– 1 ਜੁਲਾਈ ਤੋਂ ਵਾਧੂ ਫੀਸ ਦੇਣੀ ਪਵੇਗੀ
ਚੰਡੀਗੜ੍ਹ, 26 ਜੂਨ, Gee98 news service-
-ਭਾਰਤ ਸਰਕਾਰ ਨੇ ਨਵਾਂ ਪਾਸਪੋਰਟ ਬਣਾਉਣ ਅਤੇ ਮੁੜ ਜਾਰੀ ਕਰਨ ਦੀ ਫੀਸ ਵਿੱਚ ਭਾਰੀ ਵਾਧਾ ਕਰ ਦਿੱਤਾ ਹੈ। ਹੁਣ ਜੇਕਰ ਤੁਸੀਂ ਨਵਾਂ ਪਾਸਪੋਰਟ ਬਣਾਉਣਾ ਚਾਹੁੰਦੇ ਹੋ ਜਾਂ ਪਾਸਪੋਰਟ ਮੁੜ ਜਾਰੀ ਕਰਵਾਉਣਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਪਹਿਲਾਂ ਨਾਲੋਂ ਵੱਧ ਫੀਸ ਦੇਣੀ ਪਵੇਗੀ। ਸਰਕਾਰ ਨੇ ਪਾਸਪੋਰਟ ਨਿਯਮਾਂ 1980 ਵਿੱਚ ਸੋਧ ਕੀਤੀ ਹੈ, ਜਿਸ ਨਾਲ ਨਵੇਂ 36 ਪੰਨਿਆਂ ਦੇ ਸਟੈਂਡਰਡ ਪਾਸਪੋਰਟ ਲਈ ਅਰਜ਼ੀ ਫੀਸ ₹1,500 ਤੋਂ ਵਧਾ ਕੇ ₹2,500 ਕਰ ਦਿੱਤੀ ਗਈ ਹੈ। ਜਦਕਿ ਨਵੇਂ ਆਮ 36 ਪੰਨਿਆਂ ਦੇ ਪਾਸਪੋਰਟ ਜਾਂ ਪਾਸਪੋਰਟ ਦੇ ਮੁੜ ਜਾਰੀ ਕਰਨ ਲਈ ਤਤਕਾਲ ਸੇਵਾ ਫੀਸ 5,000 ਰੁਪਏ ਹੋਵੇਗੀ। ਇਹ ਨਵੇਂ ਨਿਯਮ 1 ਜੁਲਾਈ, 2026 ਤੋਂ ਲਾਗੂ ਹੋਣਗੇ। ਜ਼ਿਕਰਯੋਗ ਹੈ ਕਿ ਇਸ ਸ਼੍ਰੇਣੀ ਵਿੱਚ ਤਤਕਾਲ ਸੇਵਾ ਦੀ ਫੀਸ ਵਰਤਮਾਨ ਵਿੱਚ ₹3,500 ਹੈ। ਇਸੇ ਤਰ੍ਹਾਂ ਇੱਕ ਨਵੇਂ 60-ਪੰਨਿਆਂ ਦੇ ਆਮ ਪਾਸਪੋਰਟ ਲਈ ਜਾਂ ਪਾਸਪੋਰਟ ਦੁਬਾਰਾ ਜਾਰੀ ਕਰਨ ਲਈ ਅਰਜ਼ੀ ਫੀਸ ₹2,000 ਤੋਂ ਵਧਾ ਕੇ ₹3,500 ਕਰ ਦਿੱਤੀ ਗਈ ਹੈ, ਅਤੇ ਨਵੀਂ ਤਤਕਾਲ ਸੇਵਾ ਫੀਸ ₹6,000 ਹੋਵੇਗੀ, ਜੋ ਕਿ ਇਸ ਸ਼੍ਰੇਣੀ ਲਈ ਪਹਿਲਾਂ ₹4,000 ਸੀ।