ਚੰਡੀਗੜ੍ਹ ,26 ਮਾਰਚ, Gee98 News service-
-ਅੰਮ੍ਰਿਤਸਰ ਵਿਖੇ ਮੰਤਰੀ ਲਾਲਜੀਤ ਸਿੰਘ ਭੁੱਲਰ ਤੋਂ ਤੰਗ ਆ ਕੇ ਸੂਸਾਈਡ ਕਰਨ ਵਾਲੇ ਵੇਅਰ ਹਾਊਸ ਦੇ ਅਧਿਕਾਰੀ ਗਗਨਦੀਪ ਸਿੰਘ ਰੰਧਾਵਾ ਦੇ ਮਾਮਲੇ ‘ਚ ਨਵਾਂ ਖੁਲਾਸਾ ਸਾਹਮਣੇ ਆਇਆ ਹੈ ਕਿ ਮੰਤਰੀ ਭੁੱਲਰ ਦੇ ਪਿਤਾ ਸੁਖਦੇਵ ਸਿੰਘ ਭੁੱਲਰ ਆਪਣੀਆਂ ਗ਼ਲਤੀਆਂ ਕਾਰਨ ਹੀ ਵੇਅਰ ਹਾਊਸ ਦਾ ਟੈਂਡਰ ਪ੍ਰਾਪਤ ਨਹੀਂ ਕਰ ਸਕੇ। ਦਰਅਸਲ ਮੰਤਰੀ ਭੁੱਲਰ ਦੇ ਪਿਤਾ ਸੁਖਦੇਵ ਸਿੰਘ ਭੁੱਲਰ ਫਾਈਨੈਂਸ਼ਅਲ ਬਿੱਡ ‘ਚ ਰੇਟ ਵੱਧ ਹੋਣ ਕਾਰਨ ਟੈਂਡਰ ਪ੍ਰਾਪਤ ਨਹੀਂ ਕਰ ਸਕੇ ਜਦਕਿ ਟੈਂਡਰ ਪ੍ਰਾਪਤ ਕਰਨ ਵਾਲੇ ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਦੇ ਰੇਟ ਭੁੱਲਰ ਦੇ ਪਿਤਾ ਨਾਲੋਂ ਕਾਫੀ ਘੱਟ ਸਨ ਜਿਸ ਕਰਕੇ ਵੇਅਰ ਹਾਊਸ ਨੇ ਗਦਾਮ ਬਣਾਉਣ ਦੇ ਟੈਂਡਰ ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਨੂੰ ਦੇ ਦਿੱਤੇ। ਦੱਸ ਦੇਈਏ ਕਿ ਮੰਤਰੀ ਲਾਲਜੀਤ ਭੁੱਲਰ ਤੇ ਉਸਦੇ ਪਿਤਾ ਸੁਖਦੇਵ ਸਿੰਘ ਭੁੱਲਰ ਨੇ ਇਹ ਦੋਸ਼ ਲਗਾਏ ਸਨ ਕਿ ਵੇਅਰ ਹਾਊਸ ਦੇ ਗਦਾਮਾ ਦੇ ਟੈਂਡਰਾਂ ‘ਚ ਹੇਰਾਫੇਰੀ ਤੇ ਕੁਰੱਪਸ਼ਨ ਹੋਈ ਹੈ ਤੇ ਟੈਂਡਰ ਗ਼ਲਤ ਤਰੀਕੇ ਨਾਲ ਦਿੱਤੇ ਗਏ ਹਨ ਜਦਕਿ ਹੁਣ ਸਾਰੀ ਜਾਣਕਾਰੀ ਸਾਹਮਣੇ ਆ ਗਈ ਹੈ ਕਿ ਭੁੱਲਰ ਦੇ ਪਿਤਾ ਦਾ ਟੈਂਡਰ ਰੇਟ ਵੱਧ ਹੋਣ ਕਾਰਨ ਹੀ ਉਹਨਾਂ ਨੂੰ ਟੈਂਡਰ ਨਹੀਂ ਮਿਲੇ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਟੈਂਡਰ ਪ੍ਰਾਪਤ ਕਰਨ ਵਾਲੀ ਕੰਪਨੀ ਬਾਬਾ ਨਾਗਾ ਐਗਰੋਟਿਕ ਅਤੇ ਸੁਖਦੇਵ ਸਿੰਘ ਭੁੱਲਰ ਦੇ ਰੇਟਾਂ ਵਿੱਚ ਕਰੀਬ 18 ਰੁਪਏ ਪ੍ਰਤੀ ਕੁਇੰਟਲ ਸਲਾਨਾ ਦਾ ਅੰਤਰ ਸੀ ਇਸ ਕਰਕੇ ਪੰਜਾਬ ਸਟੇਟ ਵੇਅਰਹਾਊਸਿੰਗ ਨੇ ਟੈਂਡਰ ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਨੂੰ ਦਿੱਤੇ, ਭਾਵ ਕਿ ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਦੇ ਰੇਟ ਮੰਤਰੀ ਤੇ ਪਿਤਾ ਸੁਖਦੇਵ ਸਿੰਘ ਭੁੱਲਰ ਦੇ ਰੇਟਾਂ ਨਾਲੋਂ ਕਰੀਬ 18 ਰੁਪਏ ਘੱਟ ਸਨ। ਇਸ ਮਾਮਲੇ ‘ਚ ਪੂਰੀ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਵੇਅਰ ਹਾਊਸ ਦੇ ਗੁਦਾਮ ਬਣਾਉਣ ਲਈ ਭਰੇ ਟੈਂਡਰਾਂ ਦੇ ਟੈਕਨੀਕਲ ਬਿੱਡ ਵਿੱਚ ਸਿਰਫ਼ ਦੋ ਕੰਪਨੀਆਂ ਰਹਿ ਗਈਆਂ ਜਿਹਨਾਂ ਵਿੱਚ ਲਾਲਜੀਤ ਭੁੱਲਰ ਦੇ ਪਿਤਾ ਸੁਖਦੇਵ ਸਿੰਘ ਭੁੱਲਰ ਅਤੇ ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਸਨ ਅਤੇ ਇਹਨਾਂ ਦੋਵਾਂ ਕੰਪਨੀਆਂ ਨੇ ਟੈਕਨੀਕਲ ਬਿੱਡ ਤੋਂ ਬਾਅਦ ਫਾਈਨੈਸ਼ਲ ਬਿੱਡ ਵਿੱਚ ਭਾਗ ਲਿਆ, ਜਿੱਥੇ ਤਜਰਬੇ ਦੀ ਘਾਟ ਕਾਰਨ ਲਾਲਜੀਤ ਭੁੱਲਰ ਦੇ ਪਿਤਾ ਨੂੰ ਦੂਜੀ ਕੰਪਨੀ ਦੇ ਰੇਟਾਂ ਦਾ ਪਤਾ ਨਹੀਂ ਲੱਗ ਸਕਿਆ। ਦਰਅਸਲ ਦੂਜੀ ਕੰਪਨੀ ਬਾਬਾ ਨਾਗਾ ਐਗਰੋਟੈਕ ਦੇ ਕੋਲ ਵੇਅਰ ਹਾਊਸ ਦੇ ਖੇਤਰ ‘ਚ ਕੰਮ ਕਰਨ ਦਾ ਲੱਗਭੱਗ 40 