-ਪਿੰਡ ਦੀ ਪੰਚਾਇਤ ਨੇ ਰਾਤ ਦੇ ਹਨੇਰੇ ’ਚ ਕੀਤਾ ਦਿਨ ਦੀ ਰੌਸ਼ਨੀ ਵਰਗਾ ਫ਼ੈਸਲਾ
ਬਰਨਾਲਾ,17 ਜੂਨ (ਨਿਰਮਲ ਸਿੰਘ ਪੰਡੋਰੀ) :-
ਕਈ ਵਾਰ ਮਨੁੱਖ ਆਪਣੇ ਦਿਲ ਦੀ ਜ਼ਿਦ ਅੱਗੇ ਐਨਾ ਮਜ਼ਬੂਰ ਹੋ ਜਾਂਦਾ ਹੈ ਕਿ ਉਸ ਨੂੰ ਸਮਾਜਿਕ ਰਿਸ਼ਤਿਆਂ ਤੇ ਸਮਾਜਿਕ ਕਦਰਾਂ-ਕੀਮਤਾਂ ਦੀ ਪਰਵਾਹ ਨਹੀਂ ਰਹਿੰਦੀ ਅਤੇ ਆਪਣੇ ਦਿਲ ਮਗਰ ਲੱਗ ਕੇ ਕੀਤੀਆਂ ਗਲਤੀਆਂ ਦੀ ਵੱਡੀ ਕੀਮਤ ਵੀ ਚੁਕਾਉਣੀ ਪੈਂਦੀ ਹੈ। ਬਰਨਾਲਾ ਜ਼ਿਲੇ ਦੇ ਇੱਕ ਪਿੰਡ ’ਚ ਬੀਤੇ ਦਿਨੀਂ ਵਾਪਰੀ ਇੱਕ ਘਟਨਾ ਇਹੋ ਸਬਕ ਦਿੰਦੀ ਹੈ ਕਿ ਬੰਦੇ ਨੂੰ ਆਪਣੇ ਜਜ਼ਬਾਤਾਂ ਨੂੰ ਕਾਬੂ ਵਿੱਚ ਰੱਖਣਾ ਚਾਹੀਦਾ ਹੈ, ਨਹੀਂ ਤਾਂ ਕਈ ਵਾਰ ਇਸ ਦੀ ਅਜਿਹੀ ਕੀਮਤ ਚੁਕਾਉਣੀ ਪੈਂਦੀ ਹੈ ਜੋ ਬੰਦੇ ਨੇ ਕਦੇ ਸੋਚੀ ਵੀ ਨਾ ਹੋਵੇ। ਘਟਨਾ ਦੇ ਵੇਰਵੇ ਅਨੁਸਾਰ ਪਿੰਡ ਦੇ ਇੱਕ ਵਿਅਕਤੀ ਨੇ ਪਿੰਡ ਦੀ ਹੀ ਇੱਕ ਸ਼ਾਦੀਸ਼ੁਦਾ ਤੇ ਤਿੰਨ ਬੱਚਿਆਂ ਦੀ ਮਾਂ ਨਾਲ ਨਾਜਾਇਜ਼ ਸੰਬੰਧ ਬਣੇ ਹੋਏ ਸਨ, ਜਿਸ ਬਾਰੇ ਔਰਤ ਦੇ ਪਤੀ ,ਸਹੁਰਾ ਪਰਿਵਾਰ ਅਤੇ ਆਂਢ-ਗੁਆਂਢ ਸਮੇਤ ਪਿੰਡ ਵਾਸੀਆਂ ਨੂੰ ਵੀ ਜਾਣਕਾਰੀ ਸੀ। ਉਕਤ ਵਿਅਕਤੀ ਦੀਆਂ ਆਪਣੀ ਪ੍ਰੇਮਿਕਾ ਦੇ ਘਰ ਦੀਆਂ ਫੇਰੀਆਂ ਤੋਂ ਔਰਤ ਦੇ ਪਰਿਵਾਰ ਵਾਲੇ ਦੀ ਤੰਗ ਸਨ ਕਿਉਂਕਿ ਕਈ ਵਾਰ ਸਮਝਾਉਣ ਦੇ ਬਾਵਜੂਦ ਵੀ ਉਕਤ ਔਰਤ ਨੇ ਆਪਣੇ ਪ੍ਰੇਮ ਸੰਬੰਧਾਂ ਨੂੰ ਜਾਰੀ ਰੱਖਿਆ।
