ਬਰਨਾਲਾ,9 ਮਈ(ਨਿਰਮਲ ਸਿੰਘ ਪੰਡੋਰੀ)-ਲੋਕ ਸਭਾ ਜ਼ਿਮਨੀ ਚੋਣ ਵਿੱਚ ਬੇਰੁਜ਼ਗਾਰਾਂ ਦੇ ਵਿਰੋਧ ਤੋ ਡਰਦਿਆਂ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੇ ਬੇਰੁਜ਼ਗਾਰਾਂ ਨੂੰ 15 ਮਈ ਦੀ ਪੈਨਲ ਮੀਟਿੰਗ ਦੇ ਕੇ ਭਾਵੇਂ ਠੰਢੇ ਕੀਤਾ ਹੈ ਪ੍ਰੰਤੂ ਬੇਰੁਜ਼ਗਾਰ ਉਦੋਂ ਤੱਕ ਚੈਨ ਨਾਲ ਨਹੀਂ ਬੈਠਣਗੇ ਜਦੋਂ ਤੱਕ ਸਰਕਾਰ ਸਿੱਖਿਆ ਅਤੇ ਸਿਹਤ ਵਿਭਾਗ ਸਮੇਤ ਸਾਰੇ ਵਿਭਾਗਾਂ ਅੰਦਰ ਉਮਰ ਹੱਦ ਦੇ ਕੇ ਭਰਤੀਆਂ ਕਰਨ ਦਾ ਐਲਾਨ ਨਹੀਂ ਕਰਦੀ। ਉਕਤ ਜਾਣਕਾਰੀ ਬੇਰੁਜ਼ਗਾਰ ਓਵਰ ਏਜ਼ ਯੂਨੀਅਨ ਦੀ ਇਕੱਤਰਤਾ ਮਗਰੋ ਯੂਨੀਅਨ ਆਗੂ ਸੁਖਵਿੰਦਰ ਸਿੰਘ ਢਿੱਲਵਾਂ ਨੇ ਦਿੱਤੀ। ਉਹਨਾਂ ਕਿਹਾ ਕਿ ਵੱਡੀ ਗਿਣਤੀ ਵਿੱਚ ਮਾਸਟਰ ਕੇਡਰ,ਮਲਟੀਪਰਪਜ਼ ਹੈਲਥ ਵਰਕਰ, ਡੀ ਪੀ ਈ,ਪੀ ਟੀ ਆਈ, ਆਰਟ ਐਂਡ ਕਰਾਫਟ , ਈਟੀਟੀ ਅਤੇ ਉਪ ਵੈਦ ਦੀ ਭਰਤੀ ਸਬੰਧੀ ਆਮ ਆਦਮੀ ਪਾਰਟੀ ਨੇ ‘ ਆਪ ‘ ਦੀ ਸਰਕਾਰ ਬਣਨ ਉੱਤੇ ਉਕਤ ਮੰਗਾਂ ਦੀ ਪੂਰਤੀ ਦਾ ਭਰੋਸਾ ਦਿੱਤਾ ਸੀ ਪ੍ਰੰਤੂ ਇਕ ਸਾਲ ਤੋ ਵੱਧ ਸਮਾਂ ਲੰਘਣ ਦੇ ਬਾਵਜੂਦ ਵੀ ਸਰਕਾਰ ਨੇ ਮਾਸਟਰ ਕੇਡਰ ਭਰਤੀ ਲਈ ਉਮਰ ਹੱਦ ਛੋਟ ਸਮੇਤ ਮਾਸਟਰ ਕੇਡਰ ਵਿੱਚੋ 55 ਪ੍ਰਤੀਸ਼ਤ ਦੀ ਬੇਤੁਕੀ ਸ਼ਰਤ ਹਟਾਉਣ,ਸਾਰੇ ਵਿਸ਼ਿਆਂ ਦੀਆਂ ਪੋਸਟਾਂ ਭਰਨ,ਦੂਜੇ ਰਾਜਾਂ ਦੇ ਕੋਟੇ ਸੀਮਤ ਕਰਨ,ਸਾਰੇ ਵਿਸ਼ਿਆਂ ਖਾਸ ਕਰਕੇ ਪੰਜਾਬੀ , ਹਿੰਦੀ ਅਤੇ ਸਮਾਜਿਕ ਸਿੱਖਿਆ ਦੀਆਂ ਅਸਾਮੀਆਂ ਭਰਨ ਸਬੰਧੀ ਅਮਲੀ ਰੂਪ ਵਿਚ ਕੁਝ ਨਹੀਂ ਕੀਤਾ।ਇਸ ਲਈ ਜਲੰਧਰ ਦੀ ਜ਼ਿਮਨੀ ਚੋਣ ਵਿੱਚ ਬੇਰੁਜ਼ਗਾਰਾਂ ਦੇ ਵਿਰੋਧ ਨੂੰ ਰੋਕਣ ਲਈ ਉਚੇਰੀ ਸਿੱਖਿਆ ਮੰਤਰੀ ਗੁਰਮੀਤ ਸਿੰਘ ਮੀਤ ਹੇਅਰ ਨੇ 7 ਮਈ ਨੂੰ ਫਗਵਾੜਾ ਵਿਖੇ ਬੇਰੁਜ਼ਗਾਰਾਂ ਨਾਲ ਮੀਟਿੰਗ ਕਰਕੇ 15 ਨੂੰ ਚੰਡੀਗੜ੍ਹ ਵਿਖੇ ਮੁੱਖ ਮੰਤਰੀ ਸ੍ਰ ਭਗਵੰਤ ਮਾਨ ਨਾਲ ਪੰਜਾਬ ਭਵਨ ਵਿਖੇ ਪੈਨਲ ਮੀਟਿੰਗ ਕਰਵਾਉਣ ਦਾ ਵਾਅਦਾ ਕੀਤਾ ਸੀ। ਉਹਨਾਂ ਕਿਹਾ ਕਿ ਸਰਕਾਰ ਨੇ 15 ਮਈ ਦੀ ਮੀਟਿੰਗ ਦੀ ਸੂਚਨਾ ਯੂਨੀਅਨ ਨੂੰ ਭੇਜ ਦਿੱਤੀ ਹੈ, ਜੇਕਰ ਸਰਕਾਰ ਮੀਟਿੰਗ ਤੋ ਭੱਜੀ ਜਾਂ ਫੇਰ ਮੀਟਿੰਗ ਵਿੱਚ ਮੰਗਾਂ ਨੂੰ ਪ੍ਰਵਾਨ ਨਾ ਕੀਤਾ ਗਿਆ ਤਾਂ ਮੁੜ ਮੁੱਖ ਮੰਤਰੀ ਦੀ ਕੋਠੀ ਅੱਗੇ ਸੰਗਰੂਰ ਵਿਖੇ ਮੋਰਚਾ ਲਗਾਇਆ ਜਾਵੇਗਾ।ਇਸ ਮੌਕੇ ਕਰਮਜੀਤ ਸਿੰਘ ਜਗਜੀਤਪੁਰਾ,ਗੁਰਦੀਪ ਰਾਮਗੜ੍ਹ,ਸੁਖਪਾਲ ਹੰਢਿਆਇਆ, ਕਸ਼ਮੀਰ ਸਿੰਘ,ਕਰਮਜੀਤ ਕੌਰ ਆਦਿ ਹਾਜ਼ਰ ਸਨ।
Menu
