ਬਰਨਾਲਾ, 02 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ) : ਅਜੋਕੇ ਦੌਰ ’ਚ ਰਾਜਨੀਤੀ ਇੱਕ ਅਜਿਹੀ ਖੇਡ ਬਣ ਚੁੱਕੀ ਹੈ ਜਿਸ ਨੂੰ ਖੇਡਣ ਵਾਲੇ ਖਿਡਾਰੀ ਮੈਚ ਚਲਦੇ-ਚਲਦੇ ਹੀ ਦੂਜੀ ਟੀਮ ’ਚ ਟਪੂਸੀ ਮਾਰ ਜਾਂਦੇ ਹਨ ਅਤੇ ਪਹਿਲੀ ਟੀਮ ਦਾ ਕਪਤਾਨ ਦੇਖਦਾ ਹੀ ਰਹਿ ਜਾਂਦਾ ਹੈ। ਵਿਧਾਨ ਸਭਾ ਹਲਕਾ ਬਰਨਾਲਾ ’ਚ ਉਕਤ ਧਾਰਨਾ ਦੀ ਮਿਸਾਲ ਅੱਜ ਕੱਲ ਬਾਖ਼ੂਬੀ ਵੇਖਣ ਨੂੰ ਮਿਲ ਰਹੀ ਹੈ। ਸੱਤਾਧਾਰੀ ਪਾਰਟੀ ਕਾਂਗਰਸ ਦੀ ਬਰਨਾਲਾ ਹਲਕੇ ਤੋਂ ਟਿਕਟ ਦੀ ਕਸ਼ਮਕਸ ਕੇਵਲ ਸਿੰਘ ਢਿੱਲੋਂ ਅਤੇ ਮੁਨੀਸ ਬਾਂਸਲ ਵਿਚਕਾਰ ਜਿਸ ਵੇਲੇ ਚੱਲ ਰਹੀ ਸੀ ਤਾਂ ਕਾਂਗਰਸ ਪਾਰਟੀ ਦੇ ਵੱਡੀ ਗਿਣਤੀ ਸਥਾਨਕ ਆਗੂਆਂ ਨੇ ਕਾਂਗਰਸ ਹਾਈਕਮਾਂਡ ਨੂੰ ਸ਼ਰੇਬਾਜ਼ਾਰ ਧਮਕੀਆਂ ਦਿੱਤੀਆਂ ਕਿ ਜੇਕਰ ਟਿਕਟ ਕੇਵਲ ਸਿੰਘ ਢਿੱਲੋਂ ਤੋਂ ਬਿਨਾਂ ਕਿਸੇ ਹੋਰ ਆਗੂ ਨੂੰ ਦਿੱਤੀ ਗਈ ਜਾਂ ਪੈਰਾਸੂਟ ਰਾਹੀ ਕੋਈ ਉਮੀਦਵਾਰ ਥੋਪਿਆ ਗਿਆ ਤਾਂ ਉਸ ਦੀ ਵਿਰੋਧਤਾ ਕੀਤੀ ਜਾਵੇਗੀ, ਪੰ੍ਰਤੂ ਟਿਕਟ ਦਾ ਗੁਣਾ ਮੁਨੀਸ ਬਾਂਸਲ ਦੇ ਹੱਕ ’ਚ ਪੈਣ ਤੋਂ ਬਾਅਦ ਕੇਵਲ ਸਿੰਘ ਢਿੱਲੋਂ ਨਾਲ ਡੱਟ ਕੇ ਖੜਨ ਦਾ ਐਲਾਨ ਕਰਨ ਵਾਲੇ ਵੇਲ ਮੱਛੀ ਦੀ ਤਰਾਂ ਪਲਾਂ ਵਿੱਚ ਹੀ ਟਪੂਸੀ ਮਾਰ ਗਏ। ਇਨਾਂ ਵਿੱਚੋਂ ਬਹੁਤੇ ਉਹ ਆਗੂ ਵੀ ਹਨ ਜਿਹੜੇ ਟਿਕਟ ਕੱਟੇ ਜਾਣ ਤੋਂ ਬਾਅਦ ਕੇਵਲ ਸਿੰਘ ਢਿੱਲੋਂ ਵੱਲੋਂ ਕੀਤੇ ਸ਼ਕਤੀ ਪ੍ਰਦਰਸ਼ਨ ਵਿੱਚ ਕਹਿੰਦੇ ਸੀ ‘ਜਿੱਥੇ ਚੱਲੇਗਾ ਚੱਲੂਗੀ ਨਾਲ ਤੇਰੇ, ਟਿਕਟਾਂ ਦੋ ਲੈ ਲਵੀ’ । ਇਨਾਂ ਆਗੂਆਂ ਨੇ ਐਨੇ ਘੱਟ ਸਮੇਂ ’ਚ ਸਿਆਸੀ ਟਪੂਸੀ ਮਾਰੀ ਕਿ ਕੇਵਲ ਸਿੰਘ ਢਿੱਲੋਂ ਨੂੰ ਇਹ ਕਹਿਣ ਦਾ ਮੌਕਾ ਵੀ ਨਹੀਂ ਮਿਲਿਆ ‘‘ਆਵੇਂ ਸਾਡੇ ਨਾਲ ਜਾਵੇ ਕਿਸੇ ਹੋਰ ਨਾਲ ਬੱਲੇ ਓਏ ਚਲਾਕ ਸੱਜਣਾ’’। ਪੰਜਾਬੀ ਦੀ ਇੱਕ ਕਹਾਵਤ ਹੈ ਕਿ ‘ਯਾਰੀ ਲੱਗੀ ਤੋਂ ਲਵਾਤੇ ਤਖ਼ਤੇ, ਟੁੱਟੀ ਤੋਂ ਚੁਗਾਠ ਪੱਟ ਲੀ’। ਬਰਨਾਲਾ ’ਚ ਕਾਂਗਰਸ ਦੀ ਟਿਕਟ ਦਾ ਫ਼ੈਸਲਾ ਹੋਣ ਤੋਂ ਬਾਅਦ ਉਕਤ ਕਹਾਵਤ ਦੇ ਅਰਥ ਕੰਧ ’ਤੇ ਲਿਖੇ ਪੜੇ ਜਾ ਸਕਦੇ ਹਨ।
Menu
