ਬਰਨਾਲਾ, 18 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ) : ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਚੋਣ ਪ੍ਰਚਾਰ ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ ਅਨੁਸਾਰ ਬੰਦ ਹੋ ਚੁੱਕਾ ਹੈ। ਪਿੰਡਾਂ ਅਤੇ ਸ਼ਹਿਰਾਂ ਦੇ ਗਲੀ ਮੁਹੱਲਿਆਂ ਵਿੱਚ ਲਾਊਡ ਸਪੀਕਰਾਂ ਦੇ ਸ਼ੋਰ ਪ੍ਰਦੂਸ਼ਨ ਤੋਂ ਆਮ ਲੋਕਾਂ ਨੂੰ ਨਿਜਾਤ ਮਿਲੀ ਹੈ। ਸ਼ਨੀਵਾਰ 19 ਫਰਵਰੀ ਪੋਲਿੰਗ ਪਾਰਟੀਆਂ ਪੋਲਿੰਗ ਬੂਥਾਂ ਲਈ ਵੋਟ ਪ੍ਰਕਿਰਿਆਂ ਦਾ ਲੋੜੀਂਦਾ ਸਮਾਨ ਲੈ ਕੇ ਰਵਾਨਾ ਹੋਣਗੀਆਂ ਅਤੇ 20 ਫਰਵਰੀ ਐਤਵਾਰ ਪੋਲਿੰਗ ਬੂ੍ਥਾਂ ਉੱਪਰ ਵੋਟਾਂ ਪੈਣਗੀਆਂ। 10 ਮਾਰਚ ਨੂੰ ਵੋਟਾਂ ਦਾ ਨਤੀਜਾ ਐਲਾਨ ਕੀਤਾ ਜਾਵੇਗਾ।
ਚੋਣ ਲੜ ਰਹੇ ਉਮੀਦਵਾਰਾਂ ਦੀ ਕਿਸਮਤ 20 ਫਰਵਰੀ ਨੂੰ ਈਵੀਐਮ ਮਸ਼ੀਨਾਂ ਵਿੱਚ ਬੰਦ ਹੋ ਜਾਵੇਗੀ। 10 ਮਾਰਚ ਤੱਕ ਉਮੀਦਵਾਰਾਂ ਦੇ ਦਿਲ ਦੀ ਧੜਕਣ ਅਸਥਿਰ ਰਹੇਗੀ। ਕੁਝ ਉਮੀਦਵਾਰ ਚੋਣ ਪ੍ਰਚਾਰ ਦੀ ਥਕਾਵਟ ਘੱਟ ਕਰਨ ਨਈ 20 ਫਰਵਰੀ ਤੋਂ ਬਾਅਦ ਹਫਤਾ ਭਰ ਪਹਾੜਾਂ ਦੀ ਸੈਰ ਕਰਨਗੇ। ਪਿੰਡਾਂ ਦੀਆਂ ਸੱਥਾਂ ਵਿੱਚ ਅਗੇਤਰੇ ਨਤੀਜੇ ਐਲਾਨ ਹੁੰਦੇ ਰਹਿਣਗੇ, ਜਿਨਾਂ ਵਿੱਚ ਇੱਕ ਦਿਨ ’ਚ ਕਈ-ਕਈ ਉਮੀਦਵਾਰ ਜਿੱਤਿਆ ਕਰਨਗੇ ਅਤੇ ਕਈ ਕਈ ਉਮੀਦਵਾਰ ਹਾਰਿਆ ਕਰਨਗੇ। ਚੋਣ ਲੜ ਰਹੇ ਨੇਤਾਵਾਂ ਦੇ ਭਗਤ 20 ਫਰਵਰੀ ਤੋਂ ਬਾਅਦ ਆਪਣੇ ਆਪਣੇ ਪਿੰਡਾਂ/ਸ਼ਹਿਰਾਂ ਦੀਆਂ ਅਟੇ-ਸਟੇ ਵਾਲੀਆਂ ਰਿਪੋਰਟਾਂ ਲੈ ਕੇ ਨੇਤਾਵਾਂ ਦੇ ਚਰਚਾ ਰੂਮ ਵਿੱਚ ਹਾਜ਼ਰੀਆਂ ਲਗਵਾਉਣਗੇ। ਸੱਤਾ ਦੀ ਦੌੜ ਵਿੱਚ ਸ਼ਾਮਲ ਮੁੱਖ ਸਿਆਸੀ ਧਿਰਾਂ ਚੋਣ ਨਤੀਜੇ ਐਲਾਨ ਹੋਣ ਤੋਂ ਬਾਅਦ ਪੈਦਾ ਹੋਣ ਵਾਲੇ ਸਿਆਸੀ ਸਮੀਕਰਨਾਂ ਦੇ ਮੁਤਾਬਿਕ ਤਿੜਕਮਬਾਜ਼ੀਆਂ ਲਗਾਉਣਗੇ। ਹਰ ਸਿਆਸੀ ਪਾਰਟੀ ਕਿਸੇ ਦੂਜੀ ਸਿਆਸੀ ਪਾਰਟੀ ਦੇ ਮਨੀਰਾਮ ਦੀ ਤਾਕਤ ਵਿੱਚ ਆਉਣ ਵਾਲੇ ਵਿਧਾਇਕਾਂ ਦੀ ਸੂਚੀ ਤਿਆਰ ਕਰੇਗੀ । ਬਹਰਹਾਲ ! ਲੋਕਾਂ ਨੂੰ 20 ਫਰਵਰੀ ਉੱਪਰ ਆਪਣਾ ਧਿਆਨ ਕੇਂਦਰਿਤ ਕਰਨਾ ਚਾਹੀਦਾ ਹੈ ਅਤੇ ਆਪਣੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਜ਼ਰੂਰ ਕਰਨੀ ਚਾਹੀਦੀ ਹੈ। ਵੋਟਾਂ ਵਾਲੇ ਦਿਨ ਪਾਰਟੀਬਾਜ਼ੀ ਤੋਂ ਉੱਪਰ ਉੱਠ ਕੇ ਅਮਨ ਸ਼ਾਤੀ ਤੇ ਆਪਸੀ ਭਾਈਚਾਰਾ ਕਾਇਮ ਰੱਖਣਾ ਚਾਹੀਦਾ ਹੈ।
Menu
