ਬਰਨਾਲਾ,20 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ)-
-ਪੰਜਾਬ ਦੇ ਮਾਨਯੋਗ ਗਵਰਨਰ ਨੇ ਨਗਰ ਕੌਂਸਲ ਬਰਨਾਲਾ ਨੂੰ ਨਗਰ ਨਿਗਮ ਬਣਾਉਣ ਦੇ ਐਲਾਨ ‘ਤੇ ਪੱਕੀ ਮੋਹਰ ਲਗਾ ਦਿੱਤੀ ਹੈ। ਹੁਣ ਨਗਰ ਨਿਗਮ ਨਾਲ ਸੰਬੰਧਿਤ ਅਗਲੀਆਂ ਕਾਰਵਾਈਆਂ ਸ਼ੁਰੂ ਹੋ ਜਾਣਗੀਆਂ, ਜਿਸ ਤਹਿਤ ਕਾਰਜ ਸਾਧਕ ਅਫਸਰ (EO) ਸਮੇਤ ਹੋਰ ਪੋਸਟਾਂ ਦੀ ਛੁੱਟੀ ਹੋ ਜਾਵੇਗੀ ਅਤੇ ਨਵੀਆਂ ਪੋਸਟਾਂ ਤਹਿਤ ਨਵੇਂ ਅਧਿਕਾਰੀ ਆਉਣਗੇ, ਹੁਣ ਈਓ ਦੀ ਜਗ੍ਹਾ ਕਮਿਸ਼ਨਰ ਦੀ ਕੁਰਸੀ ਲੱਗੇਗੀ ਅਤੇ ਪ੍ਰਧਾਨ ਦੀ ਜਗ੍ਹਾ ਮੇਅਰ ਬੈਠੇਗਾ। ਨਗਰ ਕੌਂਸਲ ਤੋਂ ਨਗਰ ਨਿਗਮ ਬਨਣ ਤੋਂ ਬਾਅਦ ਬਰਨਾਲਾ ਨੂੰ ਇੱਕ ਵੱਡਾ ਵਿੱਤੀ ਫਾਇਦਾ ਇਹ ਵੀ ਹੋਵੇਗਾ ਕਿ ਸਰਕਾਰ ਵੱਲੋਂ ਵਿਕਾਸ ਕਾਰਜਾਂ ਲਈ ਮਿਲਣ ਵਾਲੀ ਗ੍ਰਾਂਟ ਦਾ ਕੋਟਾ ਵੱਧ ਜਾਵੇਗਾ। ਇਹ ਵੀ ਇੱਕ ਇਤਫ਼ਾਕ ਹੀ ਹੈ ਕਿ 19 ਸਾਲ ਪਹਿਲਾਂ 19 ਨਵੰਬਰ 2006 ਨੂੰ ਬਰਨਾਲਾ ਜ਼ਿਲ੍ਹਾ ਬਣਿਆ ਸੀ ਅਤੇ ਹੁਣ 19 ਸਾਲ ਬਾਅਦ 19 ਨਵੰਬਰ 2025 ਨੂੰ ਬਰਨਾਲਾ ਨਗਰ ਨਿਗਮ ਬਣਿਆ ਹੈ। ਕੱਲ੍ਹ ਇਹ ਤੱਥ ਵੀ ਦਿਲਚਸਪ ਰਿਹੈ ਕਿ ਕੇਵਲ ਸਿੰਘ ਢਿੱਲੋ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਲਾਈਵ ਹੋ ਕੇ ਬਰਨਾਲਾ ਜ਼ਿਲ੍ਹੇ ਦੇ ਗਠਨ ਦੀ ਵਰੇਗੰਢ ‘ਤੇ ਬਰਨਾਲਾ ਦੇ ਲੋਕਾਂ ਨੂੰ ਵਧਾਈ ਦਿੱਤੀ ਅਤੇ ਦੂਜੇ ਪਾਸੇ ਆਮ ਆਦਮੀ ਪਾਰਟੀ ਦੇ ਸੋਸ਼ਲ ਮੀਡੀਆ ਅਕਾਊਂਟ ਨੇ ਨਗਰ ਨਿਗਮ ਨੂੰ ਮਨਜ਼ੂਰੀ ਮਿਲਣ ਸਬੰਧੀ ਗਜਟ ਦੀ ਕਾਪੀ ਸ਼ੇਅਰ ਕਰ ਦਿੱਤੀ। ਬਰਨਾਲਾ ਦੀ ਅਗਲੀ ਰਾਜਨੀਤੀ ਹੁਣ ਦਿਲਚਸਪ ਹੋਵੇਗੀ ਅਤੇ ਸੱਤਾਧਾਰੀ ਪਾਰਟੀ ਦੀ ਰਣਨੀਤੀ ਅਤੇ ਰਾਜਨੀਤੀ ਦਾ ਮੁੱਢਲਾ ਪੁਆਇੰਟ ਹੀ ਨਗਰ ਨਿਗਮ ਹੋਵੇਗਾ। ਬਰਨਾਲਾ ਨਾਲ ਸੰਬੰਧਿਤ ਸੱਤਾਧਾਰੀ ਆਗੂ ਨਗਰ ਨਿਗਮ ਦੀ ਪ੍ਰਾਪਤੀ ਨੂੰ ਸਭ ਤੋਂ ਮੁੱਢਲੀ ਪ੍ਰਾਪਤੀ ਰੱਖਣਗੇ ਅਤੇ ਇਸ ਦੇ ਪ੍ਰਚਾਰ ‘ਤੇ ਯੋਜਨਾਬੱਧ ਤਰੀਕੇ ਨਾਲ ਕੰਮ ਕੀਤਾ ਜਾਵੇਗਾ ਪ੍ਰੰਤੂ ਇੱਥੇ ਇਸ ਸੱਚ ਤੋਂ ਮੁਨਕਰ ਨਹੀਂ ਹੋਇਆ ਜਾ ਸਕਦਾ ਕਿ ਬਰਨਾਲੇ ਨੂੰ ਜ਼ਿਲ੍ਹੇ ਦਾ ਦਰਜਾ ਮਿਲਣ ਦੀ ਕਾਰਵਾਈ ਨਗਰ ਨਿਗਮ ਦੇ ਦਰਜੇ ਤੋਂ ਕਿਤੇ ਵੱਡੀ ਹੈ ਕਿਉਂਕਿ ਨਗਰ ਨਿਗਮ ਸਿਰਫ਼ ਬਰਨਾਲਾ ਸ਼ਹਿਰ ਦੀ ਹਦੂਦ ਤੱਕ ਹੀ ਸੀਮਤ ਹੈ ਜਦਕਿ ਜ਼ਿਲ੍ਹਾ ਬਣਨ ਤੋਂ ਬਾਅਦ ਬਰਨਾਲੇ ਦੇ ਤਿੰਨ ਵਿਧਾਨ ਸਭਾ ਹਲਕਿਆਂ ਦੇ ਲੋਕਾਂ ਨੂੰ ਵੱਡਾ ਫਾਇਦਾ ਹੋਇਆ ਹੈ। ਇਸ ਲਈ ਨਗਰ ਨਿਗਮ ਦੇ ਪ੍ਰਚਾਰ ਦੌਰਾਨ ਸੱਤਾਧਾਰੀ ਆਗੂਆਂ ਨੂੰ ਇਹ ਧਿਆਨ ਰੱਖਣਾ ਹੋਵੇਗਾ ਕਿ ਜ਼ਿਲ੍ਹੇ ਦਾ ਦਰਜਾ ਨਗਰ ਨਿਗਮ ਤੋਂ ਵੱਡਾ ਹੁੰਦਾ ਹੈ। ਕੁੱਲ ਮਿਲਾ ਕੇ ਬਰਨਾਲਾ ਸ਼ਹਿਰ ਦੇ ਲੋਕ ਇਸ ਲਈ ਵਧਾਈ ਦੇ ਹੱਕਦਾਰ ਹਨ ਕਿ ਉਹਨਾਂ ਨੂੰ ਹੁਣ ਨਗਰ ਕੌਂਸਲ ਤੋਂ ਵੱਧ ਕੇ ਨਗਰ ਨਿਗਮ ਦੀਆਂ ਸਹੂਲਤਾਂ ਮਿਲਣਗੀਆਂ ਬਸ਼ਰਤੇ ਕਿ ਸਮੇਂ ਸਮੇਂ ਦੀਆਂ ਰਾਜਨੀਤਿਕ ਪਾਰਟੀਆਂ ਦੇ ਆਗੂ ਇਸ ਸਹੂਲਤਾਂ ਲੋਕਾਂ ਤੱਕ ਹੂਬਹੂ ਪਹੁੰਚਾਉਣ ਲਈ ਇਮਾਨਦਾਰ ਰਹਿਣ ਅਤੇ ਵਧੇ ਹੋਏ ਵਿੱਤੀ ਬਜਟ ਦਾ ਪੈਸਾ-ਪੈਸਾ ਨਗਰ ਨਿਗਮ ਦੇ ਵਿਕਾਸ ਕਾਰਜਾਂ ‘ਤੇ ਲੱਗੇ ਕਿਉਂਕਿ ਨਗਰ ਕੌਂਸਲ ਦੇ ਠੇਕੇਦਾਰ ਅਤੇ ਮੁਲਾਜ਼ਮ ਤਾਂ ਘੱਟ ਵਿੱਤੀ ਬਜਟ ਦੇ ਹੁੰਦੇ ਹੋਈ ਥੱਪੜੋ ਥੱਪੜੀ ਹੋ ਰਹੇ ਹਨ।
