ਚੰਡੀਗੜ੍ਹ,2 ਅਪ੍ਰੈਲ, Gee98 News service-
ਭਾਜਪਾ ਦੇ ਚੰਡੀਗੜ੍ਹ ਵਿਖੇ ਮੁੱਖ ਦਫ਼ਤਰ ਦੇ ਬਾਹਰ ਹੋਏ ਧਮਾਕੇ ਸਬੰਧੀ ਨਵੇਂ ਖੁਲਾਸੇ ਸਾਹਮਣੇ ਆਏ ਹਨ। ਸੂਤਰਾਂ ਮੁਤਾਬਕ ਭਾਜਪਾ ਦੇ ਮੁੱਖ ਦਫ਼ਤਰ ‘ਤੇ ਹਮਲੇ ਵਿੱਚ GHD2P ਮਾਰਕਾ ਹੈਂਡ ਗਰਨੇਡ ਦਾ ਇਸਤੇਮਾਲ ਕੀਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਇਹ ਗਰਨੇਡ ਪਾਕਿਸਤਾਨ ਵਿਚ ਬਣਾਏ ਜਾਂਦੇ ਹਨ। ਇਹ ਗਰਨੇਡ ਸੁੱਟਣ ਤੋਂ ਬਾਅਦ 5 ਤੋਂ 10 ਮੀਟਰ ਦੇ ਦਾਇਰੇ ਵਿੱਚ ਬੇਹੱਦ ਘਾਤਕ ਸਾਬਤ ਹੋ ਸਕਦੇ ਹਨ ਅਤੇ ਇਹਨਾਂ ਦੇ ਟੁਕੜੇ 20 ਤੋਂ 25 ਮੀਟਰ ਤੱਕ ਫੈਲਦੇ ਹਨ ਜਿਹੜੇ ਇਹਨਾਂ ਦੀ ਮਾਰ ਵਿੱਚ ਆਉਣ ਵਾਲਿਆਂ ਨੂੰ ਸਖ਼ਤ ਜ਼ਖ਼ਮੀ ਕਰ ਸਕਦੇ ਹਨ। ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਹੈ ਕਿ ਹੈਂਡ ਗਰਨੇਡ ਭਾਜਪਾ ਮੁੱਖ ਦਫ਼ਤਰ ਦੇ ਬਾਹਰ ਕਰੀਬ 30 ਫੁੱਟ ਦੀ ਦੂਰੀ ਤੋਂ ਸੁੱਟਿਆ ਗਿਆ ਹੈ, ਦਫ਼ਤਰ ਦੇ ਕੰਧ ਦੀ ਉਚਾਈ ਲੱਗਭੱਗ 3 ਫੁੱਟ ਹੈ ਜਿਸ ਉੱਪਰ ਦੋ ਫੁੱਟ ਉੱਚੀ ਐਲਮੀਨੀਅਮ ਦੀ ਗਰਿੱਲ ਵੀ ਲੱਗੀ ਹੋਈ ਹੈ। ਜਿੱਥੇ ਗਰਨੇਡ ਡਿੱਗਿਆ ਉਥੋਂ ਬੀਜੇਪੀ ਦਫ਼ਤਰ ਦੇ ਮੁੱਖ ਦਰਵਾਜ਼ੇ ਦੀ ਦੂਰੀ ਕਰੀਬ 25 ਕੁ ਫੁੱਟ ਹੀ ਦੱਸੀ ਜਾ ਰਹੀ ਹੈ। ਦੱਸ ਦੇਈਏ ਕਿ ਮੁੱਖ ਦਫ਼ਤਰ ਦੇ ਨੇੜੇ ਹੀ ਸੁਰੱਖਿਆ ਕਰਮਚਾਰੀਆਂ ਲਈ ਇੱਕ ਕੈਬਿਨ ਵੀ ਬਣਿਆ ਹੋਇਆ ਹੈ ਜਿੱਥੇ CRPF ਦੇ ਦੋ ਜਵਾਨ ਹਰ ਵਕਤ ਤਾਇਨਾਤ ਰਹਿੰਦੇ ਹਨ। ਦੂਜੇ ਪਾਸੇ ਮੁੱਖ ਗੇਟ ‘ਤੇ ਚੰਡੀਗੜ੍ਹ ਪੁਲਿਸ ਦੇ ਕਰਮਚਾਰੀ ਵੀ ਤਾਇਨਾਤ ਰਹਿੰਦੇ ਹਨ। ਭਾਜਪਾ ਮੁੱਖ ਦਫ਼ਤਰ ‘ਚ ਜਿੱਥੇ ਗਰਨੇਡ ਡਿੱਗਿਆ ਹੈ ਉਥੇ ਅਕਸਰ ਆਉਣ ਜਾਣ ਵਾਲੇ ਲੋਕ ਆਪਣੀਆਂ ਗੱਡੀਆਂ ਪਾਰਕ ਕਰਦੇ ਹਨ ਅਤੇ ਘਟਨਾ ਸਮੇਂ ਵੀ ਉੱਥੇ ਕਾਫੀ ਵਾਹਨ ਪਾਰਕਿੰਗ ਕੀਤੇ ਹੋਏ ਸਨ ਜਿਨਾਂ ਦੇ ਸ਼ੀਸ਼ੇ ਬੁਰੀ ਤਰ੍ਹਾਂ ਟੁੱਟ ਗਏ।
