-ਲੋਕਾਂ ਦਾ ਸਵਾਲ….ਫਿਰ ਗਲਤ ਕੰਮ ਕਰਨ ਵਾਲੇ ਅਧਿਕਾਰੀਆਂ ਤੇ ਹੋਰ ਲੋਕਾਂ ਖਿਲਾਫ ਕਾਰਵਾਈ ਕਦੋਂ ਹੋਵੇਗੀ
ਬਰਨਾਲਾ 03 ਮਾਰਚ (ਨਿਰਮਲ ਸਿੰਘ ਪੰਡੋਰੀ)-
ਆਪਣੀ ਉਸਾਰੀ ਤੋਂ ਲੈ ਕੇ ਹੁਣ ਤੱਕ ਚਰਚਾ ਵਿੱਚ ਰਿਹਾ ਬਰਨਾਲਾ ਦਾ ਮਿੰਨੀ ਬੱਸ ਅੱਡਾ ਚਾਲੂ ਹੋਣ ਤੋਂ ਪਹਿਲਾਂ ਹੀ ਬੰਦ ਹੋ ਜਾਵੇਗਾ । ਉੰਝ ਭਾਵੇਂ ਇਸ ਮਿੰਨੀ ਬੱਸ ਅੱਡੇ ਦਾ ਉਦਘਾਟਨ 29 ਅਗਸਤ 2021 ਨੂੰ ਸਾਬਕਾ ਵਿਧਾਇਕ ਕੇਵਲ ਸਿੰਘ ਢਿੱਲੋਂ ਟਰੱਸਟ ਦੇ ਚੇਅਰਮੈਨ ਮੱਖਣ ਸ਼ਰਮਾ ਦੀ ਅਗਵਾਈ ਹੇਠ ਕਰ ਚੁੱਕੇ ਹਨ ਪ੍ਰੰਤੂ ਇਹ ਉਦਘਾਟਨ ਕਾਗਜ਼ਾਂ ਵਿੱਚ ਹੀ ਹੋਇਆ ਹੈ ਜਦਕਿ ਉਦਘਾਟਨ ਤੋਂ ਬਾਅਦ ਵੀ ਇਸ ਮਿੰਨੀ ਬੱਸ ਅੱਡੇ ਦੇ ਅੰਦਰ ਇੱਕ ਵੀ ਬੱਸ ਨੇ ਫੇਰੀ ਨਹੀਂ ਪਾਈ । ਬੀਤੇ ਦਿਨੀਂ ਬਰਨਾਲਾ ਵਿਖੇ ਆਏ ਸਥਾਨਕ ਸਰਕਾਰਾਂ ਮੰਤਰੀ ਡਾ. ਇੰਦਰਬੀਰ ਸਿੰਘ ਨਿੱਝਰ ਨੂੰ ਜਦ ਇਸ ਮਿੰਨੀ ਬੱਸ ਅੱਡੇ ਬਾਰੇ ਸਵਾਲ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ “ਇਹ ਗਲਤ ਜਗ੍ਹਾ ‘ਤੇ ਬਣਿਆ ਹੋਇਆ ਹੈ, ਜੇਕਰ ਇਹ ਚਾਲੂ ਹੋਵੇਗਾ ਤਾਂ ਉਥੇ ਐਕਸੀਡੈਂਟ ਹੋਣ ਦੀਆਂ ਸੰਭਾਵਨਾਵਾਂ ਵਧੇਰੇ ਹਨ, ਅਸੀਂ ਵਿਚਾਰ ਕੀਤਾ ਹੈ ਕਿ ਇਸ ਜਗ੍ਹਾ ਨੂੰ ਕਿਸੇ ਹੋਰ ਮੰਤਵ ਲਈ ਵਰਤਿਆ ਜਾਵੇ”।
