ਬਰਨਾਲਾ 31 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-
ਬਰਨਾਲਾ ਜ਼ਿਲ੍ਹੇ ਦੇ ਚੋਰਾਂ,ਲੁਟੇਰਿਆਂ, ਠੱਗਾਂ ਨੇ ਲੋਕਾਂ ਦਾ ਨਵੇਂ ਸਾਲ ਦਾ ਚਾਅ ਫਿੱਕਾ ਕੀਤਾ ਹੋਇਆ ਹੈ । ਚੋਰ ਸਿਰਫ ਰਾਤ ਵੇਲੇ ਹੀ ਨਹੀਂ ਸਗੋਂ ਦਿਨ-ਦਿਹਾੜੇ ਵੀ ਚੋਰੀ ਦੀਆਂ ਘਟਨਾਵਾਂ ਨੂੰ ਦਲੇਰਾਨਾ ਅੰਜ਼ਾਮ ਦੇ ਰਹੇ ਹਨ ਜਿਵੇਂ ਕਿਸੇ ਦਾ ਕੋਈ ਡਰ ਭੈਅ ਨਾ ਹੋਵੇ । ਬੀਤੇ ਕੱਲ ਤਪਾ ਵਿਖੇ ਇਕ ਸੁਨਿਆਰ ਦੀ ਦੁਕਾਨ ‘ਤੇ ਹਮਲਾ ਕਰਨ ਅਤੇ ਲੁੱਟ-ਖੋਹ ਦੀ ਘਟਨਾ ਨਾਲ ਲੋਕਾਂ ਵਿਚ ਡਰ ਸਹਿਮ ਅਤੇ ਰੋਸ ਪਾਇਆ ਜਾ ਰਿਹਾ ਹੈ ਜਿਸ ਕਾਰਨ ਲੋਕਾਂ ਨੇ ਸ਼ਨੀਵਾਰ ਤਪਾ ਸ਼ਹਿਰ ਮੁਕੰਮਲ ਬੰਦ ਕੀਤਾ । ਬਰਨਾਲਾ ਦੇ ਹੰਡਿਆਇਆ ਬਾਜ਼ਾਰ ਵਿਚ ਵੀ ਇੱਕ ਨੌਜਵਾਨ ਇਕ ਦੁਕਾਨ ਅੰਦਰ ਦਾਖ਼ਲ ਹੋ ਕੇ ਬੜੇ ਆਰਾਮ ਨਾਲ ਦੁਕਾਨ ਦਾ ਗੱਲਾ ਤੋੜ ਕੇ 1 ਲੱਖ ਦੀ ਨਕਦੀ ਲੈ ਕੇ ਫਰਾਰ ਹੋ ਗਿਆ । ਦੁਕਾਨ ਦਾ ਮਾਲਕ ਕੁਝ ਮਿੰਟਾਂ ਲਈ ਲਈ ਦੁਕਾਨ ਤੋਂ ਬਾਹਰ ਗਿਆ ਸੀ, ਅੰਦਰ ਲੱਗੇ ਸੀਸੀਟੀਵੀ ਕੈਮਰਿਆਂ ਵਿਚ ਗੱਲਾਂ ਤੋੜਨ ਦੀ ਘਟਨਾ ਕੈਦ ਹੋ ਚੁੱਕੀ ਹੈ। ਚੋਰੀ ਦੀ ਇਕ ਹੋਰ ਘਟਨਾ ਵਿਚ ਧਨੌਲਾ ਰੋਡ ਫਰਵਾਹੀ ਚੂੰਗੀ ਨੇੜੇ ਚੋਰਾਂ ਨੇ ਇੱਕ ਦੁਕਾਨ ਦੀ ਕੰਧ ਵਿੱਚ ਪਾੜ੍ਹ ਲਗਾ ਕੇ ਹਜ਼ਾਰਾਂ ਰੁਪਏ ਦਾ ਸਮਾਨ ਚੋਰੀ ਕੀਤਾ । ਇਸ ਤੋਂ ਇਲਾਵਾ ਬਰਨਾਲਾ ਸ਼ਹਿਰ ਦੀਆਂ ਤੰਗ ਗਲੀਆਂ ਵਿੱਚ ਝਪਟਮਾਰਾਂ ਨੇ ਅੱਤ ਮਚਾਈ ਹੋਈ ਹੈ।ਚੋਰਾਂ, ਲੁਟੇਰਿਆਂ, ਠੱਗਾਂ ਨੇ ਨਵੇਂ ਵਰ੍ਹੇ ਦਾ ਸਵਾਗਤ ਕਰਨ ਲਈ ਲੋਕਾਂ ਦੀਆਂ ਬਣਾਈਆਂ ਵਿਉਂਤਬੰਦੀਆਂ ਵਿਗਾੜ ਦਿੱਤੀਆਂ ਹਨ । ਬਰਨਾਲਾ ਪੁਲਿਸ ਇਨ੍ਹਾਂ ਚੋਰਾਂ ਨੂੰ ਫੜ੍ਹ ਕੇ ਜੇਲਾਂ ਵਿੱਚ ਵੀ ਸੁੱਟ ਰਹੀ ਹੈ ਪ੍ਰੰਤੂ ਰੋਜ਼ਾਨਾ ਹੋ ਰਹੀਆਂ ਚੋਰੀ ਦੀਆਂ ਘਟਨਾਵਾਂ ਕਾਰਨ ਲੋਕਾਂ ਵਿਚ ਸਹਿਮ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ। ਲੋਕ ਇਹ ਚਰਚਾ ਵੀ ਕਰ ਰਹੇ ਹਨ ਕਿ ਜੇਕਰ ਕੈਬਨਿਟ ਮੰਤਰੀ ਦੇ ਸ਼ਹਿਰ ਦਾ ਇਹ ਹਾਲ ਹੈ ਤਾਂ ਆਸੇ-ਪਾਸੇ ਕਿਹੋ ਜਿਹੇ ਹਾਲਾਤ ਹੋਣਗੇ, ਇਸਦਾ ਅੰਦਾਜ਼ਾ ਸਹਿਜੇ ਹੀ ਲਗਾਇਆ ਜਾ ਸਕਦਾ ਹੈ। ਕੈਬਨਿਟ ਮੰਤਰੀ ਦੀ ਸ਼ਹਿਰ ਵਿੱਚੋਂ ਗੈਰ-ਹਾਜ਼ਰੀ ਦੀ ਚਰਚਾ ਵੀ ਹੁਣ ਆਮ ਹੋਣ ਲੱਗ ਪਈ ਹੈ।
