ਬਰਨਾਲਾ, 04 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ) : ਪ੍ਰਾਈਵੇਟ ਸਕੂਲਾਂ ਵੱਲੋਂ ਬੱਚਿਆਂ ਦੇ ਮਾਪਿਆਂ ਦੀ ਕਿਤਾਬਾਂ ਦੇ ਮਾਮਲੇ ’ਚ ਲੁੱਟ ਦੇ ਰੌਲੋ-ਰੱਪੇ ਦੌਰਾਨ ਬਰਨਾਲਾ ਸ਼ਹਿਰ ਦੇ ਇੱਕ ਵਿਅਕਤੀ ਨੇ ਮਾਪਿਆਂ ਨੂੰ ਰਾਹਤ ਦੇਣ ਦਾ ਬੀੜਾ ਚੁੱਕਿਆ ਹੈ। ਜਾਣਕਾਰੀ ਅਨੁਸਾਰ ਦਿਨੇਸ ਜੈਨ ਨੇ ਇੱਕ ਨਿਵੇਕਲੀ ਪਹਿਲ ਕੀਤੀ ਹੈ। ਜਿਸ ਤਹਿਤ ਉਹ ਕਿਸੇ ਵੀ ਵਿਦਿਅਰਥੀ ਦੀਆਂ ਪੁਰਾਣੀਆਂ ਕਿਤਾਬਾਂ ਲੈ ਲੈਂਦਾ ਹੈ ਅਤੇ ਉਸ ਨੂੰ ਉਸ ਦੀ ਨਵੀਂ ਕਲਾਸ ਦੀਆਂ ਕਿਤਾਬਾਂ ਦੇ ਦਿੰਦਾ ਹੈ। ਇਸ ਸੰਬੰਧੀ ਗੱਲਬਾਤ ਕਰਦਿਆਂ ਦਿਨੇਸ ਜੈਨ ਨੇ ਦੱਸਿਆ ਕਿ ਉਸ ਨੇ ਇਸ ਮਕਸਦ ਲਈ ਸੋਸ਼ਲ ਮੀਡੀਆ ਪਲੈਟਫਾਰਮ ਦੀ ਚੋਣ ਕੀਤੀ ਜਿਸ ਤੋਂ ਬਾਅਦ ਉਸ ਕੋਲ ਕਈ ਕਲਾਸਾਂ ਦੀਆਂ ਕਿਤਾਬਾਂ ਜਮਾਂ ਹੋ ਗਈਆਂ, ਜੋ ਉਸ ਨੇ ਅੱਗੇ ਲੋੜਵੰਦ ਵਿਦਿਅਰਥੀਆਂ ਨੂੰ ਦੇ ਦਿੱਤੀਆਂ ਅਤੇ ਉਨਾਂ ਵਿਦਿਆਰਥੀਆਂ ਦੁਆਰਾ ਦਿੱਤੀਆਂ ਕਿਤਾਬਾਂ ਕਿਸੇ ਹੋਰ ਲੋੜਵੰਦ ਵਿਦਿਆਰਥੀ ਨੂੰ ਦੇ ਦਿੱਤੀਆਂ। ਦਿਨੇਸ ਜੈਨ ਦੀ ਇਸ ਮੁਹਿੰਮ ਵਿੱਚ ਉਸ ਦੀ ਪਤਨੀ ਰੀਤੂ ਜੈਨ ਅਤੇ ਮਿੱਤਰ ਹਰੀਸ ਬਾਂਸਲ , ਹਰੀ ਸਿੰਘ ਚੌਹਾਨ , ਸੌਰਵ ਗਰਗ, ਕੁਲਦੀਪ ਸਿੰਘ ਉਸ ਦਾ ਸਹਿਯੋਗ ਕਰ ਰਹੇ ਹਨ। ਦਿਨੇਸ ਜੈਨ ਨੇ ਇਹ ਮੁਹਿੰਮ ਆਪਣੇ ਘਰ ਤੋਂ ਹੀ ਸ਼ੁਰੂ ਕੀਤੀ ਹੋਈ ਹੈ। ਸ਼ਹਿਰ ਅੰਦਰ ਦਿਨੇਸ ਜੈਨ ਦੇ ਇਹ ਉਦਮ ਦੀ ਸ਼ਲਾਘਾ ਹੋ ਰਹੀ ਹੈ।
