ਬਰਨਾਲਾ,14 ਜੁਲਾਈ (ਨਿਰਮਲ ਸਿੰਘ ਪੰਡੋਰੀ)-
-ਵਿਧਾਨ ਸਭਾ ਹਲਕਾ ਜਲੰਧਰ ਵੈਸਟ ਵਿੱਚ ਆਮ ਆਦਮੀ ਪਾਰਟੀ ਦੀ ਸ਼ਾਨਦਾਰ ਜਿੱਤ ਤੋਂ ਬਾਅਦ ਬਰਨਾਲਾ ਜ਼ਿਮਨੀ ਚੋਣ ਦੀਆਂ ਸਰਗਰਮੀਆਂ ਸਮੇਂ ਤੋਂ ਪਹਿਲਾਂ ਸ਼ੁਰੂ ਹੋਣ ਦੇ ਆਸਾਰ ਬਣ ਗਏ ਹਨ। ਜਲੰਧਰ ਦੀ ਜਿੱਤ ਤੋਂ ਉਤਸ਼ਾਹਿਤ ਬਰਨਾਲਾ ਟਿਕਟ ਲਈ ਚਾਹਾਵਾਨ ਹੁਣ ਖੰਭ ਖਿਲਾਰ ਕੇ ਉਡਾਰੀਆਂ ਭਰਨਗੇ। ਚਰਚਾ ਅਨੁਸਾਰ ਸੱਤਾਧਾਰੀ ਪਾਰਟੀ ਦੀ ਟਿਕਟ ਲਈ ਇਸ ਵਾਰ ਕੁਝ ਜ਼ਿਆਦਾ ਨਾਮ ਸਾਹਮਣੇ ਆ ਰਹੇ ਹਨ, ਜਿਨਾਂ ਵਿੱਚ ਆਪ ਦੇ ਜ਼ਿਲ੍ਹਾ ਪ੍ਰਧਾਨ ਅਤੇ ਯੋਜਨਾ ਕਮੇਟੀ ਦੇ ਚੇਅਰਮੈਨ ਗੁਰਦੀਪ ਸਿੰਘ ਬਾਠ, ਐਮਪੀ ਮੀਤ ਹੇਅਰ ਦੇ ਖਾਸਮਖਾਸ ਹਸਨ ਭਾਰਦਵਾਜ, ਹਰਿੰਦਰ ਸਿੰਘ ਦੇ ਨਾਮ ਪ੍ਰਮੁੱਖ ਹਨ। ਇਸ ਤੋਂ ਇਲਾਵਾ ਸਾਬਕਾ ਵਿਧਾਇਕ ਦਲਵੀਰ ਸਿੰਘ ਗੋਲਡੀ ਦੇ ਨਾਮ ਦੀ ਚਰਚਾ ਵੀ ਚਲਦੀ ਰਹਿੰਦੀ ਹੈ। ਦੂਜੇ ਪਾਸੇ ਬਰਨਾਲਾ ਜ਼ਿਮਨੀ ਚੋਣ ਲਈ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਬੁੱਕਲ ਦੇ ਬੰਦੇ ਬਲਤੇਜ ਸਿੰਘ ਪੰਨੂ ਦੇ ਨਾਮ ਦੀ ਚਰਚਾ ਨੇ ਉਕਤ ਚਾਹਵਾਨਾਂ ਦੀਆਂ ਦਾਅਵੇਦਾਰੀਆਂ ਨੂੰ ਨੱਪਿਆ ਹੋਇਆ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਜੇਕਰ ਬਲਤੇਜ ਪੰਨੂੰ ਬਰਨਾਲਾ ਤੋਂ ਜ਼ਿਮਨੀ ਚੋਣ ਲੜਨਾ ਚਾਹੁਣਗੇ ਤਾਂ ਮੁੱਖ ਮੰਤਰੀ ਭਗਵੰਤ ਮਾਨ ਕਿਸੇ ਹੋਰ ਬਦਲ ‘ਤੇ ਸ਼ਾਇਦ ਹੀ ਵਿਚਾਰ ਕਰਨਗੇ। ਜਲੰਧਰ ਦੀ ਜ਼ਿਮਨੀ ਚੋਣ ਦੇ ਨਤੀਜੇ ਤੋਂ ਬਾਅਦ ਪਾਰਟੀ ਵਿੱਚ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਪਕੜ ਅਤੇ ਕੱਦ ਹੋਰ ਵੀ ਉੱਚਾ ਹੋਇਆ ਹੈ। ਭਾਵੇਂ ਕਿ ਭਗਵੰਤ ਮਾਨ ਪਹਿਲਾਂ ਹੀ ਆਪ ਦੇ ਸੂਬਾ ਪ੍ਰਧਾਨ ਅਤੇ ਮੁੱਖ ਮੰਤਰੀ ਹੋਣ ਦੇ ਨਾਤੇ ਪਾਵਰਫੁੱਲ ਹਨ ਪ੍ਰੰਤੂ ਜਲੰਧਰ ਦੀ ਬੰਪਰ ਜਿੱਤ ਨੇ ਭਗਵੰਤ ਮਾਨ ਦੇ ਮਜ਼ਬੂਤ ਸਿਆਸੀ ਇਰਾਦਿਆਂ ਦਾ ਪ੍ਰਗਟਾਵਾ ਕੀਤਾ ਹੈ। ਚਰਚਾ ਇਹ ਵੀ ਹੈ ਕਿ ਸਿਆਸੀ ਹਾਲਾਤਾਂ ਦੇ ਮੱਦੇਨਜ਼ਰ ਮੀਤ ਹੇਅਰ ਦੀ ਬਰਨਾਲਾ ਦੀ ਟਿਕਟ ਆਪਣੀ ਬੁੱਕਲ ਵਿੱਚ ਹੀ ਰੱਖਣਾ ਚਾਹੁਣਗੇ। ਬਰਨਾਲਾ ਤੋਂ ਇੱਕ ਸੀਨੀਅਰ ਆਪ ਆਗੂ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਟਿੱਪਣੀ ਕੀਤੀ ਕਿ ਮੀਤ ਹੇਅਰ ਇਹ ਕਦੇ ਵੀ ਨਹੀਂ ਚਾਹੁਣਗੇ ਕਿ ਬਰਨਾਲਾ ‘ਚ ਉਹਨਾਂ ਦੇ ਬਰਾਬਰ ਦਾ ਸੱਤਾ ਕੇਂਦਰ ਖੜਾ ਹੋਵੇ ਕਿਉਂਕਿ ਬਰਨਾਲਾ ਜ਼ਿਮਨੀ ਚੋਣ ਵਿੱਚ ਜੇਕਰ ਮੀਤ ਹੇਅਰ ਦੇ ਬੁੱਕਲ ਦੇ ਕਿਸੇ ਉਮੀਦਵਾਰ ਦੀ ਜਿੱਤ/ਹਾਰ ਹੁੰਦੀ ਤਾਂ ਮੀਤ ਹੇਅਰ ਦੀ ਜ਼ਿਲ੍ਹੇ ‘ਚ ਸਿਆਸੀ ਸਰਦਾਰੀ ਨੂੰ ਕੋਈ ਬਹੁਤਾ ਫਰਕ ਨਹੀਂ ਪਵੇਗਾ ਪਰੰਤੂ ਦੂਜੇ ਪਾਸੇ ਜੇਕਰ ਕਿਸੇ ਬਰਾਬਰ ਦੇ ਸ਼ਰੀਕ ਨੇ ਬਰਨਾਲੇ ਸਿਆਸੀ ਮਕਾਨ ਬਣਾ ਲਿਆ ਤਾਂ ਇਸ ਨਾਲ ਮੀਤ ਹੇਅਰ ਦੇ ਸਿਆਸੀ ਕਿਲੇ ਦੀ ਚਮਕ ‘ਤੇ ਅਸਰ ਪੈਣਾ ਸੁਭਾਵਿਕ ਹੀ ਹੈ। ਅਜਿਹਾ ਇਸ ਕਰਕੇ ਵੀ ਮੰਨਿਆ ਜਾਂਦਾ ਹੈ ਕਿ ਪਿਛਲੇ ਕੁਝ ਸਮੇਂ ਤੋਂ ਰਵਾਇਤੀ ਪਾਰਟੀਆਂ ਵਾਂਗ ਆਮ ਆਦਮੀ ਪਾਰਟੀ ਵਿੱਚ ਵੀ ਈਰਖਾਵਾਦੀ ਅਤੇ ਧੜੇਬੰਦੀ ਦੀ ਸਿਆਸਤ ਦਾ ਦਾਖਲਾ ਹੋ ਚੁੱਕਿਆ ਹੈ। ਬਰਨਾਲਾ ਜਿਮਨੀ ਚੋਣ ਦੀ ਟਿਕਟ ਦਾ ਫੈਸਲਾ ਮੀਤ ਹੇਅਰ ਲਈ ਮੈਂਬਰ ਪਾਰਲੀਮੈਂਟ ਬਣਨ ਤੋਂ ਬਾਅਦ ਪਹਿਲੀ ਸਿਆਸੀ ਪ੍ਰੀਖਿਆ ਮੰਨਿਆ ਜਾ ਰਿਹਾ ਹੈ। ਬਹਰਹਾਲ ! ਬਰਨਾਲਾ ਜ਼ਿਮਨੀ ਚੋਣ ਦਾ ਐਲਾਨ ਚੋਣ ਕਮਿਸ਼ਨ ਭਾਵੇਂ ਜਦੋਂ ਮਰਜ਼ੀ ਕਰੇ ਪ੍ਰੰਤੂ ਬਰਨਾਲਾ ਤੋਂ ਸੱਤਾਧਾਰੀ ਪਾਰਟੀ ਦੀ ਟਿਕਟ ਲੈਣ ਲਈ ਸ਼ੁਰੂ ਹੋਣ ਵਾਲੀਆਂ ਸਰਗਰਮੀਆਂ ‘ਤੇ ਨਜ਼ਰ ਬਣੀ ਰਹੇਗੀ ਅਤੇ ਇਹ ਸਥਿਤੀ ਰਾਜਨੀਤੀ ‘ਚ ਰੁਚੀ ਰੱਖਣ ਵਾਲਿਆਂ ਲਈ ਦਿਲਚਸਪ ਵੀ ਹੋਵੇਗੀ।
Menu
