ਬਰਨਾਲਾ 17 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-ਖਰਾਬ ਮੌਸਮ ਕਾਰਨ ਦਿੱਲੀ ਤੋਂ ਜਾ ਰਹੇ ਇੱਕ ਨਿੱਜੀ ਕੰਪਨੀ ਦੇ ਹੈਲੀਕਾਪਟਰ ਨੂੰ ਐਮਰਜੈਂਸੀ ਹਾਲਤਾਂ ਵਿੱਚ ਜ਼ਿਲ੍ਹਾ ਬਰਨਾਲਾ ਦੇ ਪਿੰਡ ਕੁਤਬਾ ਵਿਖੇ ਉਤਰਨਾ ਪਿਆ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਐੱਸਐੱਚਓ ਮਹਿਲ ਕਲਾਂ ਬਲਤੇਜ ਸਿੰਘ ਨੇ ਦੱਸਿਆ ਕਿ ਦੋ ਵਿਅਕਤੀ ਅਮਰੀਕਾ ਤੂੰ ਦਿੱਲੀ ਏਅਰਪੋਰਟ ‘ਤੇ ਉਤਰੇ ਸਨ ਜਿਨਾ ਨੇ ਮੋਗਾ ਜ਼ਿਲ੍ਹੇ ਦੇ ਪਿੰਡ ਧਰਮਕੋਟ ਵਿਖੇ ਜਾਣਾ ਸੀ, ਕਿਰਾਏ ਤੇ ਇੱਕ ਨਿੱਜੀ ਕੰਪਨੀ ਦਾ ਹੈਲੀਕਾਪਟਰ ਕਰਕੇ ਆਪਣੇ ਪਿੰਡ ਧਰਮਕੋਟ ਨੂੰ ਜਾ ਰਹੇ ਸਨ, ਪ੍ਰੰਤੂ ਪਾਇਲਟ ਵੱਲੋ ਖਰਾਬ ਮੌਸਮ ਨੂੰ ਦੇਖਦਿਆਂ ਹੈਲੀਕਾਪਟਰ ਨੂੰ ਜ਼ਿਲ੍ਹਾ ਬਰਨਾਲਾ ਦੇ ਪਿੰਡ ਕੁਤਬਾ ਦੀ ਅਨਾਜ ਮੰਡੀ ‘ਚ ਐਮਰਜੈਂਸੀ ਹਾਲਤਾਂ ‘ਚ ਉਤਾਰਨਾ ਪਿਆ। ਐਸਐਚਓ ਬਲਤੇਜ ਸਿੰਘ ਨੇ ਦੱਸਿਆ ਕਿ ਇਸ ਹੈਲੀਕਾਪਟਰ ਵਿੱਚ ਇਕ ਇੰਜਨੀਅਰ, ਇਕ ਪਾਇਲਟ ਤੋਂ ਇਲਾਵਾ ਦੋ ਯਾਤਰੀ ਸਨ ਅਤੇ ਸਾਰੇ ਜਣੇ ਸੁਰੱਖਿਅਤ ਹਨ। ਦੋਵੇਂ ਯਾਤਰੀ ਵਿਧਾਇਕ ਸੁਖਜੀਤ ਸਿੰਘ ਕਾਕਾ ਲੋਹਗਡ਼ ਦੇ ਪਰਿਵਾਰਕ ਮੈਂਬਰ ਸਨ ਜਿਨ੍ਹਾਂ ਨੂੰ ਇਕ ਗੱਡੀ ਵਿਚ ਉਨ੍ਹਾਂ ਦੇ ਪਿੰਡ ਧਰਮਕੋਟ ਭੇਜ ਦਿੱਤਾ ਗਿਆ ਜਦਕਿ ਹੈਲੀਕਾਪਟਰ ਸ਼ਨੀਵਾਰ ਮੌਸਮ ਠੀਕ ਹੋਣ ਤੋਂ ਬਾਅਦ ਵਾਪਸ ਦਿੱਲੀ ਜਾਵੇਗਾ।