ਇੱਕ ਰਾਤ ਅਜਿਹੀ ਆਈ ਜਦ ਸਮਾਜ ਨੇ ਉਕਤ ਵਿਅਕਤੀ ਅਤੇ ਔਰਤ ਨੂੰ ਪੱਕੇ ਤੌਰ ’ਤੇ ਜਾਇਜ਼ ਸੰਬੰਧਾਂ ਵਿੱਚ ਬੰਨ ਦਿੱਤਾ। ਹੋਇਆ ਇੰਝ ਕਿ ਇੱਕ ਰਾਤ ਉਕਤ ਆਸ਼ਕ ਵਿਅਕਤੀ ਆਪਣੀ ਪ੍ਰੇਮਿਕਾ ਦੇ ਘਰ ਉਸ ਨੂੰ ਮਿਲਣ ਲਈ ਗਿਆ , ਜਦ ਔਰਤ ਦੇ ਪਰਿਵਾਰ ਵਾਲਿਆਂ ਨੂੰ ਪਤਾ ਲੱਗਿਆ ਤਾਂ ਉਨਾਂ ਨੇ ਪਿੰਡ ਦੀ ਪੰਚਾਇਤ ਅਤੇ ਹੋਰ ਪਿੰਡ ਵਾਸੀਆਂ ਦਾ ਮੌਕੇ ’ਤੇ ਰਾਤ ਸਮੇਂ ਹੀ ਇਕੱਠ ਕਰ ਲਿਆ। ਇਸ ਭਰੇ ਇਕੱਠ ਵਿੱਚ ਪਿੰਡ ਦੀ ਪੰਚਾਇਤ ਨੇ ਉਕਤ ਔਰਤ ਨੂੰ ਪਤੀ , ਸਹੁਰਾ ਪਰਿਵਾਰ ਦੀ ਸਹਿਮਤੀ ਨਾਲ ਆਸ਼ਕ ਵਿਅਕਤੀ ਦੇ ਘਰ ਪੱਕੇ ਤੌਰ ’ਤੇ ਰਹਿਣ ਲਈ ਫ਼ੈਸਲਾ ਸੁਣਾ ਦਿੱਤਾ। ਇਸ ਫ਼ੈਸਲੇ ਨੂੰ ਹਾਜ਼ਰ ਪਿੰਡ ਵਾਸੀਆਂ ਨੇ ਵੀ ਆਪਣੀ ਸਹਿਮਤੀ ਦਿੱਤੀ, ਜਿਸ ਤੋਂ ਬਾਅਦ ਉਕਤ ਔਰਤ ਨੂੰ ਤਿੰਨ ਬੱਚਿਆਂ ਸਮੇਤ ਆਸ਼ਕ ਦੇ ਘਰ ਭੇਜ ਦਿੱਤਾ ਅਤੇ ਨਾਲ ਹੀ ਉਸ ਦੇ ਪੇਕਿਆਂ ਵੱਲੋਂ ਦਾਜ ਵਿੱਚ ਦਿੱਤਾ ਸਮਾਨ ਟਰਾਲੀ ਵਿੱਚ ਲੱਦ ਕੇ ਆਸ਼ਕ ਦੇ ਘਰ ਰੱਖ ਦਿੱਤਾ । ਘਟਨਾ ਦਾ ਦਿਲਚਸਪ ਪਹਿਲੂ ਇਹ ਵੀ ਹੈ ਕਿ ਆਸ਼ਕ ਭਾਅਜੀ ਦੇ ਪਰਿਵਾਰ ਨੇ ਵੀ ਪੰਚਾਇਤ ਦੇ ਫ਼ੈਸਲੇ ਨਾਲ ਸਹਿਮਤੀ ਪ੍ਰਗਟ ਕਰਦੇ ਹੋਏ ਦੋਵੇਂ ਪ੍ਰੇਮੀਆਂ ਨੂੰ ‘ਬਾਹਰਲਾ ਘਰ’ ਰਹਿਣ ਲਈ ਦੇ ਦਿੱਤਾ। ਇਲਾਕੇ ਵਿੱਚ ਇਸ ਘਟਨਾ ਦੀ ਖ਼ੂਬ ਚਰਚਾ ਹੋ ਰਹੀ ਹੈ।