ਸਾਲ ਦਾ ਤਜਰਬਾ ਹੈ ਜਿਸ ਕਰਕੇ ਉਹਨਾਂ ਨੇ ਟੈਂਡਰ ਭਰਨ ਸਮੇਂ ਘੱਟੋ ਘੱਟ ਰੇਟ ਭਰੇ, ਲਾਲਜੀਤ ਭੁੱਲਰ ਤੇ ਪਿਤਾ ਨੇ ਪਹਿਲੀ ਵਾਰ ਵੇਅਰਹਾਊਸ ਦੇ ਖੇਤਰ ‘ਚ ਟੈਂਡਰ ਭਰੇ ਸਨ ਜਿਸ ਕਰਕੇ ਉਹ ਰੇਟਾਂ ਦੀ ਸਹੀ ਗਣਨਾ ਨਹੀਂ ਕਰ ਸਕੇ। ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਦੇ ਮਾਲਕ ਸੁਨੀਲ ਚੱਢਾ ਨੇ ਦੱਸਿਆ ਕਿ ਜਦੋਂ ਗੁਦਾਮਾਂ ਦੇ ਟੈਂਡਰ ਦੀ ਫਾਈਨੈਸ਼ਲ ਬਿੱਡ ਖੁੱਲੀ ਤਾਂ ਉਹਨਾਂ ਦੀ ਕੰਪਨੀ ਦੇ ਰੇਟ ਸੁਖਦੇਵ ਭੁੱਲਰ ਦੇ ਮੁਕਾਬਲੇ ਬਹੁਤ ਘੱਟ ਸਨ। ਉਹਨਾਂ ਦੱਸਿਆ ਕਿ ਉਹਨਾਂ ਦਾ ਰੇਟ 91.50 ਰੁਪਏ ਪ੍ਰਤੀ ਕੁਇੰਟਲ ਸਲਾਨਾ ਸੀ ਜਦਕਿ ਸੁਖਦੇਵ ਭੁੱਲਰ ਦਾ ਰੇਟ 119.50 ਰੁਪਏ ਪ੍ਰਤੀ ਕੁਇੰਟਲ ਸਲਾਨਾ ਸੀ ਜਿਸ ਕਰਕੇ ਉਹਨਾਂ ਦੀ ਕੰਪਨੀ ਨੂੰ ਟੈਂਡਰ ਅਲਾਟ ਹੋਇਆ ਹੈ। ਸੁਨੀਲ ਚੱਢਾ ਨੇ ਦੱਸਿਆ ਕਿ 30 ਹਜਾਰ ਮੀਟ੍ਰਿਕ ਟਨ ਦੇ ਵੇਅਰ ਹਾਊਸ ਮੁਕਾਬਲੇ ਸਰਕਾਰ ਉਹਨਾਂ ਨੂੰ 10 ਸਾਲ ਵਿੱਚ ਕੁੱਲ 27.65 ਕਰੋੜ ਰੁਪਏ ਦੇਵੇਗੀ ਜਦਕਿ ਲਾਲਜੀਤ ਭੁੱਲਰ ਦੇ ਪਿਤਾ ਨੇ ਜੋ ਰੇਟ ਭਰੇ ਸਨ ਉਹਨਾਂ ਮੁਤਾਬਕ ਵੇਅਰ ਹਾਊਸ ਉਹਨਾਂ ਨੂੰ 10 ਸਾਲਾਂ ਵਿੱਚ 30 ਹਜ਼ਾਰ ਮੀਟ੍ਰਿਕ ਟਨ ਦੇ ਵੇਅਰ ਹਾਊਸ ਲਈ 35.85 ਕਰੋੜ ਰੁਪਏ ਦਾ ਭੁਗਤਾਨ ਕਰਦੀ ਜਿਸ ਵਿੱਚ 8.4 ਕਰੋੜ ਰੁਪਏ ਸਾਡੇ ਨਾਲੋਂ ਵੱਧ ਭੁਗਤਾਨ ਕਰਨਾ ਪੈਂਦਾ ਇਸੇ ਕਰਕੇ ਵੇਅਰ ਹਾਊਸ ਨੇ ਟੈਂਡਰ ਸਾਡੀ ਕੰਪਨੀ ਨੂੰ ਦਿੱਤੇ ਹਨ। ਬਾਬਾ ਨਾਗਾ ਐਗਰੋਟਿਕ ਕੰਪਨੀ ਦੇ ਮਾਲਕ ਸੁਨੀਲ ਚੱਢਾ ਨੇ ਮੰਤਰੀ ਭੁੱਲਰ ਦੇ ਪਿਤਾ ਸੁਖਦੇਵ ਸਿੰਘ ਭੁੱਲਰ ਵੱਲੋਂ ਟੈਂਡਰਾਂ ‘ਚ ਹੇਰਾਫੇਰੀ ਦੀਆਂ ਸ਼ਿਕਾਇਤਾਂ ਨੂੰ ਸਿਰੇ ਤੋਂ ਖਾਰਜ ਕਰਦੇ ਹੋਏ ਕਿਹਾ ਕਿ ਸਾਰਾ ਕੁਝ ਨਿਯਮਾਂ ਮੁਤਾਬਕ ਹੋਇਆ ਹੈ, ਜਿਸ ਤੋਂ ਬਾਅਦ ਉਹਨਾਂ ਦੀ ਕੰਪਨੀ ਨੂੰ ਟੈਂਡਰ ਅਲਾਟ ਹੋਏ ਹਨ। ਵੇਅਰ ਹਾਊਸ ਦੇ ਜ਼ਿਲ੍ਹਾ ਮੈਨੇਜਰ ਸੂਸਾਈਡ ਮਾਮਲੇ ‘ਚ ਇਹਨਾਂ ਖੁਲਾਸਿਆਂ ਤੋਂ ਬਾਅਦ ਹੁਣ ਮੰਤਰੀ ਦੇ ਪਰਿਵਾਰ ਦੀਆਂ ਮੁਸ਼ਕਲਾਂ ਹੋਰ ਵੱਧ ਸਕਦੀਆਂ ਹਨ ਕਿਉਂਕਿ ਮੰਤਰੀ ਨੇ ਪਿਤਾ ਵੱਲੋਂ ਪਹਿਲਾਂ ਅਤੇ ਹੁਣ ਮੰਤਰੀ ਦੇ ਪਰਿਵਾਰ ਅਤੇ ਸਮਰਥਕਾਂ ਵੱਲੋਂ ਟੈਂਡਰ ਵਿੱਚ ਘਪਲੇਬਾਜ਼ੀ ਦੇ ਸ਼ਰੇਆਮ ਦੋਸ਼ ਲਗਾਏ ਜਾ ਰਹੇ ਹਨ ਜਦੋਂ ਕਿ ਉਕਤ ਸਾਰੀ ਕਹਾਣੀ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ ਵੇਅਰ ਹਾਊਸ ਦੇ ਗੁਦਾਮਾਂ ਦੇ ਟੈਂਡਰ ਨਿਯਮਾਂ ਮੁਤਾਬਕ ਹੀ ਪਾਸ ਹੋਏ ਹਨ, ਮਾਮਲਾ ਸਿਰਫ਼ ਇਹੋ ਸੀ ਕਿ ਮੰਤਰੀ ਭੁੱਲਰ ਸਾਰੇ ਟੈਂਡਰ ਆਪਣੇ ਪਿਤਾ ਦੇ ਨਾਮ ਪਾਸ ਕਰਵਾਉਣਾ ਚਾਹੁੰਦੇ ਸਨ ਪਰੰਤੂ ਨਿਯਮਾਂ ਅਨੁਸਾਰ ਅਜਿਹਾ ਨਹੀਂ ਹੋ ਸਕਦਾ ਸੀ ਜਿਸ ਕਾਰਨ ਜ਼ਿਲ੍ਹਾ ਮੈਨੇਜਰ ਰੰਧਾਵਾ ‘ਤੇ ਦਬਾਅ ਬਣਾਇਆ ਗਿਆ ਅਤੇ ਉਸ ਤੋਂ ਬਾਅਦ ਦੋਸ਼ ਲੱਗੇ ਕਿ ਰੰਧਾਵਾ ਨੂੰ ਘਰ ਬੁਲਾ ਕੇ ਮੰਤਰੀ ਭੁੱਲਰ ਨੇ ਜ਼ਲੀਲ ਕੀਤਾ, ਕੁੱਟਮਾਰ ਕੀਤੀ ਜਿਸ ਤੋਂ ਬਾਅਦ ਉਸਨੇ ਆਤਮਹੱਤਿਆ ਕਰ ਲਈ।
