- ਨਿਰਮਲ ਸਿੰਘ ਪੰਡੋਰੀ,14 ਫਰਵਰੀ
-ਦੁਨੀਆਂ ਦੇ ਸਭ ਤੋਂ ਵੱਡੇ ਲੋਕਤੰਤਰ ਦਾ ਲੋਕ ਮੇਲਾ (ਚੋਣ ਮੇਲਾ) ਨੇੜੇ ਆ ਰਿਹੈ ਪਰ ਮੇਲੇ ਤੋਂ ਪਹਿਲਾਂ ਹੀ “ਭੈਣ ਜੀ ਨੇ ਬੀਰ” ਦੀ ਉਂਗਲ ਛੱਡ ਦਿੱਤੀ…ਹੁਣ ਕੀ ਬੀਰ ਜੀ ਇਸ ਚੋਣ ਮੇਲੇ ਵਿੱਚ ਰੁਲ ਜਾਣਗੇ..ਇਹ ਤਾਂ ਬੀਰ ਜੀ ਨਾਲ ਮੇਲਾ ਦੇਖਣ ਵਾਲਿਆਂ ਦੀ ਭੀੜ ਦੱਸੇਗੀ ਕਿ ਬੀਰ ਜੀ ਮੇਲੇ ਵਿੱਚ ਕਿੱਥੇ ਕੁ ਖੜਦੇ ਨੇ ਪਰ ਉਧਰੋਂ ਬਾਪੂ ਜੀ ਦੇ ਪੁਰਾਣੇ ਮਿੱਤਰਾਂ ਨੇ ਹਾਕ ਮਾਰੀ… ਰੁੱਤ ਮਿਲਾਪ ਦੀ ਆਈ, ਛੱਡ ਸੱਜਣਾਂ ਰਸਵਾਈਆਂ… ਤੇ ਇਹ ਹਾਕ ਜਦੋਂ ਭੈਣ ਜੀ ਨੇ ਸੁਣੀ ਤਾਂ ਹਾਥੀ ਨੇ ਸੁੰਡ ‘ਚ ਫਸਾ ਕੇ ਰੱਖੀ ਤੱਕੜੀ ਸੁੱਟ ਦਿੱਤੀ….ਲਾਈ ਬੇਕਦਰਾਂ ਨਾਲ ਯਾਰੀ ਟੁੱਟ ਗਈ ਤੜੱਕ ਕਰਕੇ…. ਇਹ ਚੋਣ ਮੇਲਾ ਹੈ ਤੇ ਮੇਲੇ ਵਿੱਚ ਕੌਣ ਪੁੱਛਦੈ ਕਿ ਧੰਨੇ ਦਾ ਬਾਪੂ ਕੌਣ… ਅਗਲੇ ਨੂੰ ਆਪਣੇ ਨਜ਼ਾਰਿਆਂ ਨਾਲ ਮਤਲਬ… ਹਾਕ ਮਾਰਨ ਵਾਲੇ ਬਾਪੂ ਦੇ ਮਿੱਤਰਾਂ ਨੇ ਉਂਗਲ ਅਜੇ ਫੜੀ ਨਹੀਂ ਕਿ ਭੈਣ ਜੀ ਨੇ ਛੱਡ ਦਿੱਤੀ… ਇਹ ਵੋਟ ਅਲਜਬਰਾ ਸਮਝਣ ਵਾਲੇ ਸਮਝ ਜਾਣਗੇ…ਕਹਿਣ ਵਾਲੇ ਤਾਂ ਇਹ ਵੀ ਕਹੀ ਜਾਂਦੇ ਨੇ ਕਿ ਬਾਦਲ ਪਿੰਡ ਤੋਂ ਫੁਲਕਾਰੀ ਹਿੱਲ ਗਈ ਪਰ ਦਿੱਲੀ ਤੋਂ ਰੁਮਾਲ ਨਹੀਂ ਹਿੱਲਿਆ… ਪਹਿਲਾਂ ਬਾਪੂ ਨੇ ਤਾਂ ਕਿਹਾ ਸੀ ਕਿ ਯਾਰੀ ਜੱਟ ਦੀ ਤੂਤ ਦਾ ਮੋਛਾ ਕਦੇ ਨਾ ਵਿਚਾਲਿਓ ਟੁੱਟਦੀ…ਤੇ ਫਿਰ ਬਾਪੂ ਦੇ ਹੁੰਦੇ ਹੀ ਟੁੱਟ ਗਈ ਸੀ…ਸਾਗਰਾਂ ਦੇ ਪਾਣੀ ਜਿੰਨਾ ਪਿਆਰ ਸੀ… ਬੱਸ ਫਿਰ ! ਤੇਰੀ ਮੇਰੀ ਇਉਂ ਟੁੱਟਗੀ ਜਿਵੇਂ ਟੁੱਟਦੇ ਅੰਬਰ ਤੋਂ ਤਾਰੇ..ਓਧਰ ਹੁਣ ਸ਼ੰਭੂ ਬਾਰਡਰ ਵਾਲੇ ਰੌਲੇ ਰੱਪੇ ਤੋਂ ਬਾਅਦ ਲੋਕ ਇਹ ਵੀ ਸੋਚੀ ਜਾਂਦੇ ਨੇ ਕਿ ਫੁਲਕਾਰੀ ਦੇ ਹੁਲਾਰੇ ਢਿੱਲੇ ਪੈ ਜਾਣਗੇ… ਫੇਰ ਤਾਂ ਕਾਕਾ ਜੀ ਮੇਲੇ ਵਿੱਚ ਰੁਲ ਵੀ ਸਕਦੇ ਨੇ, ਅਜੇ ਬਾਪੂ ਦੇ ਪੁਰਾਣੇ ਮਿੱਤਰਾਂ ਦੇ ਆਸਰੇ ਚੰਡੋਲ ‘ਤੇ ਇੱਕ ਦੋ ਝੂਟੇ ਮਿਲ ਵੀ ਸਕਦੇ ਨੇ… ਸਮੇਂ ਦੀ ਬੁੱਕਲ ਬੜੀ ਘੁੱਟੀ ਹੁੰਦੀ ਹੈ…ਕਿਸੇ ਦੀ ਕੀ ਮਜਾਲ.. ਕੋਈ ਸਮੇਂ ਦੀ ਬੁੱਕਲ ਖੋਲ੍ਹ ਦੇਵੇ, ਪਰ ਦੱਸਣ ਵਾਲੇ ਦੱਸਦੇ ਨੇ ਕਿ ਸ਼ੰਭੂ ਬਾਰਡਰ ਦੇ ਰੌਲੇ ਰੱਪੇ ਨੇ ਕਾਕਾ ਜੀ ਦੇ ਮੱਥੇ ਦੀਆਂ ਤਿਊੜੀਆਂ ਦੇ ਵਲ ਡੂੰਘੇ ਕਰ ਦਿੱਤੇ ਨੇ… ਬਾਪੂ ਦੇ ਪੁਰਾਣੇ ਮਿੱਤਰਾਂ ਦੇ ਹੇਜ਼ ਨੇ ਭੈਣ ਜੀ ਤੋਂ ਵੀ ਉਂਗਲ ਛੁਡਵਾ ਦਿੱਤੀ…ਆਜੋ ਵੇਖਦੇ ਆ ਚੋਣ ਮੇਲਾ…ਭੈਣ ਜੀ ਦੇ ਉਂਗਲ ਛੱਡਣ ਤੋਂ ਬਾਅਦ ਬਾਪੂ ਦੇ ਪੁਰਾਣੇ ਮਿੱਤਰਾਂ ਨਾਲ ਕਿੰਨੇ ਕੁ ਨਜ਼ਾਰੇ ਆਉਂਦੇ ਨੇ….!
error: Content is protected !!
