- ਚੌਹਾਨ ਦੀ ਅਨੁਵਾਦਿਤ ਪੁਸਤਕ “ਡਾ ਭੀਮਰਾਓ ਅੰਬੇਦਕਰ ਜੀਵਨ ਤੇ ਕਾਰਜ” ਰਿਲੀਜ਼
ਬਰਨਾਲਾ, 29 ਦਸੰਬਰ ( ਨਿਰਮਲ ਸਿੰਘ ਪੰਡੋਰੀ)-ਸਾਹਿਤ ਸਰਵਰ ਬਰਨਾਲਾ ਵੱਲੋਂ ਪੰਜਾਬੀ ਦੇ ਬਹੁਪੱਖੀ ਲੇਖਕ ਅਤੇ ਭਾਰਤੀ ਸਾਹਿਤ ਅਕੈਡਮੀ ਦਿੱਲੀ ਦੇ ਮੈਂਬਰ ਬੂਟਾ ਸਿੰਘ ਚੌਹਾਨ ਦੀ ਅਨੁਵਾਦਿਤ ਪੁਸਤਕ ‘ਡਾ ਭੀਮਰਾਓ ਅੰਬੇਦਕਰ ਜੀਵਨ ਤੇ ਕਾਰਜ ‘ਦਾ ਰਿਲੀਜ਼ ਸਮਾਗਮ ਜ਼ਿਲ੍ਹਾ ਰੈੱਡ ਕਰਾਸ ਦੇ ਮੀਟਿੰਗ ਹਾਲ ਵਿਚ ਕੀਤਾ ਗਿਆ । ਪੁਸਤਕ ਰਿਲੀਜ਼ ਕਰਨ ਦੀ ਰਸਮ ਐਸਡੀਐਮ ਅਤੇ ਪੰਜਾਬੀ ਕਵੀ ਗੋਪਾਲ ਸਿੰਘ ਕੋਟਫੱਤਾ ਨੇ ਅਦਾ ਕੀਤੀ । ਉਨ੍ਹਾਂ ਦਾ ਸਾਥ ਸਾਹਿਤ ਸਰਵਰ ਦੇ ਪ੍ਰਧਾਨ ਬਲਵਿੰਦਰ ਸਿੰਘ ਠੀਕਰੀਵਾਲਾ, ਜ਼ਿਲ੍ਹਾ ਰੈੱਡ ਕਰਾਸ ਅਫ਼ਸਰ ਸਰਵਣ ਸਿੰਘ ਕਾਲਾਬੂਲਾ ਅਤੇ ਹਰਵਿੰਦਰ ਕੌਰ ਧਿੰਗੜ ਨੇ ਵੀ ਦਿੱਤਾ। ਪੁਸਤਕ ਰਿਲੀਜ਼ ਕਰਨ ਉਪਰੰਤ SDM ਗੋਪਾਲ ਸਿੰਘ ਨੇ ਕਿਹਾ ਕਿ ਬੂਟਾ ਸਿੰਘ ਚੌਹਾਨ ਨੇ ਪੰਜਾਬੀ ਵਿਚ ਇਹ ਵੱਡਆਕਾਰੀ ਪੁਸਤਕ ਦਾ ਅਨੁਵਾਦ ਕਰਕੇ ਇਤਿਹਾਸਕ ਕਾਰਜ ਕੀਤਾ ਹੈ,ਜਿਸ ਨੂੰ ਹੇਠਲੇ ਪੱਧਰ ਤੱਕ ਸਤਿਕਾਰਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਕਾਰਜ ਹਰ ਉਮਰ ਦੇ ਪਾਠਕਾਂ ਅਤੇ ਖ਼ਾਸ ਕਰਕੇ ਨੌਜਵਾਨਾਂ ਲਈ ਰਾਹ ਦਸੇਰਾ ਸਾਬਿਤ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਡਾ ਭੀਮਰਾਓ ਅੰਬੇਦਕਰ ਮਹਾਰਾਸ਼ਟਰ ਦੇ ਜੰਮਪਲ ਸਨ ਅਤੇ ਪੁਸਤਕ ਦਾ ਲੇਖਕ ਪ੍ਰਸਿੱਧ ਨਾਵਲਕਾਰ ਲਕਸ਼ਮਣ ਗਾਇਕਵਾੜ ਵੀ ਮਹਾਰਾਸ਼ਟਰ ਦੇ ਰਹਿਣ ਵਾਲੇ ਹਨ। ਇਸ ਲਈ ਇਸ ਪੁਸਤਕ ਵਿਚ ਡਾ. ਅੰਬੇਦਕਰ ਬਾਰੇ ਉਹ ਜਾਣਕਾਰੀਆਂ ਤੋਂ ਪੰਜਾਬੀ ਪਾਠਕ ਜਾਣੂ ਹੋਣਗੇ, ਜਿਨ੍ਹਾਂ ਤੋਂ ਪਹਿਲਾਂ ਜਾਣੂ ਨਹੀਂ ਸਨ। ਇਸ ਮੌਕੇ ਪੁਸਤਕ ਦੇ ਅਨੁਵਾਦਕ ਬੂਟਾ ਸਿੰਘ ਚੌਹਾਨ ਨੇ ਕਿਹਾ ਕਿ ਇਹ ਪੁਸਤਕ ਉਨ੍ਹਾਂ ਨੇ ਇਸ ਲਈ ਅਨੁਵਾਦ ਕੀਤੀ ਹੈ ਤਾਂ ਕਿ ਨੌਜਵਾਨ ਵਰਗ ਨੂੰ ਘਰ ਦੀ ਘੋਰ ਗ਼ਰੀਬੀ ਨਾਲ ਟਾਕਰਾ ਕਰਕੇ ਆਪਣੀ ਜ਼ਿੰਦਗੀ ਦਾ ਮੂੰਹ ਮੱਥਾ ਸੰਵਾਰਨ ਦੀ ਪ੍ਰੇਰਨਾ ਮਿਲ ਸਕੇ ਕਿਉਂਕਿ ਡਾ. ਅੰਬੇਦਕਰ ਨੇ ਬਚਪਨ ਵਿਚ ਅਜਿਹੀਆਂ ਕਰੂਰ ਸਥਿਤੀਆਂ ਦਾ ਸਾਹਮਣਾ ਕਰਕੇ ਦੇਸ ਦੇ ਸ਼ੋਸ਼ਿਤ ਵਰਗ ਦੀ ਭਲਾਈ ਬਾਰੇ ਸੋਚਿਆ, ਜਿਨ੍ਹਾਂ ਸਥਿਤੀਆਂ ਵਿਚ ਜਿਉਣਾ ਵੀ ਮੁਸ਼ਕਿਲ ਸੀ। ਇਹ ਪੁਸਤਕ ਆਪਾ ਸੰਵਾਰਨ, ਨਿਮਾਣਿਆਂ ਦਾ ਦਰਦ ਮਹਿਸੂਸ ਕਰਨ ਅਤੇ ਨਰੋਆ ਸਮਾਜ ਸਿਰਜਣ, ਜਾਤੀ ਭੇਦ – ਭਾਵ ਨਸ਼ਟ ਕਰਨ ਅਤੇ ਬਰਾਬਰਤਾ ਦੀ ਜੋਤ ਜਗਾਉਣ ਦੀ ਪ੍ਰੇਰਨਾ ਦੇਣ ਵਾਲਾ ਸੋਮਾ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਜਾਤੀ ਵਿਤਕਰੇ ਵਿਰੁੱਧ ਆਵਾਜ਼ ਉਠਾਉਂਦੇ ਸ਼ਰਣ ਕੁਮਾਰ ਲਿੰਬਾਲੇ ਦਾ ਨਾਵਲ ‘ਭੀੜ’ ਅਤੇ ‘ ਫ਼ਖ਼ਰ ਨਾਲ ਕਹੋ’ ਦਾ ਪੰਜਾਬੀ ਵਿਚ ਅਨੁਵਾਦ ਕੀਤਾ ਹੈ । ਭੀੜ ਨਾਵਲ ਛਪ ਚੁਕਿਆ ਹੈ। ‘ਫ਼ਖ਼ਰ ਨਾਲ ਕਹੋ ‘ ਇਸੇ ਮਹੀਨੇ ਛਪ ਰਿਹਾ ਹੈ ਅਤੇ ਇਸ ਸਾਲ ਜਾਤੀ ਵਿਤਕਰਿਆਂ ‘ਤੇ ਸੱਟ ਮਾਰਦੇ ਹੋਰ ਮਰਾਠੀ ਨਾਵਲ ਵੀ ਅਨੁਵਾਦ ਕਰਨਗੇ । ਇਸ ਮੌਕੇ ਸਰਵਣ ਸਿੰਘ ਕਾਲਾਬੂਲਾ, ਪੰਜਾਬੀ ਕਵੀ ਤੇ ਚਿੰਤਕ ਸਾਗਰ ਸਿੰਘ ਸਾਗਰ,ਬਲਵਿੰਦਰ ਸਿੰਘ ਠੀਕਰੀਵਾਲਾ ਅਤੇ ਵਾਰਤਿਕ ਲੇਖਕ ਲਛਮਣ ਸਿੰਘ ਸਹੋਤਾ ਨੇ ਵੀ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਬੂਟਾ ਸਿੰਘ ਚੌਹਾਨ ਦੇ ਇਸ ਕਾਰਜ ਦੀ ਸ਼ਲਾਘਾ ਕੀਤੀ । ਇਸ ਮੌਕੇ ਤੇਜਾ ਸਿੰਘ ਤਿਲਕ ਪ੍ਰਧਾਨ ਪੰਜਾਬੀ ਸਾਹਿਤ ਸਭਾ ਬਰਨਾਲਾ, ਸੰਪੂਰਨ ਸਿੰਘ ਟੱਲੇਵਾਲੀਆ ਪ੍ਰਧਾਨ ਮਾਲਵਾ ਸਾਹਿਤ ਸਭਾ ਬਰਨਾਲਾ,ਜ਼ਿਲ੍ਹਾ ਖ਼ਜ਼ਾਨਾ ਅਫ਼ਸਰ ਬਲਵੰਤ ਸਿੰਘ ਭੁੱਲਰ, ਪੰਜਾਬੀ ਕਵੀ ਰਾਮ ਸਰੂਪ ਸ਼ਰਮਾ, ਸੁਖਵਿੰਦਰ ਸਿੰਘ ਦਰਾਕਾ, ਰਾਜਿੰਦਰ ਸ਼ੌਂਕੀ, ਬੋਲੀਕਾਰ ਰਘਬੀਰ ਸਿੰਘ ਗਿੱਲ ਕੱਟੂ, ਮਾਸਟਰ ਬਲਜੀਤ ਸਿੰਘ ਗਿੱਲ ਤੋਂ ਇਲਾਵਾ ਹੋਰ ਸਾਹਿਤ ਪ੍ਰੇਮੀ ਵੀ ਹਾਜ਼ਰ ਸਨ ।
ਕੈਪਸ਼ਨ – ਬੂਟਾ ਸਿੰਘ ਚੌਹਾਨ ਦੀ ਡਾ ਭੀਮ ਰਾਓ ਅੰਬੇਦਕਰ ਜੀਵਨ ਤੇ ਕਾਰਜ’ ਅਨੁਵਾਦਿਤ ਪੁਸਤਕ ਰਿਲੀਜ਼ ਕਰਦੇ ਹੋਏ SDM ਗੋਪਾਲ ਸਿੰਘ, ਨਾਲ ਹਨ ਬਲਵਿੰਦਰ ਸਿੰਘ ਠੀਕਰੀਵਾਲਾ ਅਤੇ ਸਰਵਣ ਸਿੰਘ ਕਾਲਾਬੂਲਾ।
Menu
