ਬਰਨਾਲਾ, 27 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ) : ਇਸ ਵਾਰ ਵਿਧਾਨ ਸਭਾ ਚੋਣਾਂ ਦੇ ਮਾਮਲੇ ’ਚ ਅੰਦਰੂਨੀ ਸੂਚਨਾਵਾਂ ਦੇਣ ਵਾਲੇ ਸਾਰੇ ‘ਸੂਤਰ’ ਫੇਲ ਸਾਬਿਤ ਹੋ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਰਾਜਨੀਤੀ ਨਾਲ ਸੰਬੰਧਿਤ ਅੰਦਰੂਨੀ ਸੂਚਨਾਵਾਂ ਇਕੱਤਰ ਕਰਨ ਲਈ ਮੀਡੀਆ ਸੰਸਥਾਵਾਂ, ਸਿਆਸੀ ਮਾਹਿਰਾਂ ਅਤੇ ਸਿਆਸੀ ਪਾਰਟੀਆਂ ਨੇ ਵੀ ਹਰ ਖ਼ੇਤਰ ਵਿੱਚ ਆਪਣੇ ‘ਸੂਤਰ’ ਫਿੱਟ ਕੀਤੇ ਹੁੰਦੇ ਹਨ, ਜਿਨਾਂ ਨੂੰ ਪੰਜਾਬੀ ’ਚ ਸੂਹੀਏ ਵੀ ਕਿਹਾ ਜਾਂਦਾ ਹੈ। ਇਹ ‘ਸੂਤਰ’ ਆਪਣੀ ਕਾਬਲੀਅਤ ਨਾਲ ਕਿਸੇ ਵੀ ਕੰਮ ਦਾ ਅਧਿਕਾਰਤ ਤੌਰ ’ਤੇ ਐਲਾਨ ਹੋਣ ਤੋਂ ਪਹਿਲਾਂ ਆਪਣੀ ਸੂਚਨਾ ਲੀਕ ਕਰ ਦਿੰਦੇ ਹਨ, ਪ੍ਰੰਤੂ ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਵੱਖ-ਵੱਖ ਸਿਆਸੀ ਪਾਰਟੀਆਂ ਦੀਆਂ ਗਤੀਵਿਧੀਆਂ ਨੂੰ ਦੇਖਣ ਤੋਂ ਸਪੱਸ਼ਟ ਹੋ ਰਿਹਾ ਹੈ ਕਿ ਇਸ ਵਾਰ ਇਨਾਂ ‘ਸੂਤਰਾਂ’ ਦੀ ਕਾਬਲੀਅਤ ਫੇਲ ਸਾਬਿਤ ਹੋਈ ਹੈ। ਪੰਜਾਬ ’ਚ ਲੱਗਭੱਗ ਸਾਰੀਆਂ ਸਿਆਸੀ ਪਾਰਟੀਆਂ ਵੱਲੋਂ ਐਲਾਨ ਕੀਤੇ ਉਮੀਦਵਾਰਾਂ ਦੀ ਭਿਣਕ ਵੀ ਇਸ ਵਾਰ ਜ਼ਿਆਦਾ ਨਹੀਂ ਲੱਗੀ, ਜੇਕਰ ਕੁਝ ਕੁ ਵੱਡੇ ਚਿਹਰਿਆਂ ਦੀਆਂ ਸੀਟਾਂ ਨੂੰ ਛੱਡ ਦਿੱਤਾ ਜਾਵੇ ਤਾਂ ਬਾਕੀ ਬਚੀਆਂ ਬਹੁਤੀਆਂ ਸੀਟਾਂ ਉੱਪਰ ਕੁਝ ਅਜਿਹੇ ਚਿਹਰੇ ਟਿਕਟ ਲੈਣ ਵਿੱਚ ਕਾਮਯਾਬ ਰਹੇ ਜਿਹੜੇ ‘ਸੂਤਰਾਂ’ ਦੀ ਸੂਚੀ ਵਿੱਚ ਵੀ ਨਹੀਂ ਸਨ। ਸੋਸ਼ਲ ਮੀਡੀਆ ਨੇ ਵੀ ਇਨਾਂ ‘ਸੂਤਰਾਂ’ ਦੀ ਕਦਰ ਘਟਾ ਦਿੱਤੀ ਹੈ, ਆਪਣੀ ਟੀਆਰਪੀ ਵਧਾਉਣ ਦੇ ਚੱਕਰਾਂ ’ਚ ਸੈਂਕੜਿਆਂ ਦੀ ਗਿਣਤੀ ਵਿੱਚ ਯੂਟਿਊਬ ਚੈਨਲ ਰੋਜ਼ਾਨਾ ਕੋਈ ਮਨਘੜਤ ਖ਼ਬਰ/ਸਟੋਰੀ/ਸੂਚਨਾ ਦਿੰਦੇ ਹਨ, ਜਿਹੜੀ ਕਈ ਵਾਰ ਤੁੱਕਾ ਲੱਗਣ ਵਾਂਗ ਸੱਚ ਵੀ ਸਾਬਿਤ ਹੋ ਜਾਂਦੀ ਹੈ। ਇਹ ਵੀ ਅਤਿਕਥਨੀ ਨਹੀਂ ਕਿ ਵਰਿਆਂ ਤੋਂ ਕੰਮ ਕਰਦੇ ਸੂਤਰਾਂ ਦੀ ਜਗਾ ਕੁਝ ਪੱਤਰਕਾਰਾਂ ਨੇ ਲੈ ਲਈ ਹੈ, ਜਿਹੜੇ ਪੱਤਰਕਾਰਤਾ ਦੀਆਂ ਕਦਰਾਂ ਕੀਮਤਾਂ ਨੂੰ ਲਿਤਾੜ ਕੇ ਸਿਆਸੀ ਆਗੂਆਂ ਦੇ ਮੋਹਰੇ ਬਣ ਕੇ ਵਿਚਰਦੇ ਹਨ, ’ਤੇ ਅਜਿਹੇ ਪੱਤਰਕਾਰ ਸੂਤਰਾਂ ਨੂੰ ਆਗੂਆਂ ਦੇ ਨੇੜੇ ਨਹੀਂ ਫਟਕਣ ਦਿੰਦੇ, ਸ਼ਾਇਦ ਇਸੇ ਕਰਕੇ ਇਸ ਵਾਰ ‘ਸੂਤਰ’ ਫੇਲ ਸਾਬਿਤ ਹੋ ਰਹੇ ਹਨ।
Menu
