-ਸੂਰਤੇ ਹਾਲ ਨਗਰ ਕੌਂਸਲ…ਸਿਰ ‘ਤੇ ਨਾ ਕੁੰਡਾ, ਹਾਥੀ ਫਿਰੇ ਲੁੰਡਾ
ਬਰਨਾਲਾ,24 ਜੂਨ (ਨਿਰਮਲ ਸਿੰਘ ਪੰਡੋਰੀ)-
-ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਵੱਡੀ ਜਿੱਤ ਪ੍ਰਾਪਤ ਕਰਨ ਤੋਂ ਬਾਅਦ ਆਮ ਆਦਮੀ ਪਾਰਟੀ ਨੇ ਪੰਜਾਬ ਦੀ ਸੱਤਾ ‘ਤੇ ਕਬਜ਼ਾ ਕੀਤਾ। ਚੋਣਾਂ ਦੌਰਾਨ ‘ਆਪ’ ਆਗੂਆਂ ਨੇ ਲੋਕਾਂ ਨਾਲ ਇੱਕ ਵਾਅਦਾ ਕੀਤਾ ਸੀ ਕਿ ਉਹ ‘ਰਾਜਨੀਤੀ ਕਰਨ ਨਹੀਂ ਸਗੋਂ ਰਾਜਨੀਤੀ ਬਦਲਣ’ ਆਏ ਹਨ। ਲੋਕਾਂ ਨੂੰ ਉਮੀਦ ਸੀ ਕਿ ਰਵਾਇਤੀ ਪਾਰਟੀਆਂ ਵੱਲੋਂ ਵਰ੍ਹਿਆਂ ਤੋਂ ਕੀਤੀ ਜਾ ਰਹੀ ਰਾਜਨੀਤੀ ਦਾ ਮੁਹਾਂਦਰਾ ਬਦਲੇਗਾ ਤੇ ਆਮ ਲੋਕਾਂ ਦੀ ਗੱਲ ਸੁਣੀ ਜਾਵੇਗੀ। ਮਾਰਚ 2022 ‘ਚ ਸੱਤਾ ਸੰਭਾਲਣ ਤੋਂ ਬਾਅਦ ਦਸੰਬਰ 2022 ਤੱਕ ਸਭ ਕੁਝ ਠੀਕ ਠਾਕ ਰਿਹਾ ਪ੍ਰੰਤੂ 2023 ਚੜਦੇ ਹੀ ਆਮ ਆਦਮੀ ਪਾਰਟੀ ਨੂੰ ਰਵਾਇਤੀ ਪਾਰਟੀਆਂ ਵਾਲਾ ਸਥਾਨਕ ਸੰਸਥਾਵਾਂ ‘ਤੇ ਕਬਜ਼ੇ ਵਾਲਾ ਬੁਖਾਰ ਚੜ ਗਿਆ ਅਤੇ ਹੇਠਲੇ ਪੱਧਰ ‘ਤੇ ਆਪ ਦੇ ਮੰਤਰੀਆਂ, ਵਿਧਾਇਕਾਂ ਅਤੇ ਹੋਰ ਆਗੂਆਂ ਨੇ ਸਥਾਨਕ ਸੰਸਥਾਵਾਂ ‘ਤੇ ਕਬਜ਼ੇ ਕਰਨੇ ਸ਼ੁਰੂ ਕਰ ਦਿੱਤੇ। ਨਗਰ ਕੌਸਲ ਬਰਨਾਲਾ ਦੀ ਪ੍ਰਧਾਨਗੀ ਦੀ ਕੁਰਸੀ ਦਾ ਵੀ ਇਹੋ ਹਾਲ ਹੋਇਆ ਜਿਸ ਉੱਪਰ ਸੱਤਾਧਾਰੀਆਂ ਨੇ ਆਪਣੇ ਕੌਂਸਲਰ ਨੂੰ ਬਿਠਾਉਣ ਦੀ ਖਾਤਰ ਜੁਗਾੜੂ ਜੰਗ ਸ਼ੁਰੂ ਕੀਤੀ ਪ੍ਰੰਤੂ ਇਹ ਜੁਗਾੜੂ ਜੰਗ ਸੱਤਾਧਾਰੀਆਂ ਦੇ ਉਲਟ ਚੱਲ ਪਈ। ਕਾਂਗਰਸੀ ਪ੍ਰਧਾਨ ਗੁਰਜੀਤ ਸਿੰਘ ਨੂੰ ਹਟਾਉਣ ਤੋਂ ਬਾਅਦ ਜਦ ਸੱਤਾਧਾਰੀਆਂ ਨੇ ਆਪਣੇ ਐਮਸੀ ਨੂੰ ਪ੍ਰਧਾਨ ਬਣਾ ਦਿੱਤਾ ਤਾਂ ਕਾਂਗਰਸੀ ਪ੍ਰਧਾਨ ਗੁਰਜੀਤ ਸਿੰਘ ਨੇ ਹਾਈਕੋਰਟ ਦੀ ਸ਼ਰਨ ਲਈ ਜਿੱਥੇ ਹਾਈਕੋਰਟ ਨੇ ਉਸ ਦੀ ਗੱਲ ਸੁਣਦੇ ਹੋਏ ਨਵੇਂ ਪ੍ਰਧਾਨਗੀ ਦੀ ਪ੍ਰਕਿਰਿਆ ‘ਤੇ ਹੀ ਰੋਕ ਲਗਾ ਦਿੱਤੀ। ਹੁਣ ਤੱਕ ਮਾਨਯੋਗ ਹਾਈਕੋਰਟ ਵਿੱਚ ਇਸ ਮਾਮਲੇ ਦੀਆਂ 7-8 ਪੇਸ਼ੀਆਂ ਪੈ ਚੁੱਕੀਆਂ ਹਨ ਪ੍ਰੰਤੂ ਗੱਲ ਕਿਸੇ ਤਣ ਪੱਤਣ ਨਹੀਂ ਲੱਗੀ। ਪ੍ਰਧਾਨਗੀ ਦੀ ਕੁਰਸੀ ‘ਤੇ ਨਾ ਤਾਂ ਪੁਰਾਣਾ ਪ੍ਰਧਾਨ ਬੈਠ ਸਕਦਾ ਹੈ ਅਤੇ ਨਾ ਹੀ ਨਵਾਂ ਪ੍ਰਧਾਨ ਬੈਠ ਸਕਦਾ ਹੈ।
ਨਗਰ ਕੌਸਲ ਦੀ ਪ੍ਰਧਾਨਗੀ ਦੀ ਕੁਰਸੀ ਦੀ ਹਾਲਤ “ਰੰਡੀ ਨਾ ਵਿਆਹੀ” ਵਾਲੀ ਬਣੀ ਹੋਈ ਹੈ। ਨਗਰ ਕੌਂਸਲ ਦਾ ਕੋਈ ਪੱਕਾ ਪ੍ਰਧਾਨ ਨਾ ਹੋਣ ਕਾਰਨ ਸ਼ਹਿਰ ਦੇ ਲੋਕ ਬੁਨਿਆਦੀ ਸਹੂਲਤਾਂ ਨੂੰ ਵੀ ਤਰਸ ਰਹੇ ਹਨ। ਪਿਛਲੀ ਇਕ ਮਹੀਨੇ ਤੋਂ ਸ਼ਹਿਰ ਦੇ ਕੁਝ ਵਾਰਡਾਂ ‘ਚ ਪੀਣ ਵਾਲੇ ਪਾਣੀ ਦੀ ਕਮੀ ਇਸ ਦੀ ਵੱਡੀ ਮਿਸਾਲ ਹੈ। “ਸਿਰ ‘ਤੇ ਨੀ ਕੁੰਡਾ ਹਾਥੀ ਫਿਰੇ ਲੁੰਡਾ” ਦੀ ਕਹਾਵਤ ਅਨੁਸਾਰ ਕਮੇਟੀ ਦੇ ਦਫਤਰ ਵਿੱਚ ਵੀ ਆਮ ਲੋਕਾਂ ਨੂੰ ਖੱਜਰ ਖ਼ੁਆਰ ਹੋਣਾ ਪੈ ਰਿਹਾ ਹੈ। ਨਗਰ ਕੌਸਲ ਦੇ ਮੌਜੂਦਾ ਹਾਲਾਤਾਂ ਲਈ ਲੋਕ ਟਿੱਪਣੀ ਕਰ ਰਹੇ ਹਨ ਕਿ ਸੱਤਾਧਾਰੀਆਂ ਨੇ ਨਗਰ ਕੌਂਸਲ ਦੀ ਕੁਰਸੀ ਨੂੰ ਵਿਆਹੁਣ ਦੀ ਲਈ ਆਪਣੇ ਇੱਕ ਕੌਂਸਲਰ ਦੇ ਸਿਰ ‘ਤੇ ਜਲਦਬਾਜ਼ੀ ਵਿੱਚ ਸਿਹਰਾ ਤਾਂ ਬੰਨ ਦਿੱਤਾ ਪਰੰਤੂ ਕਾਨੂੰਨ ਨੇ ਸਿਆਸੀ ਭਾਬੀਆਂ ਨੂੰ ਲਾੜੇ ਦੇ ਸੁਰਮਾ ਪਾਉਣ ਤੋਂ ਰੋਕ ਦਿੱਤਾ ਜਿਸ ਕਰਕੇ ਇਹ ਬਰਾਤ ਅਜੇ ਰਸਤੇ ਵਿੱਚ ਹੀ ਅਟਕੀ ਹੋਈ ਹੈ। ਦੂਜੇ ਪਾਸੇ ਪ੍ਰਧਾਨਗੀ ਦੀ ਕੁਰਸੀ ਦੀ ਹਾਲਤ “ਆਜਾ ਵੇ ਮਾਹੀ ਤੈਨੂੰ ਅੱਖੀਆਂ ਉਡੀਕਦੀਆਂ” ਵਾਲੀ ਬਣੀ ਹੋਈ ਹੈ ਪ੍ਰੰਤੂ ਦੋਵੇਂ ਮਾਹੀ ਕਾਨੂੰਨ ਦੀਆਂ ਘੁੰਮਣ ਘੇਰੀਆਂ ਵਿੱਚ ਫਸੇ ਹੋਏ ਹਨ। ਲੋਕਾਂ ਨੂੰ ਉਡੀਕ ਹੈ ਕਿ ਗੁਰਜੀਤ ਸਿੰਘ ਅਤੇ ਰੁਪਿੰਦਰ ਸਿੰਘ ਵਿੱਚੋਂ ਕਿਹੜਾ ਮਾਹੀ ਕਾਨੂੰਨੀ ਜੰਗ ਜਿੱਤ ਕੇ ਚੰਡੀਗੜ੍ਹ ਤੋਂ ਪ੍ਰਧਾਨਗੀ ਦੀ ਕੁਰਸੀ ਲਈ “ਜੈ ਮਾਲਾ” ਲੈ ਕੇ ਆਵੇਗਾ। ਦੱਸ ਦੇਈਏ ਕਿ ਹਾਈਕੋਰਟ ਵਿੱਚ ਇਸ ਮਾਮਲੇ ਦੀ ਅਗਲੀ ਤਰੀਕ 8 ਜੁਲਾਈ 2024 ਹੈ।
