7 ਕਰੋੜ ਦਾ ਸੱਪ : ਕੋਅਪਰੇਟਿਵ ਸੁਸਾਇਟੀਆਂ ਦੇ ਰਿਕਾਰਡ ਦੀ ਜਾਂਚ ਦੀ ਮੰਗ ਹੋਈ ਤੇਜ਼
–ਆਲੀਸ਼ਾਨ ਸਹੂਲਤਾਂ ਮਾਣ ਰਹੇ ਨੇ ਸੁਸਾਇਟੀਆਂ ਦੇ ਬਹੁਤੇ ਕਰਮਚਾਰੀ
ਚੰਡੀਗੜ, 30 ਅਗਸਤ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬ ਦੀਆਂ ਕੋਅਪਰੇਟਿਵ ਸੁਸਾਇਟੀਆਂ ’ਚ ਘਪਲੇ ਦੀਆਂ ਖ਼ਬਰਾਂ ਦਿਨੋਂ-ਦਿਨ ਵਧਦੀਆਂ ਜਾ ਰਹੀਆਂ ਹਨ। ਇਨ੍ਹਾਂ ਸੁਸਾਇਟੀਆਂ ਵਿੱਚ ਵੱਡੇ ਘਪਲਿਆਂ ਦੀ ਚਰਚਾ ਪਿਛਲੀਆਂ ਸਰਕਾਰਾਂ ਮੌਕੇ ਵੀ ਹੁੰਦੀ ਰਹੀ ਹੈ ਪ੍ਰੰਤੂ ਕਾਰਵਾਈ ਕਦੇ ਕੋਈ ਨਹੀਂ ਹੋਈ। ਸੱਤਾ ਤਬਦੀਲੀ ਤੋਂ ਬਾਅਦ ਮਾਨ ਸਰਕਾਰ ਦੀ ਭਿ੍ਸ਼ਟਾਚਾਰ ਵਿਰੋਧੀ ਮੁਹਿੰਮ ਦੇ ਘੇਰੇ ਵਿੱਚ ਕੋਅਪਰੇਟਿਵ ਸੁਸਾਇਟੀਆਂ ਨੂੰ ਵੀ ਲਿਆ ਜਾ ਰਿਹਾ ਹੈ। ਜ਼ਿਲ੍ਹਾ ਐਸਬੀਐਸ ਨਗਰ ਦੇ ਪਿੰਡ ਕਰਨਾਣਾ ਦੀ ਸੁਸਾਇਟੀ ਦੇ ਕਰਮਚਾਰੀਆਂ/ਅਧਿਕਾਰੀਆਂ ਵੱਲੋਂ 7 ਕਰੋੜ ਤੋਂ ਵੱਧ ਦਾ ਘਪਲਾ ਕੀਤੇ ਜਾਣ ਦੀਆਂ ਖ਼ਬਰਾਂ ਨੇ ਸੂਬੇ ਦੀਆਂ ਸਾਰੀਆਂ ਸੁਸਾਇਟੀਆਂ ਦੇ ਰਿਕਾਰਡ ਦੀ ਪੜਤਾਲ ਕਰਵਾਏ ਜਾਣ ਦੀ ਮੰਗ ਵੱਲ ਧਿਆਨ ਖਿੱਚਿਆ ਹੈ। ਪਿੰਡ ਕਰਨਾਣਾ ਦੀ ਸੁਸਾਇਟੀ ਦੇ ਘਪਲੇ ’ਚ ਵਿਜੀਲੈਂਸ ਬਿਊਰੋ ਨੇ ਮੁਕੱਦਮਾ ਦਰਜ ਕਰਕੇ 5 ਦੋਸ਼ੀਆਂ ਨੂੰ ਗਿ੍ਫਤਾਰ ਵੀ ਕੀਤਾ ਹੈ। ਵਿਜੀਲੈਂਸ ਬਿਊਰੋ ਅਨੁਸਾਰ ਸੁਸਾਇਟੀ ਵਿੱਚ ਕਰੀਬ 1 ਹਜ਼ਾਰ ਖਾਤਾ ਧਾਰਕ ਹਨ, ਇੱਕ ਪੈਟਰੋਲ ਪੰਪ, ਇੱਕ ਟਰੈਕਟਰ ਅਤੇ ਵੱਡੀ ਮਾਤਰਾਂ ਵਿੱਚ ਖੇਤੀ ਨਾਲ ਸੰਬੰਧਿਤ ਸੰਦ ਵੀ ਹਨ। ਸੁਸਾਇਟੀ ਵੱਲੋਂ ਕਿਸਾਨਾਂ ਨੂੰ ਖਾਦਾਂ ਅਤੇ ਕੀਟਨਾਸ਼ਕ ਦਵਾਈਆਂ ਵੀ ਵੇਚੀਆਂ ਜਾਂਦੀਆਂ ਹਨ। ਕਰਨਾਣਾ ਸੁਸਾਇਟੀ ਵਿੱਚ 6 ਕਰਮਚਾਰੀ ਕੰਮ ਕਰਦੇ ਹਨ। ਪੜਤਾਲ ਦੌਰਾਨ ਸਾਹਮਣੇ ਆਇਆ ਕਿ ਪਿੰਡ ਕਰਨਾਣਾ ਦੇ ਐਨਆਰਆਈ ਅਤੇ ਹੋਰ ਲੋਕਾਂ ਨੇ ਸੁਸਾਇਟੀ ’ਚ ਕਰੋੜਾਂ ਰੁਪਏ ਦੀਆਂ ਐਫਡੀਆਰਜ਼ ਕਰਵਾਈਆਂ ਹੋਈਆਂ ਹਨ। ਸੁਸਾਇਟੀ ਦੇ ਸੈਕਟਰੀ ਨੇੇ ਪ੍ਰਧਾਨ ਅਤੇ ਹੋਰ ਮੈਂਬਰਾਂ ਨਾਲ ਮਿਲੀਭੁਗਤ ਕਰਕੇ ਉਕਤ ਐਫਡੀਆਰਜ਼ ਉੱਪਰ ਲਿਮਟਾਂ ਬਣਾ ਕੇ ਕਰੋੜਾਂ ਰੁਪਏ ਦਾ ਗਬਨ ਕੀਤਾ ਹੈ। ਸੁਸਾਇਟੀ ਦੇ ਰਿਕਾਰਡ ਦੀ ਪੜਤਾਲ ਦੌਰਾਨ 7 ਕਰੋੜ ਤੋਂ ਵੱਧ ਦਾ ਘਪਲਾ ਸਾਹਮਣੇ ਆਇਆ ਹੈ ਅਤੇ ਇਸ ਤੋਂ ਇਲਾਵਾ 36 ਕਰੋੜ ਤੋਂ ਵੱਧ ਦੀਆਂ ਗੜਬੜੀਆਂ ਸਾਹਮਣੇ ਆਈਆਂ ਹਨ। ਪਿੰਡ ਕਰਨਾਣਾ ਸੁਸਾਇਟੀ ਦੇ ਘਪਲੇ ਨੇ ਇਹ ਜ਼ਾਹਿਰ ਕਰ ਦਿੱਤਾ ਹੈ ਕਿ ਸੂਬੇ ਦੀਆਂ ਸਾਰੀਆਂ ਸੁਸਾਇਟੀਆਂ ਦੇ ਰਿਕਾਰਡ ਦੀ ਜਾਂਚ ਹੋਣੀ ਚਾਾੀਦੀ ਹੈ। ਯਕੀਨਨ ! ਸੂਬੇ ਦੀਆਂ ਬਹੁਤੀਆਂ ਸੁਸਾਇਟੀਆਂ ਵਿੱਚ ਕਰਨਾਣਾ ਵਰਗੇ ਘਪਲੇ ਦੇ ਵੱਡੇ ਸੱਪ ਨਿੱਕਲਣਗੇ। ਇਨ੍ਹਾਂ ਸੁਸਾਇਟੀਆਂ ਵਿੱਚ ਬਤੌਰ ਸੈਕਟਰੀ ਡਿਊਟੀ ਕਰ ਰਹੇ ਬਹੁਤੇ ਕਰਮਚਾਰੀਆਂ ਦੀ ਆਮਦਨ/ਖਰਚੇ ਦੀ ਪੜਤਾਲ ਵੀ ਸਾਰੀਆਂ ਪਰਤਾਂ ਖੋਲ ਦੇਵੇਗੀ ਕਿਉਂਕਿ ਸੁਸਾਇਟੀਆਂ ਦੇ ਬਹੁਤੇ ਸੈਕਟਰੀਆਂ ਦਾ ਰਹਿਣ ਸਹਿਣ ਕਲਾਸ-1 ਅਫ਼ਸਰਾਂ ਤੋਂ ਵੀ ਚੰਗਾ ਹੈ।