ਮੰਤਰੀ ਦੇ ਕਹਿਣ ਮੁਤਾਬਕ ਸਪੱਸ਼ਟ ਹੈ ਕਿ ਗੁਰੂ ਰਵਿਦਾਸ ਚੌਕ ਨੇੜੇ ਬਣਿਆ ਮਿੰਨੀ ਬੱਸ ਅੱਡਾ ਹੁਣ ਬੱਸਾਂ ਲਈ ਚਾਲੂ ਨਹੀਂ ਹੋਵੇਗਾ ਸਗੋਂ ਇਹ ਜਗ੍ਹਾ ਹੋਰ ਮੰਤਵ ਲਈ ਵਰਤੀ ਜਾਵੇਗੀ । ਹੁਣ ਸਵਾਲ ਇਹ ਉਠਦਾ ਹੈ ਕਿ ਜੇਕਰ ਇਹ ਮਿੰਨੀ ਬੱਸ ਅੱਡਾ ਠੀਕ ਜਗ੍ਹਾ ‘ਤੇ ਨਹੀਂ ਬਣਿਆ ਤਾਂ ਕੀ ਇਸ ਦੀ ਉਸਾਰੀ ਸਬੰਧੀ ਨਕਸ਼ਾ ਬਣਾਉਣ ਵਾਲੇ ਅਤੇ ਯੋਜਨਾ ਬਣਾਉਣ ਵਾਲੇ ਅਫਸਰਾਂ ਅਤੇ ਹੋਰ ਜ਼ਿੰਮੇਵਾਰ ਲੋਕਾਂ ਦੇ ਖ਼ਿਲਾਫ਼ ਕਾਰਵਾਈ ਹੋਵੇਗੀ, ਜਿਨ੍ਹਾਂ ਨੇ ਲੋਕਾਂ ਦੇ ਟੈਕਸਾਂ ਦਾ ਪੈਸਾ ਗ਼ਲਤ ਜਗ੍ਹਾ ‘ਤੇ ਲਗਾਇਆ । ਜ਼ਿਕਰਯੋਗ ਹੈ ਕਿ ਮਿੰਨੀ ਬੱਸ ਅੱਡੇ ਦੀ ਉਸਾਰੀ ਵਿੱਚ ਭ੍ਰਿਸ਼ਟਾਚਾਰ ਦੀਆਂ ਚਰਚਾਵਾਂ ਅਕਸਰ ਹੁੰਦੀਆਂ ਰਹਿੰਦੀਆਂ ਹਨ। ਉਸਾਰੀ ਤੋਂ ਲੈ ਕੇ ਹੁਣ ਤੱਕ ਇਹ ਮਿੰਨੀ ਬੱਸ ਅੱਡਾ ਬੇਸਹਾਰਾ ਪਸ਼ੂਆਂ ਦੀ ਸੈਰ-ਗਾਹ ਬਣਿਆ ਹੋਇਆ ਹੈ । ਹੁਣ ਜਦੋਂ ਕਿ ਮੰਤਰੀ ਨੇ ਆਪ ਵੀ ਮੰਨਿਆ ਹੈ ਕਿ ਇਸ ਮਿੰਨੀ ਬੱਸ ਅੱਡੇ ਦੀ ਉਸਾਰੀ ਗਲਤ ਹੋਈ ਹੈ ਤਾਂ ਇਸਦੀ ਉਸਾਰੀ ਕਰਨ ਵਾਲੇ ਲੋਕਾਂ ਦੇ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਣੀ ਬਣਦੀ ਹੈ ਅਤੇ ਬੱਸ ਅੱਡੇ ਦੀ ਉਸਾਰੀ ‘ਚ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਦੀ ਪੜਤਾਲ ਵੀ ਹੋਣੀ ਚਾਹੀਦੀ ਹੈ ਪ੍ਰੰਤੂ ਇਹ ਪੜਤਾਲ ਸ਼ਾਇਦ ਨਾ ਹੋਵੇ ਕਿਉਂਕਿ ਸ਼ਹਿਰ ਨਾਲ ਸਬੰਧਤ ਕੈਬਨਿਟ ਮੰਤਰੀ ਮੀਤ ਹੇਅਰ ਨਗਰ ਸੁਧਾਰ ਟਰੱਸਟ ਅਤੇ ਨਗਰ ਕੌਂਸਲ ਵਿਚ ਹੋਏ ਘਪਲਿਆਂ ਦੀ ਜਾਂਚ ਕਰਕੇ ਭ੍ਰਿਸ਼ਟਾਚਾਰ ਦੇ ਦੋਸ਼ੀਆਂ ਨੂੰ ਸਜ਼ਾ ਦੇਣ ਸਬੰਧੀ ਸ਼ਹਿਰ ਦੇ ਲੋਕਾਂ ਨਾਲ ਕੀਤੇ ਵਾਅਦਿਆਂ ਤੋਂ ਫਿਲਹਾਲ ਅੱਖਾਂ ਫੇਰੀ ਬੈਠੇ ਹਨ, ਜਿਸ ਕਰਕੇ ਅਜਿਹਾ ਲੱਗ ਨਹੀਂ ਰਿਹਾ ਕਿ ਕੈਬਨਿਟ ਮੰਤਰੀ ਉਕਤ ਦੋਵੇਂ ਅਦਾਰਿਆਂ ਵਿੱਚ ਭ੍ਰਿਸ਼ਟਾਚਾਰ ਦੀਆਂ ਪਰਤਾਂ ਖੋਲ੍ਹਣ ਲਈ ਕੋਈ ਕਾਰਵਾਈ ਕਰਨਗੇ ।
ਸ਼ਹਿਰ ਦੇ ਵਿਕਾਸ ਕੰਮਾਂ ‘ਚ ਭ੍ਰਿਸ਼ਟਾਚਾਰ ਦੀ ਪੜਤਾਲ ਕਰਵਾਉਣ ਸਬੰਧੀ ਮੰਤਰੀ ਵੱਲੋਂ ਕੀਤੇ ਦਾਅਵਿਆਂ ਤੇ ਵਾਅਦਿਆਂ ਸਬੰਧੀ ਉਨ੍ਹਾਂ ਦੀ ਕੋਈ ਮਜਬੂਰੀ ਹੋ ਸਕਦੀ ਹੈ ਪ੍ਰੰਤੂ ਭਵਿੱਖ ਵਿੱਚ ਕਿਸੇ ਵੀ ਚੋਣਾਂ ਮੌਕੇ ਵੋਟਾਂ ਮੰਗਣ ਲਈ ਸ਼ਹਿਰੀਆਂ ਕੋਲ ਜਾਣ ਸਮੇਂ ਮੀਤ ਹੇਅਰ ਨੂੰ ਭ੍ਰਿਸ਼ਟਾਚਾਰ ਦੀਆਂ ਪੜਤਾਲਾਂ ਦੇ ਦਾਅਵਿਆਂ ਦੇ ਮਾਮਲੇ ਵਿੱਚ ਲੋਕਾਂ ਦੇ ਸਵਾਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ ਕਿਉਂਕਿ ਆਮ ਆਦਮੀ ਪਾਰਟੀ ਨੇ ਵਿਧਾਨ ਸਭਾ ਚੋਣਾਂ ਮੌਕੇ ਸੱਤਾ ਤੱਕ ਪੁੱਜਣ ਲਈ ਪਿਛਲੀਆਂ ਸਰਕਾਰਾਂ ਵੱਲੋਂ ਕੀਤੇ ਭ੍ਰਿਸ਼ਟਾਚਾਰ ਦੇ ਮੁੱਦੇ ਨੂੰ ਪੌੜੀ ਵਜੋਂ ਵਰਤਿਆ ਸੀ। ਇਸ ਲਈ ਸ਼ਹਿਰ ਦੇ ਲੋਕ ਇਹ ਉਮੀਦ ਕਰਦੇ ਹੀ ਰਹਿਣਗੇ ਕਿ ਮਿੰਨੀ ਬੱਸ ਅੱਡੇ ਦੀ ਉਸਾਰੀ ‘ਚ ਹੋਏ ਭ੍ਰਿਸ਼ਟਾਚਾਰ ਵੱਲ ਮੰਤਰੀ ਜੀ ਦੀ ਸਵੱਲੀ ਨਜ਼ਰ ਹੋਵੇਗੀ.. ਭਾਵੇਂ ਕਿ ਅੱਜ ਤੱਕ ਕਿਸੇ ਨੇ ਊਠ ਦਾ ਬੁੱਲ੍ਹ ਟੁੱਟ ਕੇ ਡਿੱਗਦਾ ਹੋਇਆ ਨਹੀਂ ਵੇਖਿਆ ਪਰੰਤੂ ਕਈ ਵਾਰ ਊਠ ਆਪਣੇ ਜਬਾੜੇ ਦੀ ਸਥਿਤੀ ਇਸ ਤਰ੍ਹਾਂ ਬਣਾ ਲੈਂਦਾ ਹੈ ਕਿ ਲੋਕਾਂ ਨੂੰ ਅਜਿਹਾ ਲੱਗਣ ਲੱਗਦਾ ਹੈ ਕਿ ਹੁਣ ਬੁੱਲ੍ਹ ਡਿੱਗ ਹੀ ਪਵੇਗਾ।