ਵਿਦੇਸ਼ ਮੰਤਰਾਲੇ ਦੇ ਇੱਕ ਅਧਿਕਾਰੀ ਨੇ ਬੁੱਧਵਾਰ ਨੂੰ 14ਵੇਂ ਪਾਸਪੋਰਟ ਸੇਵਾ ਦਿਵਸ ਮੌਕੇ ਕਿਹਾ ਕਿ ਸਰਕਾਰ ਪਾਸਪੋਰਟ ਸੇਵਾਵਾਂ ਨੂੰ ਸੁਚਾਰੂ ਬਣਾਉਣ ਲਈ ਲਗਾਤਾਰ ਕੰਮ ਕਰ ਰਹੀ ਹੈ। ਪਿਛਲੇ ਦਹਾਕੇ ਵਿੱਚ ਪਾਸਪੋਰਟ ਨੈੱਟਵਰਕ ਛੇ ਗੁਣਾ ਵਧਿਆ ਹੈ। ਸਿਰਫ਼ 2025 ਵਿੱਚ, 15 ਮਿਲੀਅਨ ਪਾਸਪੋਰਟ ਅਤੇ ਸੰਬੰਧਿਤ ਸੇਵਾਵਾਂ ਜਾਰੀ ਕੀਤੀਆਂ ਗਈਆਂ ਸਨ। ਅਧਿਕਾਰੀ ਨੇ ਦੱਸਿਆ ਕਿ ਦੇਸ਼ ਭਰ ਵਿੱਚ 545 ਪਾਸਪੋਰਟ ਕੇਂਦਰ ਹਨ, ਜਦੋਂ ਕਿ ਦਸ ਸਾਲ ਪਹਿਲਾਂ ਇਹ ਗਿਣਤੀ ਸਿਰਫ਼ 77 ਸੀ। ਪਾਸਪੋਰਟ ਕੇਂਦਰਾਂ ਦੀ ਗਿਣਤੀ ਵਿੱਚ ਲਗਭਗ ਛੇ ਗੁਣਾ ਵਾਧਾ ਹੋਇਆ ਹੈ। ਉਨਾਂ ਦੱਸਿਆ ਕਿ “ਅਸੀਂ ਪਿਛਲੇ ਸਾਲ 10 ਡਾਕਘਰ ਪਾਸਪੋਰਟ ਸੇਵਾ ਕੇਂਦਰ ਖੋਲ੍ਹੇ ਸਨ ਅਤੇ ਇਸ ਸਾਲ 10 ਹੋਰ ਕੇਂਦਰ ਖੋਲ੍ਹੇ ਜਾਣਗੇ”। ਅਧਿਕਾਰੀ ਨੇ ਕਿਹਾ ਕਿ ਹੁਣ ਭਾਰਤੀਆਂ ਲਈ ਵੀਜ਼ਾ-ਮੁਕਤ ਪ੍ਰਵੇਸ਼ ਵਾਲੇ ਦੇਸ਼ਾਂ ਦੀ ਗਿਣਤੀ 27 ਹੋ ਗਈ ਹੈ, ਜਦੋਂ ਕਿ 2019 ਵਿੱਚ ਇਹ ਗਿਣਤੀ 16 ਸੀ, 47 ਦੇਸ਼ ਭਾਰਤੀਆਂ ਨੂੰ ‘ਵੀਜ਼ਾ ਆਨ ਅਰਾਈਵਲ’ ਸਹੂਲਤ ਪ੍ਰਦਾਨ ਕਰਦੇ ਹਨ ਅਤੇ 66 ਦੇਸ਼ ਭਾਰਤੀਆਂ ਨੂੰ ਇਲੈਕਟ੍ਰਾਨਿਕ ਵੀਜ਼ਾ ਸਹੂਲਤ ਪ੍ਰਦਾਨ ਕਰਦੇ ਹਨ।
