ਬਰਨਾਲਾ ,30 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ)-
-ਪੰਜਾਬ ਵਿਜੀਲੈਂਸ ਬਿਊਰੋ ਦੀ ਬਰਨਾਲਾ ਯੂਨਿਟ ਨੇ ਮਾਲ ਹਲਕਾ ਕੱਟੂ ਦੇ ਪਟਵਾਰੀ ਨੂੰ ਰਿਸ਼ਵਤ ਲੈਣ ਦੇ ਦੋਸ਼ ਹੇਠ ਗ੍ਰਿਫਤਾਰ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਗੁਰਮੇਲ ਸਿੰਘ ਇੰਸਪੈਕਟਰ ਵਿਜੀਲੈਂਸ ਬਿਊਰੋ ਯੂਨਿਟ ਬਰਨਾਲਾ ਨੇ ਦੱਸਿਆ ਕਿ ਐਂਟੀ ਕੁਰੱਪਸ਼ਨ ਐਕਸ਼ਨ ਲਾਈਨ ਉੱਪਰ ਸ਼ਿਕਾਇਤ ਕਰਤਾ ਬਸੀਰ ਖ਼ਾਨ ਦੀ ਸ਼ਿਕਾਇਤ ਦੇ ਆਧਾਰ ‘ਤੇ ਮਾਲ ਹਲਕਾ ਕੱਟੂ ਦੇ ਪਟਵਾਰੀ ਹਰਮਨਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਉਹਨਾਂ ਦੱਸਿਆ ਕਿ ਸ਼ਿਕਾਇਤ ਕਰਤਾ ਬਸ਼ੀਰ ਖ਼ਾਨ ਦੇ ਪਿਤਾ ਦਿਲਾਵਰ ਖ਼ਾਨ ਨੇ ਸਾਲ 2014 ਵਿੱਚ ਉਹਨਾਂ ਦੀ ਪਿੰਡ ਕੱਟੂ ਵਿਖੇ ਪੈਂਦੀ ਵਾਹੀਯੋਗ ਜ਼ਮੀਨ ‘ਤੇ ਮਾਲਵਾ ਗ੍ਰਾਮੀਣ ਬੈਂਕ ਬਾਲੀਆ (ਹੁਣ ਪੰਜਾਬ ਗ੍ਰਾਮੀਣ ਬੈਂਕ) ਪਾਸੋਂ 2,70,000 ਦਾ ਕਰਜ਼ਾ ਲਿਆ ਸੀ। ਇਹ ਕਰਜ਼ਾ ਮੋੜਨ ਉਪਰੰਤ ਬੈਂਕ ਨੇ ਪਟਵਾਰੀ ਪਿੰਡ ਕੱਟੂ ਨੂੰ ਦਿਲਾਵਰ ਖ਼ਾਨ ਦੇ ਆੜ-ਰਹਿਣ ਕੀਤੇ ਗਏ ਰਕਬੇ ਨੂੰ ਫੱਕ ਕਰਨ ਸਬੰਧੀ ਪੱਤਰ ਲਿਖਿਆ। ਇਸ ਮਾਮਲੇ ਸਬੰਧੀ ਜਦ ਦਿਲਾਵਰ ਖ਼ਾਨ ਦਾ ਪੁੱਤਰ ਬਸੀਰ ਖ਼ਾਨ ਪਟਵਾਰੀ ਨੂੰ ਮਿਲਿਆ ਤਾਂ ਪਟਵਾਰੀ ਹਰਮਨਜੀਤ ਸਿੰਘ ਵੱਲੋਂ ਜ਼ਮੀਨ ਫੱਕ ਕਰਨ ਸਬੰਧੀ ਸਰਟੀਫਿਕੇਟ ਦਰਜ ਕਰਨ ਅਤੇ ਸ਼ਿਕਾਇਤਕਰਤਾ ਦੇ ਪਿਤਾ ਦਿਲਾਵਰ ਖ਼ਾਨ ਦੀ ਮੌਤ ਉਪਰੰਤ ਉਸ ਦੇ ਪਿਤਾ ਦੀ ਮਾਲਕੀ ਵਾਲੀ ਜ਼ਮੀਨ ਦੀ ਵਿਰਾਸਤ ਇੰਤਕਾਲ ਚੜਾਉਣ ਬਦਲੇ 5000 ਰੁਪਏ ਰਿਸ਼ਵਤ ਦੀ ਮੰਗ ਕੀਤੀ, ਜਿਸ ਤੋਂ ਬਾਅਦ ਬਸੀਰ ਖ਼ਾਨ ਵੱਲੋਂ ਪਟਵਾਰੀ ਹਰਮਨਜੀਤ ਸਿੰਘ ਦੇ ਕਹੇ ਅਨੁਸਾਰ ਮਿਤੀ 16 ਜਨਵਰੀ 2026 ਨੂੰ ਆਪਣੀ ਮੋਬਾਇਲ ਤੋਂ ਪਟਵਾਰੀ ਹਰਮਨਜੀਤ ਸਿੰਘ ਵੱਲੋਂ ਦਿੱਤੇ ਮੋਬਾਇਲ ਨੰਬਰ ‘ਤੇ ਗੂਗਲ ਪੇ ਰਾਹੀਂ 4000 ਭੇਜ ਦਿੱਤੇ। ਉਹਨਾਂ ਦੱਸਿਆ ਕਿ ਸ਼ਿਕਾਇਤ ਦੀ ਪੜ੍ਹਤਾਲ ਦੌਰਾਨ ਬਸੀਰ ਖ਼ਾਨ ਦੇ ਨਾਮ ‘ਤੇ ਸਟੇਟ ਬੈਂਕ ਆਫ਼ ਇੰਡੀਆ ਬਰਾਂਚ ਬਾਲੀਆ ਵਿਖੇ ਚੱਲ ਰਹੇ ਖਾਤੇ ਦੀ ਸਟੇਟਮੈਂਟ ਹਾਸਿਲ ਕੀਤੀ ਤਾਂ 16 ਜਨਵਰੀ 2026 ਨੂੰ 4000 ਹਰਮਨਜੀਤ ਸਿੰਘ ਪਟਵਾਰੀ ਦੀ ਮਾਤਾ ਸ੍ਰੀਮਤੀ ਗੁਰਮੀਤ ਕੌਰ ਦੇ ਸੈਂਟਰਲ ਬੈਂਕ ਆਫ਼ ਇੰਡੀਆ ਬਰਾਂਚ ਭੁੱਚੋ ਮੰਡੀ ਜ਼ਿਲ੍ਹਾ ਬਠਿੰਡਾ ਵਿਖੇ ਚੱਲ ਰਹੇ ਖ਼ਾਤੇ ਵਿੱਚ ਰਕਮ ਟਰਾਂਸਫਰ ਹੋਣੀ ਪਾਈ ਗਈ। ਇਸ ਤਰ੍ਹਾਂ ਹਰਮਨਜੀਤ ਸਿੰਘ ਪਟਵਾਰੀ ਮਾਲ ਹਲਕਾ ਕੱਟੂ ਵੱਲੋਂ ਬਸੀਰ ਖ਼ਾਨ ਦੇ ਉਕਤ ਕੰਮ ਕਰਨ ਬਦਲੇ 4000 ਬਤੌਰ ਰਿਸ਼ਵਤ ਹਾਸਲ ਕਰਨਾ ਜੁਰਮ ਸਾਬਤ ਹੋਇਆ ਹੈ ਜਿਸ ਦੇ ਆਧਾਰ ‘ਤੇ ਹਰਮਨਜੀਤ ਸਿੰਘ ਪਟਵਾਰੀ ਮਾਲ ਹਲਕਾ ਕੱਟੂ ਸਬ ਤਹਿਸੀਲ ਦਫ਼ਤਰ ਧਨੌਲਾ ਪੁੱਤਰ ਬਲਜਿੰਦਰ ਸਿੰਘ ਵਾਸੀ ਨੇੜੇ ਵਾਟਰ ਵਰਕਸ, ਪੱਤੀ ਕਮਾਲ,ਪਿੰਡ ਦੇ ਡਾਕਖਾਨਾ ਸੇਮਾ ਤਹਿਸੀਲ ਅਤੇ ਜ਼ਿਲ੍ਹਾ ਬਠਿੰਡਾ ਦੇ ਖ਼ਿਲਾਫ਼ ਮੁਕੱਦਮਾ ਦਰਜ ਕਰਕੇ ਉਸ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ ਜਿਸ ਦੇ ਖ਼ਿਲਾਫ਼ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ।
