-ਟਵਿੱਟਰ ਨੂੰ ਪੈ ਰਿਹਾ ਰੋਜ਼ਾਨਾ 32 ਕਰੋੜ ਦਾ ਘਾਟਾ
–ਕੰਪਨੀ ਕਰ ਰਹੀ ਹੈ ਨਵੀਂ ਯੋਜਨਾ ‘ਤੇ ਵਿਚਾਰ
ਚੰਡੀਗੜ੍ਹ 9 ਨਵੰਬਰ (ਜ਼ੀ98 ਨਿਊਜ਼ ਸਰਵਿਸ)-
ਸੋਸ਼ਲ ਮੀਡੀਆ ਦੇ ਮਕਬੂਲ ਪਲੇਟਫਾਰਮ ਟਵਿੱਟਰ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਤਕੜਾ ਆਰਥਿਕ ਝਟਕਾ ਲੱਗ ਸਕਦਾ ਹੈ। ਖਬਰਾਂ ਹਨ ਕਿ ਟਵਿੱਟਰ ਦੀ ਅਨਲਿਮਿਟਡ ਮੁਫ਼ਤ ਵਰਤੋਂ ਖ਼ਤਮ ਹੋ ਸਕਦੀ ਹੈ ਅਤੇ ਇਸ ਦੀ ਵਰਤੋਂ ਲਈ ਚਾਰਜ ਲੱਗਣਾ ਸ਼ੁਰੂ ਹੋ ਸਕਦਾ ਹੈ। ਟਵਿੱਟਰ ਦੇ ਨਵੇਂ ਮਾਲਕ ਐਲਨ ਮਸਕ ਨੇ ਪਿਛਲੇ ਦਿਨੀਂ ਆਪਣੇ ਕਰਮਚਾਰੀਆਂ ਨਾਲ ਮੀਟਿੰਗ ਵਿੱਚ ਇਸ ਨਵੀਂ ਯੋਜਨਾ ਤੇ ਵਿਚਾਰ ਕੀਤੀ। ਯੋਜਨਾ ਅਨੁਸਾਰ ਟਵਿੱਟਰ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਮੁਫ਼ਤ ਵਿੱਚ ਲਿਮਟਿਡ ਸਮਾਂ ਹੀ ਮਿਲੇਗਾ ਅਤੇ ਇਹ ਲਿਮਟਿਡ ਸਮਾਂ ਖਤਮ ਹੋਣ ਤੋਂ ਬਾਅਦ ਜੇਕਰ ਤੁਸੀਂ ਟਵੀਟ ਕਰਨਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਸਬਸਕ੍ਰਿਪਸ਼ਨ ਫੀਸ ਦੇਣੀ ਪੈ ਸਕਦੀ ਹੈ। ਹਾਲਾਂਕਿ ਇਹ ਯੋਜਨਾ ਕਦ ਸ਼ੁਰੂ ਹੋਵੇਗੀ ਇਸ ਬਾਰੇ ਕੁਝ ਸਪੱਸ਼ਟ ਨਹੀਂ ਹੈ ਪ੍ਰੰਤੂ ਇਹ ਖਬਰ ਪੱਕੀ ਹੈ ਕਿ ਇਸ ਯੋਜਨਾ ‘ਤੇ ਵਿਚਾਰ ਜ਼ਰੂਰ ਹੋ ਰਿਹਾ ਹੈ। ਦੱਸ ਦਈਏ ਕਿ ਟਵਿੱਟਰ ਨੂੰ ਰੋਜ਼ਾਨਾ 32 ਕਰੋੜ ਦਾ ਘਾਟਾ ਪੈ ਰਿਹਾ ਹੈ। ਐਲਨ ਮਸਕ ਨੇ ਟਵਿੱਟਰ ਨੂੰ 44 ਬਿਲੀਅਨ ਡਾਲਰ ਵਿੱਚ ਖਰੀਦਿਆ ਹੈ। ਟਵਿੱਟਰ ‘ਤੇ ਬਹੁਤ ਵੱਡਾ ਕਰਜ਼ਾ ਵੀ ਹੈ। ਕਰਜ਼ੇ ਅਤੇ ਘਾਟੇ ਨੂੰ ਖ਼ਤਮ ਕਰਨ ਲਈ ਐਲਨ ਮਸਕ ਸਬਸਕ੍ਰਿਪਸ਼ਨ ਫੀਸ ਦੀ ਯੋਜਨਾ ‘ਤੇ ਵਿਚਾਰ ਕਰ ਰਹੇ ਹਨ। ਜਨਵਰੀ 2022 ਦੇ ਅੰਕੜਿਆਂ ਮੁਤਾਬਕ ਦੁਨੀਆ ਭਰ ਵਿਚ ਟਵਿੱਟਰ ਦੇ 22 ਕਰੋੜ ਤੋਂ ਜ਼ਿਆਦਾ ਯੂਜ਼ਰਜ਼ ਹਨ। ਭਾਰਤ ਵਿੱਚ ਟਵਿੱਟਰ ਦੇ 2.3 ਕਰੋੜ ਯੂਜ਼ਰਜ਼ ਹਨ।
