ਬਰਨਾਲਾ, 16 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ) : ਫੂਡ ਸਪਲਾਈ ਵਿਭਾਗ ਵੱਲੋਂ ਨੀਲਾ ਕਾਰਡ ਧਾਰਕਾਂ ਨੂੰ ਵੰਡੀ ਜਾਣ ਵਾਲੀ ਕਣਕ ਦੇ ਕੁੱਲ ਕੋਟੇ ਵਿੱਚ ਕੱਟ ਲਗਾਏ ਜਾਣ ਦੀ ਜਾਣਕਾਰੀ ਮਿਲੀ ਹੈ। ਬਲਾਕ ਮਹਿਲ ਕਲਾਂ ਨਾਲ ਸੰਬੰਧਿਤ ਕੁਝ ਡੀਪੂ ਹੋਲਡਰਾਂ ਨੇ ਦੱਸਿਆ ਕਿ ਨੀਲਾ ਕਾਰਡ ਧਾਰਕ ਲਾਭਪਾਤਰੀਆਂ ਨੂੰ ਮੁਫ਼ਤ ਵੰਡੀ ਜਾਣ ਵਾਲੀ ਕਣਕ ਦੇ ਕੋਟੇ ਵਿੱਚ 9-10 ਫ਼ੀਸਦੀ ਕੱਟ ਲਗਾਇਆ ਗਿਆ ਹੈ, ਭਾਵ ਕਿਸੇ ਪਿੰਡ ਦੇ ਕੁੱਲ ਬਣਦੇ ਕੋਟੇ ਵਿੱਚੋਂ 10 ਫ਼ੀਸਦੀ ਕਣਕ ਘੱਟ ਚੁਕਾਈ ਗਈ ਹੈ। ਡੀਪੂ ਹੋਲਡਰਾਂ ਲਈ ਵਿਭਾਗ ਦੀ ਇਹ ਨੀਤੀ ਸਿਰਦਰਦੀ ਬਣੀ ਹੋਈ ਹੈ ਕਿਉਂਕਿ ਜਿਹੜੇ ਕਾਰਡ ਧਾਰਕ ਕਣਕ ਲੈਣ ਤੋਂ ਰਹਿ ਜਾਂਦੇ ਹਨ ਉਹ ਡੀਪੂ ਹੋਲਡਰਾਂ ਨਾਲ ਵਾਧੂ ਕਲੇਸ਼ ਕਰਦੇ ਹਨ। ਜਦ ਕਿ ਕੱਟੀ ਗਈ ਕਣਕ ਵਿੱਚ ਡੀਪੂ ਹੋਲਡਰਾਂ ਦੀ ਕੋਈ ਭੂਮਿਕਾ ਨਹੀਂ ਹੈ। ਜਾਣਕਾਰੀ ਅਨੁਸਾਰ ਮੁਫ਼ਤ ਵੰਡੀ ਜਾਣ ਵਾਲੀ ਕਣਕ ਵਿੱਚ ਪਿਛਲੀ ਵਾਰ ਵੀ ਲੱਗਭੱਗ 6 ਫ਼ੀਸਦੀ ਕੱਟ ਲਗਾਇਆ ਗਿਆ ਸੀ। ਡੀਪੂ ਹੋਲਡਰਾਂ ਨੂੰ ਖ਼ੁਦ ਇਸ ਗੱਲ ਦੀ ਜਾਣਕਾਰੀ ਨਹੀਂ ਕਿ ਇਹ ਕੱਟ ਕਿਉਂ ਲਗਾਇਆ ਜਾ ਰਿਹਾ ਹੈ। ਇਸ ਸੰਬੰਧੀ ਵਿਭਾਗ ਦੇ ਇੰਸਪੈਕਟਰ ਲਖਵਿੰਦਰ ਸਿੰਘ ਨਾਲ ਗੱਲ ਕੀਤੀ ਤਾਂ ਉਨਾਂ ਨੇ ਵੀ ਕਿਸੇ ਪਿੰਡ ਵਿੱਚ ਵੰਡੀ ਜਾਣ ਵਾਲੀ ਕਣਕ ਦੇ ਕੋਟੇ ਵਿੱਚੋਂ 9-10 ਫ਼ੀਸਦੀ ਕੱਟ ਲਾਉਣ ਦੀ ਪੁਸ਼ਟੀ ਕੀਤੀ। ਉਨਾਂ ਕਿਹਾ ਕਿ ਜਿੰਨਾ ਕੋਟਾ ਵਿਭਾਗ ਨੂੰ ਅਲਾਟ ਹੁੰਦਾ ਹੈ, ਉਸ ਹਿਸਾਬ ਨਾਲ ਹੀ ਡੀਪੂ ਹੋਲਡਰਾਂ ਨੂੰ ਕਣਕ ਚੁਕਾ ਦਿੱਤੀ ਜਾਂਦੀ ਹੈ ਅਤੇ ਅੱਗੇ ਡੀਪੂ ਹੋਲਡਰ ਵੀ ਉਸੇ ਹਿਸਾਬ ਨਾਲ ਹੀ ਕਣਕ ਵੰਡਦੇ ਹਨ। ਮੁਫ਼ਤ ਵੰਡੀ ਜਾਣ ਵਾਲੀ ਕਣਕ ਦੇ ਕੋਟੇ ਵਿੱਚ ਕੱਟ ਲੱਗਣ ਦੀਆਂ ਖ਼ਬਰਾਂ ਤੋਂ ਬਾਅਦ ਲਾਭਪਾਤਰੀਆਂ ਵਿੱਚ ਕਣਕ ਲੈਣ ਲਈ ਹੋੜ ਲੱਗੀ ਹੋਈ ਹੈ, ਕਿਉਂਕਿ ਇਹ ਕਣਕ ‘‘ਜਿਹੜਾ ਲੈ ਗਿਆ ਤਾਂ ਲੈ ਗਿਆ, ਜਿਹੜਾ ਰਹਿ ਗਿਆ ਤਾਂ ਰਹਿ ਗਿਆ’’ ਵੀ ਨੀਤੀ ਮੁਤਾਬਕ ਵੰਡੀ ਜਾ ਰਹੀ ਹੈ।
Menu
