀਤ… ਜੀਹਦੀ ਜੁੱਤੀ ਤਿੱਲੇਦਾਰ ਨੀ ਕੁੜੀਓ, ਮੇਰਾ ਉਹੀ ਹੈ ਸਰਦਾਰ ਨੀ ਕੁੜੀਓ…!
– ਨਿਰਮਲ ਸਿੰਘ ਪੰਡੋਰੀ
94170-33033
